Read Punu Ukumuga 39 Bible Online

Ukumuga 39 - Punu bible

Ukumuga 39

¹Bamasalisa matsanda madumbulu na mayinyuru ayivu va gari dumbulu na ubenga na mabenga urariga biduaru bibisalu bibuvagulitsi bupagu abi bamaduara ava bamakotila o Mbura Nsambi na biduaru biAaron abimaba yingitsi nana Fumu amarumina Moise.

²Bamarariga yijungi yibuvagulitsi bupagu yimatsanda maboti malora na madumbulu na mayinyuru ayivu va gari dumbulu na ubenga na mabenga.

³Bamavasa mikudu milora na bamamitabula bibuku bigegeyi abi bamabuangila matsanda maboti madumbulu na mayinyuru ayivu va gari dumbulu na ubenga na mabenga amamabuangu na tindi buketi.

⁴Bamanamiga bivakugulu bibangalu mu yijungi yibuvagulitsi bupagu mu makodu.

⁵Beleeti ajimanamugu na yijungi yibuvagulitsi bupagu jimaba yisalu yimosi na yionyi na jimaba matsanda maboti malora na madumbulu na mayinyuru ayivu va gari dumbulu na ubenga na mabenga, nana Fumu amarumina Moise.

⁶Bamanamiga mamanyi mabeji maonikisa mu mingongu milora; bamabaka miina mabaana bababaala baJacob nana bebakili bilimba mu mamanyi.

⁷Bamavakiga mu bivakugulu bibangalu biyijungi yibuvagulitsi bupagu; mamaba yirangumunu yiyigumi na bifumba bibeji biIsrael nana Fumu amarumina Moise.

⁸Bamavaga mfunga jitulu jibunsonsi ajimasalu na buketi, bamajisala dedi mosi na yijungi yibuvagulitsi bupagu, bamajivaga na matsanda maboti malora na madumbulu na mayinyuru ayivu va gari dumbulu na ubenga na mabenga.

⁹Usakama na uroga umaba dedi na matsanda mamafuakasana; usakama ujionyi umaba magumabeji na santimetera yiranu na uroga ujionyi umaba dedi mosi na usakama.

¹⁰Bamanamiga mamanyi madufunu duneni muna, diwendi rie: milonga mina. Mu mulonga agutega saiduana mosi, topasa mosi na emaroda mosi;

¹¹mu mulonga agumubeji eskabukala mosi, safira mosi na diama mosi;

¹²mu mulonga agumurieru opaia mosi, agata mosi na amatisa mosi;

¹³mu mulonga agumuina dusiengi dumosi, onikisa mosi na jaspa mosi. Dimanyi dimanyi dimanamugu lora mu mungongu.

¹⁴Mumaba yigumi na mamanyi mabeji dedi mosi na miina mabaana bababaala baJacob mamasonugu nana bilimba, dimanyi dimanyi na diina diandi, diwendi rie: miina mayigumi na bifumba bibeji.

¹⁵Bamavaga panga tsigeyi tsitindi lora unamiga mfunga jitulu: panga atsimavasu nderi mikudu.

¹⁶Bamanamiga lora mu mingongu na bamavaga milunga mibeji mitindi lora; umosi yiari, ususu yiari bimfunga jitulu.

¹⁷Bamakotisa panga tsilora mu milunga mieni mibeji amimaba o kodu tsimfunga jitulu.

¹⁸Bamasitiyila makodu mamikudu mieni mibeji amivu bivakugulu bibangalu, bamajivaga o yiari yigusu yiyijungi yibuvagulitsi bupagu.

¹⁹Bamamuevaga milunga mibeji milora ami bamanamiga o kodu tsimfunga jitulu mu mungongu agu gari agumabambana na yijungi yibuvagulitsi bupagu.

²⁰Bamavaga milunga mibeji misusu milora ami bamakotisa o tsi bivakugulu bibangalu biyijungi yibuvagulitsi bupagu.

²¹Bamatunga milunga mimfunga jitulu na milunga miyijungi yibuvagulitsi bupagu na mukudu udumbulu yiri mfunga jitulu jiuba va julu beleeti jiyijungi yibuvagulitsi bupagu na jigorungula ukakuga na yionyi, nana Fumu amarumina Moise.

²²Bamarariga yilinga yiyijungi yibuvagulitsi bupagu, yiotsu yimaba yimatsanda maboti madumbulu na dumbulu.

²³Bamatoba mbura va gari jiukotisila muru; mbura eni jimamaruku yiari na yiari yiri yilinga yigopasiga.

²⁴Bamamaraka bibagunu bimigeranada midumbulu na miyinyuru ayivu va gari dumbulu na ubenga na mabenga.

²⁵Bamavaga ngunga jitindi lora na mulunda mugeranada uyenasogu mu mungongu uyilinga agutsi,

²⁶ngunga mosi na mugeranada umosi, ngunga mosi na mugeranada umosi utsiengila mungongu uotsu uyilinga, nana Fumu amarumina Moise.

²⁷Bamarariyila Aaron na baana bandi bababaala biduaru bimatsanda maboti,

²⁸diwendi rie: na yiviovi yisakama na yiviovi na mibati abi bamaduaranga;

²⁹na beleeti jimatsanda maboti ajimamaruku madumbulu na manyinyuru ayivu va gari dumbulu na ubenga na mabenga nana Fumu amarumina Moise.

³⁰Bamavaga didayi ditindi lora, bamadinamiga muna yiviovi nana benamiyili yilimba; adimasonugu rie: Yibiatsi yiFumu.

³¹Bamaditunga na mukudu udumbulu o gusu yiviovi, nana Fumu amarumina Moise.

³²Anana bisalu biotsu biNdagu Yibenguna na Mbura Nsambi bimasukila. BaIsrael bamasala biotsu abi Fumu amaruma Moise.

³³Bamabega biotsu biMbura Nsambi ombu Moise: bisalulu biotsu na mapengana na tsimbi na manguangu na makutu na mabandu;

³⁴na mfunga jimikata mibalumi babindombu amamabensu na mfunga jimikata mibinsabi na dumbu dudugabu;

³⁵na yigara yipangini na manguangu mayionyi na yidibutsu ayivu yitsiga yiyingeba;

³⁶na tavula na bisalulu bijionyi biotsu na mapa mapagu,

³⁷na dingasa ditindi lora na balambi badionyi na balambi abamakunsu na bisalulu bidionyi biotsu na matsi madingasa;

³⁸na yinyensulu yibima bimbunga jiboti na matsi madubiatsu na bima bimbunga jiboti na matsanda madikotulu dindagu;

³⁹na yinyensulu yipagu yikunga na tasi jiyionyi jikunga na manguangu mayionyi na bisalulu biyionyi biotsu na nsienga na dikutu dijionyi;

⁴⁰na matsanda madulombili na makutu maduonyi na mabandu maduonyi na matsanda madikotulu didulombili na mikudu mimonyi na makutu maduonyi mageyi na bisalulu biotsu biyisalu yiNdagu Yibenguna na biMbura Nsambi;

⁴¹na biduaru bibisalu biMbura Nsambi na biduaru biyingitsi biAaron muvagulitsi upagu na biduaru bibaana bandi bababaala biyisalu yibuvagulitsi bupagu.

⁴²BaIsrael bamasala bisalu bieni biotsu udugusu maruma motsu maFumu ama amaruma Moise.

⁴³Moise amakelula bisalu biotsu, amalaba yiri baIsrael bamavaga biotsu nana Fumu amamurumina, amabagabila miula.