Read Punu Ukumuga 36 Bible Online

Ukumuga 36 - Punu bible

Ukumuga 36

¹Bessalel na Oholiab na batu botsu abamaba na buketi aba Fumu amavegadiela na dujabu ujaba bisalu bamadugusu bisalu biMbura Nsambi, diwendi rie: biotsu abi Fumu amaruma.

²Moise amanengila Bessalel na Oholiab na babaala botsu abamaba na buketi aba Fumu amavega dujabu na botsu abamaronda ukevega o yisalu.

³Va misu maMoise batu beni bamabongila pagu tsiotsu atsi baIsrael bamabega usala bisalu biMbura Nsambi. Kedi na kedi bamabeganga pagu tsitondini ombu Moise.

⁴Mbana babaala botsu abamaba na buketi abamakevega mu bisalu biMbura Nsambi bamasila bisalu,

⁵uyetsingula Moise rie: Batu bamabega biwelimina ne uviolila udugusu bisalu abi Fumu amaruma usala.

⁶Kabogu Moise amaruma na diruma dimasamunu yiari na yiari rie: Ne dibaala ne mugetu ayamuebega pagu tsiMbura Nsambi. Kabogu botsu badundi,

⁷mu mbari biotsu bimadugu ne uviolila umanisila bisalu.

⁸Babaala botsu abamaba na buketi abamasala bisalu bamarunga Ndagu Yibenguna na yigumi yimatsanda maboti madumbulu na mayinyuru ayivu va gari dumbulu na ubenga na mabenga; bamamaraka bibagunu bibiansa na buketi muna matsanda meni.

⁹Usakama ukadi tsanda umaba yigumi na metera jina na uroga ukadi tsanda umaba metera beji; matsanda motsu mamaba yietsu yimosi.

¹⁰Matsanda maranu mamagukusunu; masusu maranu mamagukusunu wandi.

¹¹Bamavasa mikudu midumbulu ami bamanamiga mu mungongu umatsanda amamalegukusunu; bamavaga munongu mosi na matsanda ama bamasita ugukasana.

¹²Bamanamiga magumaranu mamasita mu matsanda amatega na bamanamiga magumaranu mamasita mu mungongu umatsanda amamubeji; masita meni mamosi masamaviakana na masusu.

¹³Bamanamiga magumaranu mamapengana malora na bamanamasana matsanda meni na mapengana meni mbana Ndagu Nsambi jimaba yibuku yimosi.

¹⁴Bamavaga matsanda mamionyi mibinsabi na matsanda meni bamavaga ndagu ajimubeji aji bamakubiyila Ndagu Yibenguna, bamavaga yigumi na tsanda mosi.

¹⁵Usakama ukadi tsanda umaba yigumi na metera yiranu na uroga ukadi tsanda umaba metera beji; yigumi na tsanda mosi tsimaba yietsu yimosi.

¹⁶Bamagukasana matsanda maranu va mosi na masusu masiamunu.

¹⁷Bamavaga magumaranu mamasita mu mungongu umatsanda matega ava bamamanina umagukasana mbana bamavaga magumaranu mamasita mu mungongu umatsanda amamubeji.

¹⁸Bamavaga magumaranu mamapengana makunga na bamakotisa mapengana meni mu masita. Anana bamarungula Ndagu Nsambi ajimaba yibuku yimosi.

¹⁹Bamakubiga Ndagu Nsambi ajimubeji na mikata mibalumi babindombu amamabensu na mikata mibinsabi.

²⁰Bamagomba tsimbi tsiNdagu Yibenguna, tsionyi tsimaba tsiakasia atsi bamareliga.

²¹Usakama ukadi dusimbi umaba metera yiranu na uroga ukadi dusimbi umaba magumidusambuali na santimetera yiranu.

²²Kadi dusimbi dumaba na magedulu unamasana dusimbi na dusimbi nandi; bamavaga munongu mosi na tsimbi tsiotsu tsiNdagu Yibenguna.

²³Bamagomba magumabeji matsimbi ugomina yiari yitandu yiNdagu Yibenguna.

²⁴Bamavaga magumana mamabandu malora jivema o tsi magumabeji matsimbi, diwendi rie: mabandu mabeji o tsi kadi dusimbi; dusimbi dusimbi digedulu diandi.

²⁵Bamagomba magumabeji matsimbi ugomina yiari yibanda yiNdagu Yibenguna

²⁶na magumana mamabandu matsionyi malora jivema, diwendi rie: mabandu mabeji o tsi kadi dusimbi.

²⁷Bamagomba tsimbi yisiamunu ugomina o nsima Ndagu Yibenguna o yiari ayi wisi ewendisini.

²⁸Bamagomba tsimbi beji ugomina bitunga biNdagu Yibenguna o nsima;

²⁹tsimaba beji beji ubandila o tsi na tsimatungu tindi utungu mu makodu na milunga; bamavaga munongu mosi na tsimbi tsiotsu tsibeji atsimagomunu mu bitungu.

³⁰Tsimaba yinana yitsimbi na mabandu matsionyi malora jivema, diwendi rie: yigumi na mabandu masiamunu, mabandu mabeji o tsi kadi dusimbi.

³¹Mbana bamagomina baweleeti baranu ba-akasia,

³²uwarisa tsimbi tsiyibaga yimosi yiNdagu Yibenguna na yiranu uwarisa tsimbi tsiyibaga yisusu, na yiranu tsisusu uwarisa tsimbi tsiyibaga yidikusa o yiari ayi wisi ewendisini.

³³Duweleeti adu gari dumanamasana tsimbi va gari ubandila kodu mosi te na kodu susu wandi.

³⁴Bamanamiga tsimbi lora na milunga milora wandi, bamakotisa baweleeti abamanamugu lora muna.

³⁵Bamavaga dumbu dumatsanda maboti amavu madumbulu na mayinyuru ayivu va gari dumbulu na ubenga na mabenga ama-masalu na buketi nosonu bibagunu bibiansa muna.

³⁶Bamaduleliga mu makutu mana ma-akasia amamanamugu lora, makutu meni mamabana mapengana malora na mamasumu mu mabandu mana malora jivema.

³⁷Va dikotulu diNdagu Yibenguna bamavaga tsanda jisusu jiboti ajivu dumbulu na jiyinyuru ayivu va gari ubenga na dumbulu na jibenga ajimamaruku.

³⁸Bamavaga makutu maranu matsionyi malora jivema, diwendi rie: mabandu mabeji o tsi kadi dusimbi.