Read Punu Ukumuga 34 Bible Online

Ukumuga 34 - Punu bible

Ukumuga 34

¹Fumu amaruma Moise rie: Paka mamanyi mabeji nana ama gumabuaga, nyumuesona mambu amamaba va mamanyi matega.

²Gukaba ukunsama muna kedi gukamata o julu mukongu uSinai, avana gubengunina nami o julu mukongu.

³Mutu ayamata nagu na vayaba ne mutu mosi va julu mukongu nesi bindombu nesi binsabi nesi bangombi bayabambana ne ubambana o mukongu egugu.

⁴Moise amapaka mamanyi mabeji nana matega. Amarelama muna kedi uwenda o julu mukongu uSinai nana Fumu amamurumina, amayenabega mamanyi meni mabeji.

⁵Fumu amasunduga va gari dimungi na amasikama bebeli nandi na amatubula diina rie: Fumu.

⁶Fumu amavioga va gusu andi nogamuga rie: Nyivu Fumu! Nyivu Nsambi aguvu na yingeba na murima udeda agugaa na yifutsu na avu abasa na durondu na avu asigama,

⁷aguilasingi durondu duandi te na tosini jikula, aguitandi mabi na bumbini na masumu tumba ageveyi ndunga ombu bango mbela. Nyikilisingi baana mu diambu dimabi mabataji bogu te na kula jimurieru vo jimuina.

⁸Vana vana Moise amagudama va tsi uyitsa Fumu.

⁹Amavosa rie: Fumu pa nyimalasu maboti magu, kokolu wenda netu mu mbari batu bebaba bavu mimbini; tutandi mabi metu na masumu metu na tusingisi uba batu bagu.

¹⁰Fumu amawagula Moise rie: Nyuvangana pangini nagu. Nyuvaga bimaga abisakalabana ne o bulongu bumosi nesi o yiari yisusu; nyubivaga va misu mabatu bagu yiri bogengila yisalu yiFumu. Diwendi rie: Mu ndeju nyudugusulu mambu mami maneni.

¹¹Kelisa ama nyigurumi namunyi. Nyugubingila baAmor na bisi Canaan na baHitt na baPerizie na baHivie na baJebusie.

¹²Kebana guyavangana pangini na bisi bulongu abu gukota yiri bakegurambila murambu.

¹³Tumba dukapansa binyensulu biogu bipagu noberusa bitumba biogu nobula bakosi bogu.

¹⁴Guyagudama va gusu nsambi jisusu mu mbari diina diFumu divu Diwavi, avu Nsambi aguvu na diwavi.

¹⁵Kebana, guyavangana pangini na bisi bulongu mu mbari gukenamu muinsi ubansambi bogu nobavagulila pagu na bakegunengila o uyeji nyama tsipagu tsiogu.

¹⁶Guyawetsa baana bagu bababaala na baana bogu babagetu abamabasa na bupumbi bumiyitsa miogu, bakebivisa baana bagu bababaala na bansambi bogu.

¹⁷Guyavaga bansambi babudilu.

¹⁸Gukakelisa feta jimapa amagaa na dufunusu; mu yisambuali yibilumbu na mu temu ajimakunsu mu tsungi nsumbi gujanganga mapa amagaa na dufunusu nana nyimagurumina mu mbari gumapalila o Egypte mu tsungi eni.

¹⁹Tsomi tsiotsu atsiami nesi balumi babibulu diwendi rie: tsibangombi nesi tsibindombu nesi tsibinsabi.

²⁰Gukakobula tsomi buru na yindombu vo yinsabi; pa gugejikobuli gukajitsungula va dilanga dikodu. Mu diambu dibaana bababaala gukakobula tsomi tsiagu tsiotsu. Mutu ayalabana nami miogu na miogu.

²¹Gukasalanga yika bilumbu bisiamunu, guvuma yilumbu yimusambuali; nesi va temu jiufutsa nesi va temu jidutsonsugu.

²²Ava disukusulu diyilima gukavaga feta jibatsona na jibiumanga bitsangu tsible na jidutsonsugu.

²³Kumbu yirieru yilima na yilima babaala botsu bokelasa va gusu Fumu Nsambi Israel.

²⁴Nyubinga bisi malongu va misu magu na nyujeyisa mandilu magu na mutu agogupatula bulongu ava gumatila uyekelasa ombu Fumu Nsambi agu kumbu yirieru yilima na yilima.

²⁵Guyasobana mapa amavu na dufunusu na malungu mayibulu ayimapagululu pagu jiduyitsu; pa guji mulambu ufeta Paque guyasuega yima te na kedi.

²⁶Gukabega milunda miumanga o Ndagu Fumu Nsambi agu. Guyalamba muana yinsabi mu dile dunguji andi.

²⁷Fumu amaruma Moise rie: Sona mambu meni mu mbari mavu dibandu dimambu ama nyimavangana pangini na jenu na baIsrael.

²⁸Moise amaba vana na Fumu magumana manyangu na magumana mamikolu tsiri uji biguji nesi unu mamba. Fumu amasona mambu mapangini va mamanyi, diwendi rie: yigumi yimigaga.

²⁹Moise amasunduga mukongu uSinai na mamanyi mabeji mamigaga: ava amasunduyila mukongu asamajaba yiri yinsi yiandi yimalula mu mbari amavosa na Nsambi.

³⁰Tumba Aaron na baIsrael botsu ava bamalabilila Moise bamalaba yiri yinsi yiandi ulula yiluli na basamarungula ubambana nandi.

³¹Moise amanengila Aaron na bivunda biotsu bidibuli; bamamurasuna na jandi amavosa nogu.

³²Va julu vana baIsrael botsu bamamurasuna; amabatsingula maruma motsu ama amadilila ombu Fumu o julu mukongu uSinai.

³³Moise anomana uvosa nogu amakubiga yinsi yiandi na tsanda.

³⁴Ava Moise amakotilanga ombu Fumu uyevosa nandi amagusulanga tsanda eni te na amapala; ava amapalilanga amatsingulanga baIsrael ama amarumungu.

³⁵BaIsrael bamagengila yinsi yiMoise na bamalaba yiri yimalula na Moise amakubiganga yinsi yiandi te na amakotanga uyevosa na Fumu.