Read Punu Ukumuga 38 Bible Online

Ukumuga 38 - Punu bible

Ukumuga 38

¹Amagomina yinyensulu yipagu na tsimbi tsiakasia; usakama uyionyi umaba metera beji na yibuku. Uroga uyionyi umaba metera beji na yibuku. Usakama na uroga biyinyensulu yipagu bimaba dedi, udonga uyionyi umaba metera mosi na yibuku.

²Mu bitungu biotsu bibina amavaga masiyi amamaba yibuku yimosi na yinyensulu yipagu, amayinamiga kunga.

³Amavaga bisalulu biotsu biyinyensulu yipagu, diwendi rie: yisunsulu yimabufu na bapelu na bansienga na misomu na bisunsulu bimuji; amavaga bisalulu bieni biotsu na kunga.

⁴Amavaga tasi jikunga va yinyensulu yipagu, amajinamuga mu mugula uyinyensulu yipagu ubandila o tsi te na va gari.

⁵Amavaga milunga mina mikunga mu kodu tsijionyi amimakotusu manguangu.

⁶Amavaga manguangu ma-akasia na amamanamiga kunga.

⁷Amasoma manguangu mu milunga, manguangu meni mamaba yiari na yiari biyinyensulu yipagu, amuna yimanangululungu. Yionyi yimavagu na tsimbi, amayidonsa va gari.

⁸Amabonga mbuenu tsibagetu abamasala va dikotulu diNdagu Yibengima na tsionyi amavaga nsienga jikunga na dikutu dikunga wandi.

⁹Ndagu Yibenguna jimatsiengusu dulombili: o yiari yitandu umaba matsanda maboti; usakama umatsanda meni umaba magumaranu mametera,

¹⁰amamavakugu mu magumabeji mamakutu amamaba na magumabeji mamabandu makunga; mapengana mamakutu na manguangu mamonyi mamaba malora jivema.

¹¹O yiari yibanda munongu mosi umaba matsanda; usakama umonyi umaba magumaranu mametera na magumabeji mamakutu na magumabeji mamabandu makunga, mapengana mamakutu na manguangu mamonyi mamaba malora jivema.

¹²O yiari ayi wisi ewendisini umaba matsanda mamagumabeji na metera yiranu na yigumi yimakutu na mabandu mamonyi; mapengana mamakutu na manguangu mamonyi mamaba malora jivema.

¹³O yiari ayiwisi epalili magumabeji na metera yiranu mamaba uroga udulombili.

¹⁴Yiari yimosi yidulombili yiudibugu yisambuali yimetera na yibuku yimatsanda maboti na makutu marieru na mabandu mamonyi marieru,

¹⁵yiari yisusu yidulombili yiudibugu yisambuali yimetera na yibuku yimatsanda meni o yiari ayimubeji na makutu marieru na mabandu mamonyi marieru.

¹⁶Matsanda motsu madulombili mamaba matsanda maboti.

¹⁷Mabandu mamakutu mamaba makunga, makutu motsu amamatsiengila dulombili mamaba na manguangu malora jivema na mapengana malora jivema na biviovi bimakutu bimaba bilora jivema.

¹⁸Yiabutsu yidulombili yimaba yimatsanda maboti mayigumi yimetera madumbulu na mayinyuru ayivu va gari dumbulu na ubenga na mabenga amamamaruku. Usakama uyionyi umaba yigumi yimetera; muranga uyionyi umaba metera beji na yibuku dedi mosi na uroga umatsanda madulombili.

¹⁹Makutu madulombili mana na mabandu mamonyi mamaba makunga, mapengana na manguangu na biviovi bimaba bilora jivema.

²⁰Makutu motsu mageyi maMbura Nsambi na madulombili mamaba makunga.

²¹Guluanu durangu dubisalu biNdagu Yibenguna na biMbura Nsambi abimavegu na durumu duMoise na abimasalusu na bisi Levi o tsi dummu duItamar muana dibaala uAaron muvagulitsi upagu.

²²Bessalel muana dibaala uOuri muana dibaala uHour muisi yifumba yiJuda amavaga motsu ama Fumu amaruma Moise;

²³Oholiab muana dibaala uAhissamak muisi yifumba yiDan amaba muwamusi andi agumaba na buketi ubaka nosala abisakasalu na kala na batu nomaraka matsanda maboti madumbulu na mayinyuru ayivu va gari dumbulu na ubenga na mabenga.

²⁴Dutalu dulora ajimasalusu mu bisalu biotsu biMbura Nsambi, diwendi rie: lora ajimavagulungu pagu dumaba yinana yikama na magumidusambuali na yisambuali yikilu na kama yirieru tsigarama atsimaba dedi na yietsu yiMbura Nsambi.

²⁵Dutalu dulora jivema ajimagungu na botsu dumaba tosini yirieru na yigumi na yisambuali yikilu tsilora jivema na yisambuali yikama na magumaranu magarama; tsimaba dedi na yietsu yiMbura Nsambi.

²⁶Mutu mutu amafuta garama yiranu tsilora jivema; abamasansumu ubanda na abakavu na magumabeji mabilima ne uviolila bamaba kama yisiamunu na tosini yirieru na kama yiranu na magumaranu mababaala.

²⁷Tosini yirieru tsikilu tsilora jivema tsimasalusu mu kama mabandu maMbura Nsambi na mabandu masusu, diwendi rie: magumarieru makilu mu kadi dibandu.

²⁸Na yigumi na yisambuali yikilu na yisambuali yikama na magumaranu magarama malora jivema bamavaga mapengana.

²⁹Dutalu dukunga ajimavagulu dumaba tosini beji na kama mosi na magumabeji na kilu jina.

³⁰Na tsionyi bamavayila mabandu madikotulu diNdagu Yibenguna na yinyensulu yipagu yikunga na tasi jiyionyi na bisalulu biotsu biyinyensulu yipagu,

³¹na mabandu madulombili na mabandu mayiabutsu yidulombili na makutu motsu mageyi maMbura Nsambi na madulombili.