Read Punu Ukumuga 28 Bible Online

Ukumuga 28 - Punu bible

Ukumuga 28

¹Moise gukanengila muana nguji agu Aaron na baana bandi bababaala nobabiatsa unsalila yisalu yibuvagulitsi bupagu: diwendi rie: Aaron jaʼ beni na baana bandi bababaala: Nadab na Abihou na Elazar na Itamar.

²Gukarariyila muana nguji agu Aaron biduaru biyingitsi.

³Gukatsingula botsu aba nyimavega buketi na dujabu dubisalu urariga biduaru biAaron abi oduara ava obiatsulu usala yisalu yiami yibuvagulitsi bupagu.

⁴Miina mabiduaru abi borariga amama: mfunga jitulu na yijungi yibuvagulitsi bupagu na yilinga na yijungi ayimamaruku na yiviovi na beleeti. Muana nguji agu Aaron na baana bandi bababaala bobiduara usala yisalu yiami yibuvagulitsi bupagu.

⁵Bosalisa matsanda maboti malora na madumbulu na mayinyuru ayivu va gari dumbulu na ubenga na mabenga.

⁶Borariga yijungi yibuvagulitsi bupagu na matsanda maboti malora na madumbulu na mayinyuru ayivu va gari dumbulu na ubenga na mabenga, amamasalu na tindi buketi.

⁷Borariga bivakugulu bibangalu abiunamugu mu makodu motsu mabeji.

⁸Beleeti ajiunamugu na yijungi yibuvagulitsi bupagu jiuba yisalu yimosi na yionyi, jiuba jimatsanda maboti malora na madumbulu na mayinyuru ayivu va gari dumbulu na ubenga na mabenga.

⁹Gukabonga mamanyi mabeji maonikisa gukasona miina memama mabaana bababaala baJacob;

¹⁰Miina mogu masiamunu va dimanyi dimosi na masusu masiamunu va dimanyi disusu, gukasona nana bamadukasana na mbura tsiogu.

¹¹Gukabaka miina mabaana bababaala baJacob va mamanyi motsu mabeji nana bebakili bilimba va mamanyi: gukamanamiga lora mu mingongu.

¹²Gukavakiga mamanyi meni mu bivakugulu bibangalu biyilinga yibuvagulitsi bupagu, anana mobila yirangumunu yiyigumi na bifumba bibeji biIsrael; na moba nana yirangumunu ava Aaron omabeyila va masambaka mandi ava okotila va gusu Fumu o Mbura Nsambi.

¹³Gukamanamiga lora mu mungongu

¹⁴na panga tsigeyi beji tsitindi lora atsi guvasa nderi mikudu na gukanamiga panga tsieni atsimavasu mu mingongu mimamanyi meni.

¹⁵Gukarariga mfunga jitulu jibunsonsi ajiusalu na buketi, gukajisala dedi mosi na yijungi yibuvagulitsi bupagu, gukajirariga na matsanda maboti malora na madumbulu na mayinyuru ayivu va gari dumbulu na ubenga na mabenga.

¹⁶Usakama na uroga biuba dedi na matsanda mofuakasana; usakama ujionyi uba magumabeji na santimetera yiranu na uroga ujionyi uba dedi na usakama.

¹⁷Gukanamiga mamanyi madufunu duneni muna, diwendi rie: milonga mina. Mu mulonga agutega sarduana mosi, topasa mosi na emaroda mosi;

¹⁸mu mulonga agumubeji eskabukala mosi, safira mosi na diama mosi,

¹⁹mu mulonga agumurieru opala mosi, agata mosi na amatisa mosi;

²⁰mu mulonga agumuina dusiengi dumosi, onikisa mosi na jaspa mosi. Dimanyi dimanyi diunamugu lora mu mungongu.

²¹Moba yigumi na mamanyi mabeji dedi mosi na miina mabaana bababaala baJacob; mosonugu nana bilimba, dimanyi dimanyi na diina, diwendi rie: miina mayigumi na bifumba bibeji biIsrael.

²²Gukavaga panga tsigeyi tsitindi lora unamiga mfunga jitulu; panga atsimavasu nderi mikudu.

