Read Punu Job 12 Bible Online

Job 12 - Punu bible

Job 12

¹Job amawaka rie:

²Kabogu, jenu aduijabi motsu yiotsu ayi dufu, dujabu duotsu dutsiemuga.

³Meʼ wami nyikeluli motsu, ngaa yiduka yienu. Anyi agejabi adi duivosi?

⁴Nyimanengila Nsambi na ditasa ukwagulu, diambu yi nsilaba? Labatianu, nyivu kwaku jibambatsi bami. Bekalusi musinginyi aguvu usungama kwaku!

⁵Agumakambulu egengulu va kodu disu. Batu abavu sui bevayi dedi, adina bevayili abamasietuga.

⁶Duvotsu duvu o mandagu mabikongu, abenyoyisi Nsambi bavu sikiri beyitsi yika mangolu majogu beni.

⁷Wivulanu bibulu na batsoli: diudulonsa.

⁸Vosanu na butamba, bujaba udulonsa, banyama bamamba bana mambu mapuela udulonsa.

⁹Va gari bisundu biotsu va yimosi ayigejabi yiri Fumu erumi motsu?

¹⁰Jandi oyikipi bisundu biotsu, nesi muvumu umutu uotsu.

¹¹Bagevosi rie: Munu ugulu mugangu ubiguji matuji mepitsi mambu.

¹²Bununu buiveyingi dujabu yitsingu yiveyingi diela.

¹³Tumba dujabu na diela bivu na Nsambi va julu vana avu na mangolu.

¹⁴Abi Nsambi epansi bigomuerungululu; agu edibiyi agowaku kalala.

¹⁵Pa esikiyi mfula, mijamba mikamuyi; pa enoyisi mfula mijamba mipubuyi.

¹⁶Ana mangolu na buketi. Pa mutu otsiemuga vo utsiemusa mutu nandi Nsambi agodijaba?

¹⁷Ebeyi baneni o buviga, ekalusi bansonsi biduka.

¹⁸Ekalusi bakaga baviga, ejeyisi basalitsi bogu.

¹⁹Ekalusi bavagulitsi bapagu baviga, etsiemusi mangolu mabango mangolu.

²⁰Egusuli posulu tsijogu abejabi uvosa, etsiemusi dujabu dubinunu.

²¹Esingisi yiri batu bolensa baneni, esingisi barumitsi upatulu mangolu mogu.

²²Ekotisi yijalala o pisama, ekalusi pisama tindi yijalala.

²³Efunisi bisi malongu mbana ebabungi wandi; eleroyisa malongu mbana ebagabusi mandilu mogu.

²⁴Epatuli bivunda bimaiongu musuga ogu, ebalinsingi o kumu atsigaa na mansila;

²⁵beyenabembatana o tsi pisama, bagelabi yijalala; ebapepilisini nderi balangitsi bavu.