Read Punu Ukumuga 29 Bible Online

Ukumuga 29 - Punu bible

Ukumuga 29

¹Gulu nana guvayila dubiatsu duAaron na baana bandi bababaala ubakotisa mu yisalu yibuvagulitsi bupagu. Bonga mulumi ngombi na balumi babeji babindombu abagaa na bifu

²na mapa amagaa na dufunusu amamalambu na matsi na mapa mageyi amagaa na dufunusu amamatsatsu matsi; gukavaga motsu mana na fufu jitsangu tsible.

³Gukavaga motsu mana mu yievi ava guvagulila mulumi ngombi na balumi babeji babindombu.

⁴Gukaretsa Aaron na baana bandi bababaala o dikotulu diNdagu Yibenguna; gukababuitsa.

⁵Gukabonga biduaru bibuvagulitsi bupagu noduisa Aaron: yilinga yiyijungi na yijungi na mfunga jitulu na gukamutunga beleeti wandi.

⁶Gukamuduisa yiviovi na gukasakiga dugaba duyingitsi muna yiviovi.

⁷Gukabonga matsi madubiatsu nomawitila va julu muru andi umubiatsa.

⁸Gukanengila baana bandi bababaala na gukabaduisa bijungi.

⁹Gukaduisa Aaron na baana bandi bababaala biviovi nobatungila babeleeti. Yisalu yibuvagulitsi bupagu yiuba yiogu te na mutubu. Anana gukotisila Aaron na baana bandi bababaala o yisalu.

¹⁰Gukabega mulumi ngombi va gusu Ndagu Yibenguna, mbana Aaron na baana bandi bababaala bomusakiga miogu va julu muru.

¹¹Gukatabula muru umulumi ngombi va gusu Fumu va dikotulu diNdagu Yibenguna.

¹²Gukabonga malungu mamulumi ngombi nomasinga na mulembu agu mu masiyi mayinyensulu yipagu, gukapuga malungu amosialulu va tsi yinyensulu yipagu.

¹³Gukabonga matsi motsu mabigari na muvogumbombu aguneni na mipigu miotsu mibeji na matsi amavu muna gukanyensa biotsu bina va yinyensulu yipagu.

¹⁴Tumba misonyi mimulumi ngombi na mukata u-uonyi na mambi gukabinyensa o tsomu dimbu: ajina jivu pagu jiduliomusu dubavagulitsi bupagu.

¹⁵Gukabonga mulumi yindombu agutegaagu Aaron na baana bandi bababaala bosakiga miogu va julu muru.

¹⁶Gukatabula muru umulumi yindombu, gukabonga malungu gukamapuga yiari na yiari biyinyensulu yipagu.

¹⁷Gukasasa mulumi yindombu, gukasusa misopu na bakondu abi gusakiga va julu mapula na muru.

¹⁸Gukanyensa mulumi yindombu uotsu va yinyensulu yipagu; jivu pagu jiunyensa jiFumu ajiusielusunu o muji ajiugulunu mbunga jiboti ombu Fumu.

¹⁹Gukabonga mulumi yindombu agumubeji agu Aaron na baana bandi bababaala bosakiga miogu va julu muru.

²⁰Gukatabula muru umulumi yindombu; gukabonga malungu nomasinga mu mumbimbili udituji dimabaala diAaron na mimbimbili mimatuji mabaana bandi bababaala na mu milembu miogu mibalumi mimakaka mamabaala na mu milembu mibalumi mimakulu mogu mamabaala; gukatsatsa malungu amosialulu yiari na yiari biyinyensulu yipagu.

²¹Gukagomba malungu mamosi amamatsatsu yinyensulu yipagu na matsi madubiatsu gukatsatsa Aaron na biduaru biandi na baana bandi bababaala na biduaru biogu. Anana Aaron na baana bandi bababaala na biduaru biogu biuwakusulu ombu Fumu.

²²Gukabonga matsi mamulumi yindombu agumubeji na muyila na matsi mabigari na muvogumbombu aguneni na mipigu miotsu mibeji na matsi mamipigu na yiasi yikori ayimabaala, mu mbari yivu yindombu yidubiatsu;

²³gukabonga mapa amagaa na dufimusu amavu mu yievi ayivu va gusu Fumu, diwendi rie: dipa digeyi na dipa adimalambu na matsi na dipa digeyi disusu.

²⁴Gukawakisa bima bieni biotsu ombu Aaron na baana bandi bababaala, gukalebiviunsa yiari na yiari va gusu Fumu.

