Read Punu Ukumuga 7 Bible Online

Ukumuga 7 - Punu bible

Ukumuga 7

¹Kabogu Fumu amatsingula Moise rie: Gulu nyiguveyi musuga uNsambi ombu Pharaon na muana nguji agu Aaron oba munu agu.

²Gukatsingula muana nguji agu motsu ama nyuguruma; jandi ovosa na Pharaon rie: Dunda baIsrael, bagusuyi o bulongu buagu.

³Nyugalisa murima uPharaon; diuleba nyufunisa bimaga biami o bulongu buEgypte,

⁴Pharaon agogaru. Kabogu nyulasa bisi Egypte mangolu mami ava nyubakilisila, mbana nyupalisa batu bami baIsrael o bulongu buEgypte muna mukuta mukuta.

⁵Bisi Egypte bojaba yiri nyiji Fumu ava nyubalasila mangolu mami, mbana nyupalisa baIsrael o Egypte.

⁶Moise na Aaron bamavaga adi Fumu amabaruma.

⁷Bilima biMoise bimaba magumidunana na bilima biAaron bimaba magumidunana na bilima birieru ava bamalevosila na Pharaon.

⁸Fumu amatsingula Moise na Aaron rie:

⁹Pa Pharaon ovosa nenu rie: Vaganu yimaga! Gukatsingula Aaron rie: Bonga nguangu agu nojibuaga va gusu Pharaon. Jiukaluga nyoga.

¹⁰Moise na Aaron bamawenda ombu Pharaon na bamavaga adi Fumu amabaruma, Aaron amabuaga nguangu andi va gusu Pharaon na va gusu basalitsi bandi; jionyi jimakaluga nyoga.

¹¹Tumba Pharaon amanengila batu badiela na bavanditsi na banganga baEgypte abamavaga munongu mosi na bingana biogu.

¹²Jogu botsu bamabuaga manguangu mogu.

¹³Ne nana Pharaon amagalisa murima na asamagulu mambu maMoise na Aaron dedi mosi nana Fumu amabalubusila. Yivunga ayitega: Mamba mamakaluga malungu.

¹⁴Fumu amatsingula Moise rie: Pharaon amagalisa murima, ubusa ebusi uwensa baIsrael.

¹⁵Kabogu kedi gukawenda ombu Pharaon; ava owendila o mujamba uNil, gulabana nandi na gubonga nguangu eni ajimakaluga nyoga,

¹⁶mbana gukatsingula Pharaon rie: Fumu Nsambi jibaHebreu amansindiga ombu gagu ugutsingula rie: Dunda batu bami yiri jogu bonsalila o kumu. Te na temu ejiji gukagulu?

¹⁷Fumu amabuesa rie: Mbana gujaba yiri nyiji Fumu. Nyimaruma Moise udimba mamba maNil na nguangu ajivu va dikaka diandi, mamba meni mokaluga malungu.

¹⁸Nyama tsimamba tsiufu, mujamba ubiva te na bisi Egypte bagorungula unuanganga mamba meni.

¹⁹Fumu amamuevosa na Moise rie: Ruma Aaron rie: Bonga nguangu agu na samba gogu agu mu mamba maEgypte: mu mijamba miogu mineni na migeyi na mu manga na mu matanga mamamba. Diwendi rie: Mamba motsu mokaluga malungu; voba malungu o biari biotsu biEgypte nesi te no gari tsibisanga biminongu na minongu.

²⁰Moise na Aaron bamavaga adi Fumu amabaruma. Aaron amabonga nguangu na amadimba mamba maNil va gusu Pharaon na basalitsi bandi; mujamba uotsu umakaluga yika malungu na malungu.

²¹Nyama tsimamba tsimafu, mujamba uotsu umabiva, te na bisi Egypte basamamuerungula unu mamba mamujamba. Vamaba malungu o biari biotsu biEgypte.

²²Tumba banganga baEgypte bamavaga munongu mosi na bingana biogu. Pharaon amagalisa murima, asamagulu mambu maMoise na Aaron dedi mosi nana Fumu amabalubusila.

²³Pharaon amayenagabuga o ndagu andi; asamakipa ne ukipa mambu memama.

²⁴Bisi Egypte bamayenatimanga biduna va migula miNil udila mamba monu; mu mbari basamamuerungula unu mamba mamujamba.

²⁵Yiotsu ayi Fumu amalasa yivunga yimamba maNil yisambuali yibilumbu bimavioga.

²⁶Mbana Fumu amaruma Moise rie: Wenda ombu Pharaon, gukamutsingula rie: Fumu erumi rie: Dunda batu bami yiri bonsalila.

²⁷Pa guibusi ubadunda, nyubasa bulongu buagu buotsu yika milansa na milansa.

²⁸Mujamba ufunisa milansa; miubasa de na miukota te no ndagu agu, te no yibuku yiagu yindagu nesi te no tangi agu te no mandagu mabasalitsi bagu na mabatu bagu nesi te no furu tsiogu te no gari tsibidu biagu.

²⁹Milansa miugumata nesi na batu bagu wandi.