²³Gukavaga milunga mibeji mitindi lora umosi yiari, ususu yiari bimfunga jitulu.

²⁴Gukakotisa mikudu milora mu milinga mieni mibeji amivu o kodu jimfunga jitulu;

²⁵gukasitiyila makodu mamikudu mieni mibeji amivu bivakugulu bibangalu, gukajivaga o yiari yigusu yiyijungi yibuvagulitsi bupagu.

²⁶Gukamuevaga milunga mibeji milora ami gunamiga o kodu tsimfunga jitulu mu mungongu agu gari aguibambini na yijungi yibuvagulitsi bupagu.

²⁷Gukavaga milunga mibeji misusu milora ami gukotisa o tsi bivakugulu bibangalu biyijungi yibuvagulitsi bupagu o gusu bebeji na dinamugulu va julu beleeti jiyijungi yibuvagulitsi bupagu.

²⁸Botunga milunga mimfunga jitulu na milunga miyijungi yibuvagulitsi bupagu na mukudu udumbulu yiri mfunga jitulu jiuba va julu beleeti jiyijungi yibuvagulitsi bupagu na jigorungula ukakuga na jionyi.

²⁹Ava Aaron okotila o Mbura Nsambi obeganga miina mabifumba biIsrael va tulu andi amamasonugu mu mfunga jitulu jibunsonsi nderi yirangumunu va gusu Fumu temu tsiotsu.

³⁰Gukakotisa Urim na Thummim muna mfunga jitulu na biuba va tulu Aaron ava obila va gusu Fumu. Aaron obeganga mambu mabaIsrael va tulu andi temu tsiotsu ava owendilanga va gusu Fumu.

³¹Gukarariga yilinga yiyijungi yibuvagulitsi bupagu, yiotsu yiuba matsanda maboti madumbulu na dumbulu.

³²Gukatoba mbura va gari jiukotisila muru; mbura eni jiumaruku yiari na yiari yiri yilinga yigopasiga.

³³Gukamaruka bibagunu bimilunda migeranada midumbulu na miyinyuru ayivu va gari dumbulu na ubenga na mibenga miuyenasogu na bangunga bageyi balora mu mungongu uyilinga agutsi,

³⁴ngunga mosi jilora na mulunda umosi migeranada, ngunga mosi jilora na mulunda umosi migeranada utsiengila mungongu uotsu uyilinga.

³⁵Aaron oyiduaranga ava osalilanga; ava okotilanga o Mbura Nsambi va gusu Fumu na ava opalilanga; nduku jibangunga jiugulunungu yiri agofu.

³⁶Gukavaga didayi ditindi lora, gukadinamiga muna nana benamiyili yilimba: Ayisonugu rie: Yingitsi yiFumu.

³⁷Gukaditunga na mukudu udumbulu o gusu yiviovi.

³⁸Diuba va mbami Aaron; Aaron obega mabi ama baIsrael bamavaga ava ovagulilanga pagu tsiogu tsiotsu; diubanganga va mbami andi va gusu Fumu ubatsindulila dibumi.

³⁹Gukarariga yijungi yimatsanda maboti; gukarariga dugaba dumatsanda maboti na gukarariga beleeti ajimamaruku.

⁴⁰Gukarariyila baana bababaala baAaron biduaru bibuvagulitsi bupagu: bijungi na babeleeti na biviovi.

⁴¹Ndeʼ Moise gukaduisa muana nguji agu Aaron na baana bandi bababaala wandi. Gukabasinga matsi na gukababiatsa nobaliomisa, jogu bosala yisalu yiami yibuvagulitsi bupagu.

⁴²Gukabarariyila mibati mimatsanda maboti ami boduara udibiga penyi tsiogu, miuba misakama ubandila o dilungu te na mabelu.

⁴³Aaron na baana bandi bababaala bomiduaranga ava bokotilanga o Ndagu Yibenguna vo ava bobambininanga o yinyensulu yipagu uyesala yisalu o Mbura Nsambi; yiri bagoba na mbela na bagofu. Aguna uvu mugaga umutubu ombu Aaron te na bategula bandi wandi.