Read Punu Ukumuga 30 Bible Online

Ukumuga 30 - Punu bible

Ukumuga 30

¹Gukagomina yinyensulu yibima bimbunga jiboti na tsimbi tsiakasia.

²Usakama na uroga uyionyi uba magumaranu masantimetera: na yirela yiyionyi yiuba metera mosi. Gukavaga masiyi amoba yibuku yimosi na yinyensulu yibima bimbunga jiboti.

³Gukayinamiga tindi lora nesi va julu nesi va migula yiari na yiari nesi mu masiyi, gukayinamiga lora va mungongu.

⁴Gukayivayila milunga mina milora muna mungongu; mibeji mibeji yiari na yiari. Gukanamiga milunga mieni yiari na yiari, amina miukotusulu manguangu uyinangulila.

⁵Gukavaga manguangu meni ma-akasia, mbana gukamanamiga lora.

⁶Gukasunsa yinyensulu yibima bimbunga jiboti va gusu dumbu dudugabu aduvu bebeli na yigara yipangini va nsungisini na yidibutsu ayivu yitsiga yiyingeba ayivu va julu yigara yipangini, avana nyubengunina nagu.

⁷Aaron oyinyensila bima bimbunga jiboti; obinyensanga kedi tsiotsu ava oliomisila balambi;

⁸ava tsisiga ava obangisila balambi onyensa bima bimbunga jiboti wandi. Avana onyensilanga bima bimbunga jiboti; va gusu Fumu mutubu te na kula tsiotsu.

⁹Va yinyensulu yieni guyavagulanga bima bimbunga jiboti bingana; nesi pagu tsiunyensa, nesi pagu jitsangu nesi pagu jiunu.

¹⁰Temu mosi mu yilima Aaron osalisa malungu mapagu jiutsindula dibumi va masiyi mayinyensulu yipagu uyiliomisanga, notsindulanga dibumi. Otsindulanga dibumi temu mosi mu yilima te na kula tsiotsu; yinyensulu yieni yiuba tindi yingitsi va gusu Fumu.

¹¹Fumu amatsingula Moise rie:

¹²Ava gurangila baIsrael ubasansama, mutu mutu ofuta dumandu dujaʼ beni ombu Fumu yiri yivunga yigobabemba ava bosansumunu.

¹³Atsi batu abosansumu bofuta atsitsi: mutu mutu ofuta garama yiranu tsimbongu atsimaba dedi na mbongu atsimasalusu o Mbura Nsambi; atsiugusululu Fumu.

¹⁴Babaala botsu abosansumu, ubanda na abakavu na magumabeji mabilima ne uviolila bofuta atsimagusululu Fumu.

¹⁵Yisina agofuta uviolila, yijaga agodiamusulu dufunu adugusululu Fumu ukekobula.

¹⁶BaIsrael bakaguvega mbongu tsidumandu dueni, gukatsikotisa mu yisalu yiNdagu Yibenguna. Mbana nyurangiminanga baIsrael nobakelisanga.

¹⁷Fumu amatsingula Moise mambu memama rie:

¹⁸Gukabumba nsienga jikunga na dikutu dijionyi dikunga ajiugolululungu; gukajisunsa va gari Ndagu Yibenguna na yinyensulu yipagu; mbana gukajibasa mamba,

¹⁹amuna Aaron na baana bandi bababaala bogolililanga nesi makaka nesi makulu.

²⁰Mbe basakakota o Ndagu Yibenguna bolegolilanga mamba meni yiri bagofu ava bobambinina na yinyensulu yipagu usala yisalu novagulila Fumu pagu.

²¹Bogolila nesi makaka nesi makulu yiri bagofu. Aguna uvu mugaga umutubu ombu Aaron na baana bandi bababaala na bategula bogu.

²²Fumu amatsingula Moise rie:

²³Bonga bima biebibi bimbunga jiboti: kilu yiranu tsimamba mamira, kilu beji na yibuku tsikanela, dedi mosi tsiroso,

²⁴kilu yiranu tsikasa; biotsu bina bimapitsu na yietsu yiMbura Nsambi; va mosi na mbuta yisiamunu tsimatsi maoliva.

²⁵Na biotsu bina gukavaga matsi mayingitsi madubiatsu, mavu mafubi amamafubusunu na muvayitsi umiyombu na buketi buandi; anana matsi mayingitsi madubiatsu mofubununu.

²⁶Gukamasinga Ndagu Yibenguna na yigara yipangini

²⁷na tavula na bisalulu bijionyi biotsu na dingasa na bisalulu bidionyi biotsu na yinyensulu yibima bimbunga jiboti

²⁸na yinyensulu yipagu na bisalulu biyionyi biotsu na nsienga na dikutu dijionyi.

²⁹Gukakwakisa bima bieni na biuba tindi yingitsi na botsu abobibemba wandi.

³⁰Gukabiatsa Aaron na baana bandi bababaala na matsi mayingitsi ubakwakisa yiri bonsalila bisalu biami bibuvagulitsi bupagu.

³¹Gukatsingula baIsrael rie: Amana moba matsi mayingitsi madubiatsu duami te na mutubu.

³²Bayamagotsa mutu na bayavaga mafubi mamunongu eni amavu na bietsu bieni; mavu yingitsi, magengilianu yingitsi.

³³Mutu uotsu aguvaga mafubi meni vo umagotsa muenyi agusulu va gari batu bandi.

³⁴Fumu amatsingula Moise rie: Bima bimbunga jiboti abi gusalisa abibi: sataketa na ongala na galbanuma. Yima yima yiuba yietsu yimosi abiusobunu na yietsu yimosi yibima bimbunga jibod bisusu.

³⁵Gukafubana biotsu bina uvaga bima bimbunga jiboti abiukunsu na buketi bumuvayitsi umiyombu; biusobunu musayi na biuba tindi yingitsi.

³⁶Gukabifulisa na gukabikuka va gusu yigari yipangini o gari Ndagu Yibenguna, avana nyubengunina nagu. Abina biuba tindi yingitsi yienu.

³⁷Duyakevayila bima bimbunga jiboti bimunongu eni abivu na bietsu bieni; bigengilianu yingitsi, bivu biFumu pinsa.

³⁸Jandi agukevayila bima bimbunga jiboti jimunongu eni ufuimbana agusulu va gari batu bandi.