Read Punu Ukumuga 5 Bible Online

Ukumuga 5 - Punu bible

Ukumuga 5

¹Motsu mana manosuka, Moise na Aaron bamawenda ombu Pharaon, bamamutsingula rie: Fumu Nsambi Israel jandi rie: Dunda batu bami, bawendingi yiri boyevaga feta jiukitsila o kumu.

²Pharaon amabawivula rie: Anyi avu Fumu yiri nyudedila diufi diandi nowensa baIsrael? Ngejabi Fumu, ngoduwensa!

³Moise na Aaron bamavosa rie: Nsambi baHebreu aguvu Fumu etu amalabana netu. Kabogu tusingisi ubonga bilumbu birieru biuwendila o kumu, uyemuvagulila pagu yiri agotuboka na yivunga vo dijenga.

⁴Kaga jiEgypte amawivula Moise na Aaron rie: Dibandu yi duigubitsili baIsrael usala bisalu biogu? Wendanu o bisalu bienu!

⁵Pharaon amabuesa rie: Dugelabi yiri batu bebaba bamafuna tindi ufuna ne nana dubagubitsa usala bisalu biogu?

⁶Muna yilumbu yieni Pharaon amavega diruma diedidi ombu bivunda bibisalu nʼombu bafumu babisalu rie:

⁷Duyamuevega bisinga nana va kala ombu baIsrael uvayila birika; bawendingi joʼ beni uyenakerombila bisinga.

⁸Dukabatsoyisa na dutalu dubirika nana adu bamadimbanga va kala, duyadiamisa dutalu; jogu bavu batsoritsi; la dibandu bevosili rie: Tʼwendianu uyevagulila Nsambi etu pagu!

⁹Tubakambisianu nabisalu bipuela; mbana baIsrael bagomuekipa mfurulu tsiMoise na Aaron.

¹⁰Bivunda bibisalu na bafumu babisalu bamatsingula batu rie: Pharaon jandi rie: Ngomueduvega bisinga!

¹¹Wendanu jenu beni uyenaromba bisinga guna dudilila! Ngodudiamisila ne udiamisa dutalu dubirika.

¹²BaIsrael bamapansiga o bulongu buotsu buEgypte, uyenaromba bisinga.

¹³Bivunda bibisalu bamabasukanga novosa rie: Dumananga dutalu duyilimbu na yilumbu nana ava dumavegulungu bisinga.

¹⁴Bivunda bibisalu biPharaon bamadimba bafumu babisalu baIsrael, bamabawivulanga rie: Dibandu yi dugaamaninanga dutalu dumasiga na dunamunyi udugusu birika nana na kala?

¹⁵Bafumu babisalu babaIsrael bamawenda uyetatila Pharaon nomuwivula rie: Dibandu yi gukatutsoyisila nana?

¹⁶Diuleba bagemuetuvega bisinga, beturumi rie: Dimbanu birika! Va julu vana, betudimbi, nderi tuvu na mbela.

¹⁷Pharaon amabawaka rie: Jenu batsoritsi na batsoritsi duvu! La dibandu duivosili rie: Tʼwendianu o uvagulila Fumu etu pagu.

¹⁸Tsie wendianu o usala! Bagomueduvega bisinga ne nana vengu dudugusu dutalu dubirika nana na kala.

¹⁹Bafumu babisalu babaIsrael bamalaba yiri diambu dimaranga, mu mbari bivunda bibisalu biPharaon bamaruma rie: Dugodiamusulu dutalu dubirika duyilumbu na yilubu!

²⁰Ava bamapalila o ndagu Pharaon, bamabenguna na Moise na Aaron abamabavivanga.

²¹Bamatsingula Moise na Aaron rie: Fumu jaʼ beni adugengili na aduveyi mbela! Dumaturombisa uvinu na Pharaon na basalitsi bandi, dumabawakisa majenga utubokila.

²²Moise amagabuga ombu Fumu, amamuwivula rie: Fumu, dibandu yi gumavayila batu bebaba dibi? Dibandu yi gumansindiyila gunu?

²³Yiotsu ayi nyimawendila ombu Pharaon novosa nandi mu diina diagu, evayi baIsrael dibi, gugaabawaka kalala ne pesu!