Read Punu Ukumuga 33 Bible Online

Ukumuga 33 - Punu bible

Ukumuga 33

¹Fumu amaruma Moise rie: Sogamanu, jenu na batu aba gumapalisa o bulongu buEgypte. Wendanu o bulongu abu nyimavangana uvega Abraham na Isaac na Jacob ava nyimavosila rie: Nyubuvega bategulabenu.

²Nyusindiga yiansa o gusu agu na nyubinga bisi Canaan na baAmor na baHitt na baPerizie na baHivie na baJebusie.

³Wendanu o bulongu bueni abuvu na digumba tumba ngoweʼ nenu, jenu mimbini; diurungula uba nyudusielasana mu nsila.

⁴Ava batu bamaguluiu mambu meni maranga bamamuenyonga tindi unyonga, botsu bamavula kembu tsiogu.

⁵Fumu amatsingula Moise rie: Tsingula baIsrael rie: Jenu duvu mimbini! Pa nyulinga nenu diurungula uba nyudusielasana. Vulanu kembu tsienu mbana nyujaba adi nyuduvayila.

⁶BaIsrael bamavula kembu tsiogu ava bamakakinina na mukongu uHoreb.

⁷Ava baIsrael bamabalilanga milaku, Moise amabonga ndagu tsanda, amakakana nana vava na vana na milaku na amajirangiga; amajinengila Ndagu Yibenguna. Botsu abamaronda umoga na Fumu bamawendanga o yiari yiNdagu Yibenguna ajimaba jikakusunu na milaku.

⁸Ava Moise amawendilanga o Ndagu eni batu botsu bamabanganga diteli, mutu mutu va dikotulu dindagu andi te na Moise amakota o Mbura Nsambi.

⁹Ava Moise amakotila o Ndagu, dimungi dimasunduga na dimasikama va dikotulu diNdagu Yibenguna na Fumu amamoga na Moise.

¹⁰BaIsrael banolaba dimungi dimasikama va dikotulu diNdagu Yibengupa bamagudama, mutu mutu va dikotulu dindagu andi.

¹¹Anana Fumu amavosila na Moise kiakiaki, diwendi rie: nana mutu evosili na mbatsi andi. Mbana Moise amagabuga o milaku tumba mufudu agumasala nandi, Josue muana dibaala uNoun amatsananga o Ndagu Yibenguna.

¹²Moise amatsingula Fumu rie: Ndeju guitumi rie: Palisa batu bebaba! Tumba ndeʼ beni gukansingula anyi owenda netu. Diuleba gumavosa nami rie: Nyijabi diina diagu na gumadila maboti mami.

¹³Pa namunyi nyilasu maboti magu kabogu njabisa amagu mbana nyugujaba na nyujaba maboti magu wandi. Rangimina yiri batu bebaba bavu batu bagu.

¹⁴Fumu amawagula rie: Meʼ beni nyuwendanga nagu na nyuguwamusanga.

¹⁵Moise amamutsingula rie: Pa ndeʼ beni gugowenda netu guyatugusula vava.

¹⁶Tsie nyusunsila murima yiri jetu na batu bagu tulaba maboti magu? Tsie batu basusu bojabila duviakusunu va gari jetu nogu?

¹⁷Fumu amatsingula Moise rie: Nyuvaga adi guikwivuli mu mbari nyilabi ubueji nagu na nyijabi diina diagu.

¹⁸Moise amavosa rie: Ndasi bundumba buagu.

¹⁹Fumu amavosa rie: Nyuviosa maboti mami motsu va gusu agu na nyutubula tindi diina diami rie: Fumu. Nyuvaga maboti ombu agu nyirondi uvaga maboti na nyulasa yingeba ombu agu nyirondi ulasa yingeba.

²⁰Ne nana ngogusingisa undaba mu mbari mutu uotsu agundaba ofu.

²¹Fumu amamuevosa rie: Laba va mbura bebeli nami, gukayimata va julu dimanyi.

²²Ava bundumba buami buvioyila nyugukotisa o yibodongi ayivu mu dimanyi na nyugukubiga na dikaka diami te na nyimavioga.

²³Mbana nyugusula dikaka diami na gundabilila yinsinsima tumba yinsi yiami yigogengulu.