Read Punu Ukumuga 37 Bible Online

Ukumuga 37 - Punu bible

Ukumuga 37

¹Bessalel amagomina yigara yipangini na tsimbi tsiakasia; usakama uyionyi umaba kama na magumabeji na santimetera yiranu; urogauyionyi umaba magumidusambuali na santimetera yiranu na udonga uyionyi umaba magumidusambuali na santimetera yiranu.

²Amayinamiga tindi lora nesi va julu nesi o gari na amayinamiga lora na lora mu mungongu.

³Amavaga milunga mina milora na amaminamiga o biari biotsu bibina biyigara yieni; milunga mibeji o yiari yimosi na mibeji o yiari yisusu.

⁴Amavaga manguangu mabeji mamuiri uakasia amamanamiga lora.

⁵Amamakotisa mu milunga amimanamugu mu migula miyigara, monyi monangululungu yigara.

⁶Amavaga yitsiga yiyingeba, diwendi rie: yidibutsu yiyigara yipangini yitindi lora; usakama uyionyi umaba kama na magumabeji na santimetera yiranu; uroga uyionyi umaba magumidusambuali na santimetera yiranu.

⁷Amayibumba bibagunu bibiansa bibeji bilora abimabaku lora kodu na kodu tsiyitsiga yiyingeba ayivu yidibutsu.

⁸Amabumba yibagunu yiyiansa muna yidibutsu o kodu mosi na yibagunu yiyiansa yisusu o kodu susu; bibagunu bibiansa na yidibutsu bimaba yibuku yimosi.

⁹Bibagunu bibiansa bimasamba mapapi mogu ama bimagumbila yitsiga yiyingeba ayivu yidibutsu. Bimasungasana na bimatsokama va yionyi.

¹⁰Amagomina tavula na tsimbi tsiakasia, usakama ujionyi umaba metera mosi; uroga umaba magumaranu masantimetera na muranga umaba magumidusambuali na santimetera yiranu.

¹¹Amajinamiga tindi lora nesi va julu na amajinamiga lora na lora mu mungongu.

¹²Amabuesa mungongu uyiavu yiyinana yisantimetera va mugula tavula na va julu uonyi amabuesa ususu ulora.

¹³Amavaga milunga mina milora na amaminamiga o biari biotsu bibina bimakulu matavula.

¹⁴Milunga mimaba va mungongu na mimakotusu manguangu amonangululungu tavula.

¹⁵Amavaga manguangu mabeji ma-akasia amamanamiga lora, monyi monangululungu tavula.

¹⁶Amavaga bisalulu bitavula abiusalulu muna: bipela na mamoyi na bambuta na batasi; bionyi bimaba bisalulu bipagu jiunu va julu tavula, biotsu bina amabivaga na tindi lora.

¹⁷Amabumba dingasa ditindi lora, dingasa dieni dimaba dilora ajimabaku; na dikutu didionyi na yibibili yidionyi na mbuta tsidionyi na milunda midionyi na bafelera badionyi, diwendi rie: amabumba biotsu yibuku yimosi.

¹⁸Dingasa dieni dimaba na bitayi bisiamunu; bitayi birieru bidingasa o yiari yimosi na bitayi birieru o yiari yisusu yidingasa.

¹⁹Mu yitayi yimosi mumaba mbuta yirieru atsimaba na bibagunu bimiamandi amimanamugu milunda na bafelera; mu yitayi yisusu mumaba mbuta yirieru atsimaba na bibagunu bimiamandi amimanamugu milunda nabafelera; bimaba munongu mosi mu bitayi biotsu bisiamunu.

²⁰Mu yibibili yidingasa mumaba mbuta jina mu bibagunu biamandi abimaba na milunda na bafelera.

²¹Mumaba mulunda umosi o tsi bitayi bibeji na mulunda ususu va gari bitayi bisusu bibeji; dimaba munongu mosi mu bitayi biotsu bisiamunu bidingasa.

²²Milunda na bitayi bidingasa bimaba yibuku yimosi; biotsu bimaba bitindi lora jibaku.

²³Amavaga yisambuali yibalambi badionyi na bitsimusulu bibalambi bidionyi na bisunsulu bimabufu bidionyi abimaba bitindi lora.

²⁴Amabumba dingasa na bisalulu biotsu bidionyi na magumarieru makilu tsitindi lora.

²⁵Amagomina yinyensulu yibima bimbunga jiboti na tsimbi tsiakasia; usakama na uroga uyionyi umaba magumaranu masantimetera, usakama na uroga uyionyi umaba dedi; na yirela yiyionyi yimaba metera mosi. Amavaga masiyi amamaba yibuku yimosi na yinyensulu yibima bimbunga jiboti.

²⁶Amayinamiga tindi lora nesi va julu nesi va migula yiari na yiari nesi mu masiyi na amanamiga lora na lora va mungongu.

²⁷Amayivayila milunga mina milora muna mungongu, mibeji mibeji yiari na yiari. Amanamiga milunga mieni yiari na yiari, amina miukotusulu manguangu uyinangulila.

²⁸Amavaga manguangu ma-akasia mbana amamanamiga lora.

²⁹Amavaga matsi mayingitsi, diwendi rie: madubiatsu na bima bimbunga jiboti abimafubusunu na muvayitsi umiyombu na buketi buandi.