²⁵Mbana gukamuebipatula Aaron na baana bandi bababaala gukabinyensa va yinyensulu yipagu, va julu pagu jiunyensa; ajina jivu pagu jiunyensa ajiusielusunu na muji va gusu Fumu ajiugulunu mbunga jiboti ombu Fumu.

²⁶Gukabonga tulu jimulumi yindombu agumubeji agusalusu mu dubiatsu duAaron, gukajiviunsa yiari na yiari va gusu Fumu: ajina jiuba dikabu diagu.

²⁷Gukaliomisa tulu na kori bimulumi yindombu abiusalusu mu dubiatsu duAaron na baana bandi bababaala, gukaviunsa tulu yiari na yiari nosambula kori.

²⁸Bionyi biAaron na baana bandi bababaala mu mbari divu mugaga umutubu agu baIsrael bokelisanga mu mbari jivu pagu ajimasambulu; mu pagu tsiotsu tsikabusulu tsimaboti tsibaIsrael, pagu atsimasambulu tsiuba tsiFumu atsiuvegu ombu Aaron na baana bandi bababaala.

²⁹Pa Aaron ofu, biduaru biyingitsi abi amaleduaranga, biuba bibaana bandi bababaala ava jogu wogu bosingulu matsi nobiatsu.

³⁰Muana andi udibaala aguba yivunda yibavagulitsi bapagu va yivinga yiandi, oduara biduaru bieni yisambuali yibilumbu ava okotila o Ndagu Yibenguna noyesala yisalu o Mbura Nsambi.

³¹Gukabonga mulumi yindombu udubiatsu agumubeji na gukalamba nyama o Mbura Nsambi.

³²Aaron na baana bandi bababaala boji nyama tsieni na mapa amoba mu yievi va dikotulu diNdagu Yibenguna.

³³Kabogu jogu boji abiuvagulu utsindula dibumi ava bobiatsulu na ava bokwakusulu. Mutu ususu ayabiji mu mbari bionyi bivu yingitsi.

³⁴Pa vosiala nyama vo mapa bidubiatsu abi gusuega te na kedi, gukabinyensa; bigomueligu mu mbari bivu biNsambi.

³⁵Gukakipa motsu mana ama nyigurumi mu diambu didubiatsu duAaron na baana bandi bababaala, gukadivaganga te na yisambuali yibilumbu ubakotisa mu yisalu.

³⁶Yilumbu na yilumbu guvagulanga mulumi ngombi upagu jiduliomusu utsindula dibumi na jionyi guliomisanga yinyensulu yipagu na guyitsatsa matsi uyikwakisa.

³⁷Mu yisambuali yibilumbu guvagulanga pagu utsindula dibumi ukwakisa yinyensulu yipagu; adina diulasa yiri yinyensulu yipagu yivu tindi yingitsi na biotsu abiuyibemba wandi.

³⁸Yilumbu na yilumbu te na mutubu abi guvagulanga va yinyensulu yipagu abibi: baana babeji babindombu abakavu yilima yimosi.

³⁹Gukavagulanga yindombu ayitega kedi, ayimubeji tsisiga.

⁴⁰Gukavagulanga yindombu ayitega na yietsu yimosi mu digumi yifufu ayiulambu na mbuta mosi na ditingi jimatsi maoliva na pagu jiunu, diwendi rie: mbuta jimosi na ditingi jimalamu.

⁴¹Gukavagulanga yindombu ayimubeji ava tsisiga na pagu jitsangu na pagu jiunu, diwendi rie: dedi mosi na aji kedi; ajina la pagu ajiusielusunu na muji ajiugulunu mbunga jiboti ombu Fumu.

⁴²Te na mutubu jenu na bategula benu duvagulanga pagu ajiunyensungu va dikotulu diNdagu Yibenguna va gusu Fumu: avana nyubengunina nenu na nyuvosa nagu.

⁴³Avana nyubengunina na baIsrael va mbura jiyingitsi ajiubasa na bundumba buami.

⁴⁴Nyuvaga dubiatsu duNdagu Yibenguna na duyinyensulu yipagu; nyubiatsa Aaron na baana bandi bababaala yiri bonsalila yisalu yiami yibuvagulitsi bupagu.

⁴⁵Nyutsananga na baIsrael na nyubanganga Nsambi ogu.

⁴⁶Mbana bojaba yiri menu nyivu Fumu, Nsambi ogu agumabapalisa o bulongu buEgypte, aguitsaningi nogu. Menu la Fumu Nsambi ogu.