Read Punu Ukumuga 9 Bible Online

Ukumuga 9 - Punu bible

Ukumuga 9

¹Fumu amaruma Moise rie: Wenda ombu Pharaon nomuruma rie: Fumu Nsambi baHebreu jandi rie: Dunda batu bami yiri bonsalila.

²Pa guibusi ubawensa nomuebasikiga,

³Fumu onamusu biruitsi bienu yivunga: bakabala na baburu na basamo na bangombi na bindombu na binsabi; bipuela biuguda.

⁴Fumu ovaga duviakusunu va gari migamba mibaIsrael na mibisi Egypte; ne yimosi yibiruitsi bibaIsrael yigofu.

⁵Fumu amatubula temu; amavosa rie: Mugesa dulaba yimaga ayi nyuvaga o Egypte.

⁶Kabogu ava kedi Fumu amayivaga. Migamba miotsu mibisi Egypte mimaguda, vasamafu ne yiruitsi yimosi yibaIsrael.

⁷Pharaon amagulu adimalabana; amagulu wandi yiri vasamafu ne yiruitsi yimosi yibaIsrael. Tumba Pharaon amamuegalisa murima andi na asamawensa baIsrael.

⁸Fumu amaruma Moise na Aaron rie: Bolanu mabufu, mbana Moise amatindi o julu va gusu Pharaon.

⁹Mokaluga difufundu adiubasa bulongu buotsu buEgypte; yiotsu ayi diunama batu vo bibulu diubarombisa ubela bibambila abiukaluga masieyi.

¹⁰Banobola mabufu mbana bamayelabana na Pharaon; Moise amamatinda o julu; manonama batu na bibulu, nyuru tsiogu tsimaba yika bibambila na bibambila abimakaluga masieyi na masieyi.

¹¹Banganga baEgypte basamarungula ulabana na Moise mu diambu dibibambila; mu mbari banganga bamabela bibambila dedi mosi na bisi Egypte botsu.

¹²Fumu amagalisa murima uPharaon, asamagulu mambu maMoise na Aaron nana Fumu amalubusila Moise.

¹³Fumu amatsingula Moise rie: Rambuga kedi jineni, uyelabana na Pharaon. Gukamuruma rie: Fumu Nsambi baHebreu jandi rie: Dunda batu bami yiri bonsalila.

¹⁴Mu mbari temu ejiji nyulasa bivunga biami biotsu ombu gagu nʼombu basalitsi bagu nʼombu batu bagu, mbana gujaba yiri vagaa mutu ne umosi aguvu dedi nami mu bulongu buotsu.

¹⁵Mbe nyimalasa mangolu mami uduboka, jenu na batu bagu na yivunga, mbe dumatsiemuga kala.

¹⁶Tumba gukivu monyu te na namunyi yiri gulaba mangolu mami na diina diami diusamunu o malongu motsu.

¹⁷Pa gumuelasa batu bami maguga na pa gugobadunda,

¹⁸mugesa va diweru diedidi nyunoyisa mfula jineni jimamanyi, mfula ajisakanoga na kala o bulongu buEgypte ubandila ava dusundulu dubuonyi te na namunyi.

¹⁹Kabogu kotisanu migamba na biotsu abivu nenu o gusu kana o bivanga, mfula jimamanyi jiunogulu batu botsu na bibulu biotsu abavu o gusu kana; abagokotusu o mandagu bofu.

²⁰Basalitsi baPharaon basusu bamaduma mbembu Fumu kabogu bamarumisa baviga ukotisa migamba miogu o bivanga.

²¹Tumba basusu abasamakipa mbembu Fumu bamasila baviga na migamba miogu o gusu kana.

²²Fumu amaruma Moise rie: Samba gogu agu o julu yiri mfula jimamanyi jiunogulu batu na bibulu na bivaru o bulongu buotsu buEgypte.

²³Moise amasamba nguangu andi o julu; Fumu amabasisa julu jiotsu na bidumi na mfula jimamanyi jimanoga, muji umayenavendumuganga. Mbana Fumu amanoyisa mfula jimamanyi o bulongu buEgypte.

²⁴Mfula jimamanyi jimanoga na muji umasobana na jionyi; jimaba tindi mfula ajisakalabana na kala o bulongu buotsu buEgypte ubandila vana dibandu dibulongu bueni.

²⁵O bulongu buEgypte mfula jimamanyi jimanogulu botsu abamaba o gusu kana: nesi batu nesi bibulu; mfula jimamanyi jimabivisa nesi bivaru nesi miri.

²⁶Yika o yiari yiGochen buandi, agu baIsrael bamatsaninanga agusamanoga mfula eni.

²⁷Pharaon amaruma batu uyenengila Moise na Aaron na amabatsingula rie: Temu ejiji nyisingi nyimavaga dibi; Fumu aguvu usungama, jetu na batu bami tuna mbela.

²⁸Sambilanu Fumu yiri vayamueba bidumi na mfula jimamanyi; mbana nyuduwensa na batu benu, ngomuedusikiga.

²⁹Moise amamutsingula rie: Yiotsu ayi nyugusuyila va musiengi nyusamba miogu miami ombu Fumu; bidumi biuvola na vagomuenoga mfula jimamanyi mbana gujaba yiri butamba buotsu buvu buFumu.

³⁰Viaga! Jenu na basalitsi bagu dugoduma Fumu Nsambi nyidujabi.

³¹Bivaru bilina na orsa bimabungu mu mbari orsa tsimawela na bilina bimawansa.

³²Bivaru bible bisamabungu mu mbari temu tsiogu mbe tsisakatola.

³³Moise amapala o ndagu Pharaon uwenda o disogumunu; amasamba miogu miandi ombu Fumu na amasambila. Mbana bidumi na mfula jimamanyi bimavola, mfula jisamamuenoga.

³⁴Pharaon anolaba yiri mfula na mfula jimamanyi na bidumi bimavola, amavaga dedi mosi nana na kala, amamuegalisa murima andi, jogu na basalitsi bandi.

³⁵Pharaon amagalisa murima andi na amabusa uwensa baIsrael, nana Fumu amalubusila Moise.