Read Punu Ukumuga 40 Bible Online

Ukumuga 40 - Punu bible

Ukumuga 40

¹Fumu amatsingula Moise rie:

²Yilumbu yitega yitsungi jitega gukareliga Ndagu Yibenguna na Mbura Nsambi.

³Gukakotisa yigara yipangini o nsima dumbu dudugabu.

⁴Gukakotisa tavula na gukasunsa mapa mapagu va julu jionyi na buranga na gukakotisa na dingasa nobangisa balambi.

⁵Gukasunsa yinyensulu yibima bimbunga jiboti yilora va gusu yigara yipangini na gukavakiga matsanda va dikotulu diNdagu Yibenguna.

⁶Gukasunsa yinyensulu yipagu va gusu dikotulu diNdagu Yibenguna.

⁷Gukasunsa nsienga va gari Ndagu Yibengunana yinyensulu yipagu, gukawitila mamba muna.

⁸Gukamanisila yisalu yiari na yiari o dulombili na gukavakiga matsanda va dikotulu didulombili.

⁹Gukabonga matsi badubiatsu gukasinga Ndagu Yibenguna na biotsu abivu muna; gukajikwakisa na bisalulu bijionyi biotsu; jiuba yingitsi.

¹⁰Gukasinga yinyensulu yipagu na bisalulu biyionyi biotsu matsi; gukayikwakisa; yinyensulu yipagu yiuba tindi yingitsi.

¹¹Gukasinga nsienga na dikutu dijionyi matsi, gukajikwakisa.

¹²Mbana gukabega Aaron na baana bandi bababaala te na dikotulu diNdagu Yibenguna, gukababuitsa.

¹³Gukaduisa Aaron biduaru biyingitsi na gukamusinga matsi na gukamukwakisa yiri onsalila yisalu yiami yibuvagulitsi bupagu.

¹⁴Mbana gukabambasana baana bababaala baAaron, gukabaduisa biduaru,

¹⁵gukabasinga matsi nana gutsisingila taji ogu matsi yiri bonsalila yisalu yiami yibuvagulitsi bupagu. Dubiatsu duedudu dubakotisa mutubu mu bisalu bibuvagulitsi bupagu te na bategula bogu.

¹⁶Moise amadedila maruma motsu ama Fumu amamuruma.

¹⁷Yilumbu yitega yitsungi jitega jiyilima ayimubeji Ndagu Yibenguna jimarelugu.

¹⁸Moise amareliga Ndagu Yibenguna; amavaga mabandu na amareliga tsimbi na manguangu na makutu wandi.

¹⁹Amavakiga matsanda o Ndagu Yibenguna na amajikubiga mfunga nana Fumu amamurumina.

²⁰Amabonga mamanyi mamigaga na amamakotisa o yigara yipangini, amayidibiga nayidibutsu ayivu yitsiga yiyingeba.

²¹Amakotisa yigara yipangini o Mbura Nsambi; amavakiga dumbu dudugabu adumagaga yigara yipangini nana Fumu amarumina Moise.

²²Amakotisa tavula o Mbura Nsambi o banda jiyigara yipangini va gusu dumbu dudugabu;

²³na amasunsa mapa mapagu va gusu Fumu nana Fumu amarumina Moise.

²⁴Amakotisa dingasa o Mbura Nsambi va nsungisini na tavula o tandu jiNdagu Nsambi;

²⁵na amabangisa balambi va gusu Fumu nana Fumu amanimina Moise.

²⁶Amakodsa yinyensulu yibima bimbunga jiboti yilora o Mbura Nsambi va gusu dumbu dudugabu;

²⁷na amanyensa bima bimbunga jiboti nana Fumu amarumina Moise.

²⁸Amavakiga matsanda va dikotulu diNdagu Nsambi.

²⁹Amakotisa yinyensulu yipagu va dikotulu diNdagu Yibenguna; amavagula pagu tsiunyensa na pagu jitsangu nana Fumu amarumina Moise.

³⁰Amasunsa nsienga va gari Ndagu Yibenguna na yinyensulu yipagu na amawitila mamba maduliomusu;

³¹Moise na Aaron na baana bandi bababaala bamayesusanga makaka na makulu muna;

³²mbe basakakota o Ndagu Yibenguna nobambana na yinyensulu yipagu bamalegolila nana Fumu amarumina Moise.

³³Amavaga dulombili yiari na yiari biNdagu Yibenguna na biyinyensulu yipagu na amavakiga matsanda madikotulu didulombili. Anana Moise amamanina bisalu.

³⁴Mbana dimungi dimagumba Ndagu Yibenguna na bundumba buFumu bumabasa tindi ubasa Mbura Nsambi.

³⁵Moise asamarungula ne ukota o Ndagu Yibenguna mu mbari dimungi dimakubiga Ndagu na bundumba buFumu bumabasa tindi ubasa Ndagu Yibenguna.

³⁶Mu miendu miotsu yika dimungi dimasiamuyi o julu Ndagu Yibenguna, baIsrael bamasogamanga.

³⁷Tumba pa dimungi dikidigumba basamasogamanga te na vana dimasiamuyila.

³⁸Ava nyangu, dimungi diFumu dimabanganga o julu Ndagu Yibenguna; ava mukolu dimabanganga nderi dimungi dimuji ombu baIsrael botsu mu miendu miogu miotsu.