Read Punu Ukumuga 4 Bible Online

Ukumuga 4 - Punu bible

Ukumuga 4

¹Moise amagabusila Fumu rie: Kokolu, baIsrael bagopayila yitu na bagokululu. Tumba bovosa rie: Fumu asamalabana nagu ne temu mosi.

²Fumu amamuwivula rie: Yi yivu va dikaka diagu? Moise amawagula rie: Nguangu.

³Fumu amamuruma rie: Jibuayi va tsi. Moise amajibuaga va tsi, na jimakaluga nyoga. Moise amajirina.

⁴Tumba Fumu amaruma Moise rie: Simbula gogu, jigaangi va pilibinsi. Moise amasimbula gogu na amajigaanga: nyoga jimamuekaluga nguangu va dikaka diandi.

⁵Fumu amamutsingula rie: Adina diulasa baIsrael yiri nyimalabana nagu, menu Nsambi bataji bogu, Nsanjbi Abraham na Nsambi Isaac na Nsambi Jacob. Mbana boguvayila yitu.

⁶Fumu amamuemuruma rie: Soma dikaka diagu o tsi yikutu. Moise amasoma dikaka diandi o tsi yikutu; mbana amadigusula na laba dikaka diandi dimakaluga muambalolu dibungana na nyambi.

⁷Fumu amaruma Moise rie: Muesoma dikaka diagu o tsi yikutu yiagu. Moise amagabusa dikaka diandi o tsi yikutu yiandi, dimamuegabuga nana dimabila va kala.

⁸Fumu amabuesa rie: Pa baIsrael bageguvayili yitu na pa bagededili diufi diagu ava belabili yimaga yitega boguvayila yitu ava belabili ayimubeji.

⁹Pa bagevayili nesi bimaga bieni yitu na pa bageguvayili yitu, gukabonga mamba mamujamba uNil, gukamapuga va tsi na mamba ama gubongila mu mujamba mokituga malungu va butamba.

¹⁰Moise amatsingula Nsambi rie: Aa! Fumu! Nyina mbembu jirekama, jigaabanda masiga vo nsimasiga, vo ne ava gumabandila uvosa nami; mu mbari nyina waʼ na munu, tumba utsikadana nyitsikidini.

¹¹Fumu amamuwivula rie: Anyi amavaga munu mutu? Anyi evayi mutu dibaba vo madiba? Anyi evayi mutu yidunga vo ulaba? Tsia Menu Fumu?

¹²Kabogu, wenda. Nyuba nagu na nyugulonsa ama guvosa.

¹³Moise amalenda Fumu rie: Kokolu, sindiga mutu ususu!

¹⁴Mbana Fumu amanyoyila Moise, amamuwivula rie: Aaron aguvu muisi Levi agaa muana nguji agu? Nyijabi yiri jandi evosingi na dupasu. Jaʼ beni uruga eruyi ugubengusana; ava ogulabila obasa na nsangu jineni.

¹⁵Ndeju gumutsingula ama guronda uvosa; menu nyuba nagu na nyuba nandi wandi, nyudulonsa motsu amaduvaga.

¹⁶Jandi oguvosila ombu batu; jandi oba nderi munu agu, ndeju guba nderi Nsambi ombu gandi.

¹⁷Va julu vana bonga nguangu agu, gukajisalisa uvaga bimaga.

¹⁸Moise amalewenda ombu boji buandi Jethro, amamulenda rie: Kokolu, lensingisa uwenda ombu baana bataji bami abavu o Egypte, nyirondi uyebalaba yeri bakivu monyu. Jethro amatsingula Moise rie: Wenda na buranga. Mbana Moise amayenawenda.

¹⁹Fumu amaruma Moise ava amabila o Madian rie: Gabuga o Egypte mu mbari botsu aba mbe bamaguboka bamafu.

²⁰Kabogu Moise amabonga mugatsi andi na baana bandi bababaala, amabanangiga mu baburu, mbana bamayenagabuga o Egypte. Amabonga nguangu aji Nsambi amamuruma ubonga.

²¹Fumu amatsingula Moise rie: Nyimagulonsa uvaga bimaga biminongu na minongu. Ava guigabuyili o Egypte, gukabivaga va gusu Pharaon. Menu nyugalisa murima andi na agowensa baIsrael.

²²Gukatsingula Pharaon rie: Fumu jandi rie: Israel avu muana ami udibaala, tsomi ami.

²³Nyigurumi rie: Dunda muana ami, awendingi yiri onsalila; gulu, pa guibusi umudunda, nyubokisa muana agu udibaala agutsomi.

²⁴Ava Moise amabila mu nsila va mbura aji amasilimina, Fumu amamutumuna na amaronda umubokisa.

²⁵Sefora amabonga dimanyi adimaba mengu, utabula musosu umuana andi, amagubuaga va makulu maMoise ava amavosila rie: Ndeju guvu mulumi ami umalungu!

²⁶Mbana Fumu amamudunda. Mu diambu didurebu Sefora amamuluga rie: Mulumi umalungu!

²⁷Fumu amaruma Aaron rie: Rela o kumu uyebenguna na Moise. Aaron amawenda; amabenguna na Moise o mukongu uNsambi, bamabumbasana.

²⁸Moise amajabisa Aaron mambu motsu maFumu na amamulonsa bimaga abi amamuruma uvaga.

²⁹Mbana Moise na Aaron bamayenawenda, bamagukiga bivunda biotsu biIsrael.

³⁰Aaron amavosa mambu motsu ama Nsambi amatsingula Moise, Moise amalasa batu botsu bimaga.

³¹Batu bamabavayila yitu. Bamagudama va tsi uyitsa Fumu mu mbari amalingula baIsrael na amalaba maguga mogu.