Read Punu Ukumuga 32 Bible Online

Ukumuga 32 - Punu bible

Ukumuga 32

¹BaIsrael banolaba yiri Moise amatsinga o julu mukongu bamawenda ombu Aaron na bamamulenda rie: Tuvayili nsambi ajiuwenda va gusu etu mu mbari Moise eni, dibaala dieni adimatupalisa o bulongu buEgypte, tugejabi adikavu nandi.

²Aaron amabaruma rie: Vulanu bipunga bilora abivu mu matuji mabagatsi benu na mabaana benu, dukabimbeyila.

³BaIsrael botsu bamavula bipunga bilora na bamayebivega Aaron.

⁴Jandi amabibonga na anobisulumusa, amasalisa diela ubikitula muana ngombi. Kabogu baIsrael bamagamuga rie: Labanu nsambi etu ajimatupalisa o bulongu buEgypte!

⁵Ava Aaron amajilabila, amarunga yinyensulu yipagu na va gusu jionyi amagamuga rie: Mugesa voba feta jiuyitsila Fumu!

⁶Bamarelama muna kedi na bamavagula pagu tsiunyensa na pagu tsikabusulu tsimaboti. Batu bamatsana ujanganga nonuanganga na bamayinanga.

⁷Fumu amaruma Moise rie: Gabuga; batu bagu aba gumapalisa o bulongu buEgypte bamakebivisa.

⁸Bamasundila usila nsila aji nyimabalonsa, bamakevayila muana ngombi ulora na bamagukutimina noguvagulila pagu na bamavosa rie: Labanu nsambi etu ajimatupalisa o bulongu buEgypte.

⁹Fumu amatsingula Moise rie: Nyilabi yiri batu bebaba bavu mimbini.

¹⁰Ndundi, nyubalasa kabu ami nobasielasana tumba nyugufunisila bategula te na guba dilongu dineni.

¹¹Moise amalenda Fumu Nsambi andi rie: Fumu, dibandu yi gulasila batu bagu kabu agu? Batu aba ndeʼ beni gumapalisa o bulongu buEgypte na mangolu magu maneni.

¹²Guyarombisa bisi Egypte uvosa rie: Amabapalisa o bulongu buetu uyebalasa maguga nobaboka o mikongu nobatsiemusa utsiemusa uotsu. Kokolu Fumu, gabusa murima agu nsima na guyamuekilisa batu bagu.

¹³Rangimina Abraham na Isaac na Jacob, basalitsi bagu aba ndeʼ beni gumalevila pesi ejiji rie: Nyufunisa bategula benu nesi uviolila bambuelili na nyuvega bulongu abu nyimavangana nogu ombu bategula bogu, buonyi buba nogu te na mutubu.

¹⁴Mbana Fumu amagabusa murima nsima mu diambu dimukilu agu mbe amabakilisa.

¹⁵Moise amasunduga na mamanyi mabeji mamigaga amamasonugu yiari na yiari.

¹⁶Mamanyi meni mamaba yisalu yiNsambi jaʼ beni na bisonu bimaba biNsambi abimabaku va mamanyi.

¹⁷Josue anogulu migamu mibatu amatsingula Moise rie: Ami tuigulu tsiri nduku jidivita?

¹⁸Moise amawagula rie: Ami tuigulu tsiri migamu miulunga vo ubetsu; yika uwimbila bewimbili.

¹⁹Ava bamatolila va tsomu milaku Moise amalaba muana ngombi na mayinu, kabu andi jimamata te na amabuaga mamanyi amamaba nandi, mamabuliga vana banda mukongu.

²⁰Mbana amabonga muana ngombi agu bamavaga; amagunyensa, amagukalusa dibufu, amapuga dibufu dieni mu mamba na amamanuisa baIsrael.

²¹Moise amawivula Aaron rie: Diambu yi batu bebaba bamaguvayila te na gumabasingisa uvaga dibi dineni nana?

²²Aaron amawagula rie: Kokolu tsiagu guyanyoga, ndeʼ beni guijabi nana batu bebaba besundila uvaga mabi.

²³Bamatuma rie: Tuvayili nsambi ajiuwendanga va gusu etu mu mbari Moise eni, dibaala dieni adimatupalisa o bulongu buEgypte tugejabi adikavu nandi.

²⁴Nyimavosa rie: Jenu aduvu na lora jibeyianu! Bamajibeyila; nyimajibuaga o muji na jimapala muana ngombi.

²⁵Moise amalaba yiri batu bamakevega uvaga dimbunga na Aaron amabasingisa uvaga diambu adimabarombisa uba kwaku ombu batu abamabavina.

²⁶Moise amaretsama va tsomu milaku, amagamuga rie: Abavu baFumu batasunu! Bisi Levi botsu bamamurasuna.

²⁷Amabatsingula rie: Fumu Nsambi Israel jandi rie: Mutu mutu abongi dijenga diandi uyenalinganga o tandu te no banda uyenabokanga, nesi muana nguji andi udibaala nesi taji andi.

²⁸Bisi Levi bamavaga adi Moise amabaruma, bebeli na tosini yirieru tsibaIsrael barnafu muna yilumbu yieni.

²⁹Moise amavosa nogu rie: Namunyi dumakevega tindi ukevega ombu Fumu: ava dumasingila uboka nesi baana benu nesi baana banguji benu bababaala. Fumu adugabili miuia.

³⁰Ava kedi Moise amatsingula batu rie: Dumavaga dibi dineni. Yika uweʼ nyiwendi ombu Fumu tanguji osingila kokolu jidibi dienu.

³¹Moise amagabuga ombu Fumu na amavosa rie: Kokolu tsiagu, batu beni bamavaga dibi dineni. Bamakevayila nsambi jilora.

³²Batandi dibi diogu! Pa tsiri nana, tsindula diina diami adi gumasona mu dibuku diagu.

³³Fumu amatsingula Moise rie: Tsiri nana, nyutsindula diina dijandi agumavaga dibi.

³⁴Kabogu wenda yenabega batu agu nyimagulonsa. Yiansa yiami owendanga va gusu agu tumba yilumbu ayi nyusola nyugabusila pila, nyubakilisa mu diambu didibi diogu.

³⁵Fumu amakilisa baIsrael mu mbari bamawivula Aaron ubavayila muana-ngombi ulora.