Read Punu Ukumuga 31 Bible Online

Ukumuga 31 - Punu bible

Ukumuga 31

¹Fumu amatsingula Moise rie:

²Jaba yiri nyimasola Bessalel muana dibaala uOuri muana dibaala uHour muisi Juda.

³Nyimamubasa na Yinyunyi yiami na diela na dujabu na buketi buminongu miotsu mibisalu.

⁴Nyimamuvega diela usala bisalu abi batu mbe basakasala, diwendi rie: usala lora na lora jivema na kunga

⁵na nyimamuvega diela ubaka mamanyi nopaka miri udugusu bisalu biminongu na minongu.

⁶Na nyimamusolila Oholiab uba muwamusi andi, muana dibaala Ahissamak mu yifumba yiDan. Nyimabavega diela na buketi yiri bosala biotsu abi nyimaguruma.

⁷Diwendi rie: Ndagu Yibenguna na yigara yipangini na yidibutsu ayivu yitsiga yiyingeba na bisalulu biotsu biNdagu Yibenguna;

⁸na tavula na bisalulu bijionyi biotsu na dingasa dilora na bisalulu bidionyi na yinyensulu yibima bimbunga jiboti;

⁹na yinyensulu yipagu na bisalulu biyionyi biotsu na nsienga na dikutu dijionyi;

¹⁰na biduaru biyisalu na biduaru bibuvagulitsi bupagu biAaron abivu yingitsi na biduaru bibaana bandi bababaala bibuvagulitsi bupagu;

¹¹na matsi mayingitsi madubiatsu na bima bimbunga jiboti biMbura Nsambi. Abesali bisalu biebibi vengu bodedila maruma motsu ama nyimaguruma.

¹²Fumu amatsingula Moise rie:

¹³Tsingula baIsrael rie: Duyabusa ukelisa yilumbu yiami yitsona mu mbari ayina yiuba va gari jetu nenu na bategula benu yilimba ayiujabisa yiri nyivu Fumu aguiduliomisi.

¹⁴Dukelisanga yilumbu yitsona, duyiyitsanga, yivu tindi yingitsi. Jandi aguyisumuna aboku; agusala ne mua bisalu mu yilumbu yieni agusulu va gari batu bandi.

¹⁵Bosalanga mu bilumbu bisiamunu; tumba yilumbu yimusambuali yivu yitsona, yilumbu yiuvumina, ayivu yiami, agusala mua bisalu yilumbu yieni aboku.

¹⁶BaIsrael bokelisanga yilumbu yitsona boyiyitsanga jogu na bategula bogu na yiubaganga nderi pangini jimutubu.

¹⁷Ayina yiuba nana yilimba ayiutsinga mutubu va gari jetu na baIsrael; mu mbari mu bilumbu bisiamunu menu Fumu nyimasalila julu na butamba mbana yilumbu yimusambuali nyimadunda bisalu na nyimavuma.

¹⁸Ava Fumu amamanina uvosa na Moise o julu mukongu uSinai amamuvega mamanyi mabeji mamigaga amamasonugu na Nsambi jaʼ beni.