Read Punu Ukumuga 3 Bible Online

Ukumuga 3 - Punu bible

Ukumuga 3

¹Moise amakelisanga bindombu na binsabi biboji buandi Jethro, agumaba muvagulitsi upagu uMadian. Yilumbu yimosi amabega migamba o yiari yina yikumu, amatola o mukongu uNsambi o Horeb.

²Avana yiansa yiFumu yimalabinina nandi mu mulutsu muji agumalula mu yivala. Moise amalaba yivala yiotsu yika muji na muji, tumba yisamasiegalana.

³Moise anolaba yimaga yieni amatsiengila yivala mbana amakewivula rie: Dibandu yi yivala yigenyengili?

⁴Fumu anolaba yiri Moise utsiengila etsiengili yivala, amamunengila o gari yivala rie: Moise! Moise! Amawagula rie: Meʼ janduʼgu!

⁵Fumu amavosa rie: Guyabambana gunu, vula bapondu bagu! Avana guvu la mbura yingitsi.

⁶Mbana amabuela rie: Menu la Nsambi bataji bagu: Nsambi Abraham na Nsambi Isaac na Nsambi Jacob. Moise amakubiga yinsi mu mbari amalaba goma ugengila Nsambi.

⁷Fumu amavosa rie: Nyimalaba dikuana dibatu bami abavu o Egypte, nyimagulu migamu mibaIsrael ava bango bukisi bebadimbuli. Nyiina, nyilabi maguga mogu.

⁸Nyimasunduga ubawaka kalala ombu bisi Egypte, nobapalisa o bulongu bueni ubabega o bulongu abuboti na buneni, abuvu na digumba, o malongu ama bisi Canaan na baHitt na baAmor na baPerizie na baHivie na baJebusie betsanini.

⁹Meʼ rie: Migamu mibaIsrael mimagulunu te nʼombu gami na nyimalaba dikuana adi bisi Egypte bebakuani,

¹⁰Namunyi nyigusindiyi ombu Pharaon. Wenda yepalisa batu bami, baIsrael o Egypte. Nsambi ujabisa ejabisi Moise diina diandi.

¹¹Moise amawivula Nsambi rie: Je menu nyivu uwelimina uwenda ombu Pharaon uyepalisa baIsrael o Egypte?

¹²Nsambi amavosa rie: Nyiina! Nyuba nagu; adina diugulasa yiri menu nyigusindiyi: disusu gunomana upalisa baIsrael o Egypte, dusalila Nsambi va julu mukongu egugu.

¹³Moise amagabusila Nsambi rie: Kabogu yika ombu baIsrael nyiwendi, nyubatsingula rie: Nsambi bataji benu atsinsindiga ombu genu. Tumba pa bokwivula rie: Diina diandi yi? Diina yi nyubatsingula?

¹⁴Nsambi amawagula Moise rie: Menu la Jandi Ojivu! Mbana amabuela rie: Anana guwagulila baIsrael rie: Jandi oyinengulu Menu Nyivu amansindiga ombu genu.

¹⁵Nsambi amamuetsingula Moise rie: Gukatsingula baIsrael nana rie: Fumu amansindiga ombu genu aguvu Nsambi bataji benu: Nsambi Abraham na Nsambi Isaac na Nsambi Jacob. Adina la diina diami, la diina adi bonsambililanga te na kula tsiotsu.

¹⁶Wenda yegukiga bivunda biIsrael, nobatsingula rie: Fumu aguvu Nsambi bataji benu, Nsambi Abraham na Nsambi Isaac na Nsambi Jacob amalabana nami. Amavosa rie: Nyimadulaba, nyimalaba ama beduvayi o Egypte,

¹⁷amavosa rie: Nyudugusula o Egypte agu duilabili maguga, udubega o malongu ama bisi Canaan, na baHitt na baAmor na baPerizie na baHivie na baJebusie betsanini, malongu amavu na digumba.

¹⁸BaIsrael bodedila diufi diagu. Jenu na bivunda biIsrael dukawenda ombu kaga jiEgypte, dukamutsingula rie: Fumu aguvu Nsambi baHebreu, aguvu Nsambi etu amalabana netu. Tusingisi ubonga bilumbu birieru biuwendila o kumu, uyevagulila Fumu Nsambi etu pagu tsiunyensa.

¹⁹Nyijabi yiri kaga jiEgypte agodusingisa uwenda, te na mangolu mosalusu.

²⁰La dibandu nyusalisila mangolu mami ulasa bisi Egypte minongu na minongu mibimaga abi nyuvaga va gari ogu. Va julu vana odusingisa uwenda.

²¹Nyusalisa maboti mabisi Egypte yiri ava duwendila, dugowenda miogu na miogu.

²²Kadi mugetu uIsrael owivula mugetu nandi umuisi Egypte bima bilora jivema na bima bilora na biduaru abi duduisa baana benu bababaala na babagetu. Anana dukindila bisi Egypte.