Read Punu Ukumuga 35 Bible Online

Ukumuga 35 - Punu bible

Ukumuga 35

¹Moise amanengila dibuli diotsu dibaIsrael nobatsingula rie: Guluanu ama Fumu erumi:

²Dusalanga bilumbu bisiamunu tumba yilumbu yimusambuali yiuba yingitsi yienu, yivu yitsona, yilumbu yiFumu yiuvumina, agusala mua bisalu mu bilumbu bieni aboku.

³Duyabangisa ne ubangisa miuji o mandagu menu mu yilumbu yitsona.

⁴Moise amavosa na dibuli diotsu dibaIsrael rie: Guluanu ama Fumu erumi:

⁵Guluanu pagu tsibima bieni biotsu abi duvega ombu Fumu, mutu uotsu aguirondi uvega ovagulila Fumu pagu tsietsitsi: lora na lora jivema na kunga;

⁶matsanda maboti madumbulu na mayinyuru ayivu va gari dumbulu na ubenga na mabenga na mionyi mibinsabi;

⁷na mikata mibalumi babindombu amimabensu na mikata mibinsabi; na tsimbi tsiakasia;

⁸na matsi madingasa na bima bimbunga jiboti na matsi madubiatsu na miyombu;

⁹na mamanyi maonikisa na mamanyi masusu ubuejisila yijungi yibuvagulitsi bupagu na mfunga jitulu.

¹⁰Botsu abavu na buketi baruyi uyidugusu motsu ama Fumu amaruma:

¹¹Ndagu Nsambi na biotsu abiusalusu muna: ndagu tsanda na mfunga na mapengana na tsimbi na manguangu na makutu na mabandu;

¹²na yigara yipangini na manguangu mayionyi na yidibutsu ayivu yitsiga yiyingeba na dumbu dudugabu aduvu bebeli na yigara yipangini;

¹³na tavula na manguangu majionyi na bisalulu bijionyi biotsu na mapa mapagu;

¹⁴na dingasa na bisalulu bidionyi na balambi badionyi na matsi madingasa;

¹⁵na yinyensulu yibima bimbunga jiboti na manguangu mayionyi na matsi madubiatsu na bima bimbunga jiboti na matsanda madikotulu diNdagu Nsambi

¹⁶na yinyensulu yipagu na tasi jikunga na manguangu mayionyi na bisalulu biyionyi biotsu na nsienga na dikutu dijionyi;

¹⁷na matsanda madulombili na makutu maduonyi na mabandu maduonyi na matsanda madikotulu didulombili

¹⁸na makutu mageyi maNdagu Nsambi na makutu mageyi madulombili na mikudu mimonyi na biduaru biusalila o Mbura Nsambi

¹⁹na biduaru biyingitsi biAaron muvagulitsi upagu na biduaru bibaana bandi bababaala biyisalu yibuvagulitsi bupagu.

²⁰Kabogu dibuli diotsu dibaIsrael bamasila Moise.

²¹Botsu abamaronda tindi uronda na abamakewimina bamawenda na pagu atsi bamavega Fumu mu yisalu yiNdagu Yibenguna na bisalulu biyionyi biotsu na biduaru biyingitsi.

²²Babaala bamawenda na bagetu wandi, botsu abamaba na mirima uwakisa Fumu pagu, bamabega bipunga na milunga na mioru na bapanga na minongu miotsu mibima bilora, mutu mutu amabega pagu tsilora atsi amawakisa ombu Fumu.

²³Botsu abamaba na matsanda maboti madumbulu na mayinyuru ayivu va gari dumbulu na ubenga na mabenga na mionyi mibinsabi na mikata mibalumi babindombu amimabensu na mikata mibalumi babinsabi, bamabibega.

²⁴Botsu abamasambula pagu jilora jivema na kunga bamajivega uyitsa Fumu. Botsu abamaba na tsimbi tsiakasia atsimaba tsiwelimina na yisalu, bamatsibega.

²⁵Bagetu botsu abamaba na buketi bamabuanga matsanda maboti na bamamabega, diwendi rie: matsanda madumbulu na mayinyuru ayivu va gari dumbulu na ubenga na mabenga.

²⁶Bagetu botsu abamaba na buketi bamabuanga mionyi mibinsabi.

²⁷Bivunda bamabega mamanyi maonikisa na mamanyi masusu ubuejisila yijungi yibuvagulitsi bupagu na mfunga jitulu;

²⁸na bima bimbunga jiboti bimunongu na munongu na matsi madingasa na matsi madubiatsu.

²⁹BaIsrael botsu nesi babaala nesi bagetu abamaronda uvega yima uwamusa na yisalu ayi Fumu amaruma Moise, bamavagulila Fumu pagu tsitondini.

³⁰Moise amatsingula baIsrael rie: Jabanu yiri Fumu amasola Bessalel muana dibaala uOuri muana dibaala uHour muisi yifumba yiJuda.

³¹Amamubasa na Yinyunyi ayiruyili ombu Nsambi na diela na dujabu na buketi buminongu miotsu mibisalu.

³²Amamuvega diela usala bisalu abi batu mbe basakasala na kala: usala lora na lora jivema na kunga.

³³Amamuvega diela ubaka mamanyi madufunu duneni nopaka miri udugusu bisalu biminongu na minongu.

³⁴Fumu amavega Bessalel na Oholiab pegulu ulonsa basusu yisalu. (Oholiab amaba muana dibaala uAhissamak mu yifumba yiDan).

³⁵Amabavega buketi usala bisalu biminongu na minongu, diwendi rie: ubumba bima, umaraka na ubuanga matsanda maboti madumbulu na mayinyuru ayivu va gari dumbulu na ubenga na mabenga nosala bisalu abi batu mbe basakasala na kala.