Read Punu Job 13 Bible Online

Job 13 - Punu bible

Job 13

¹Nyimalaba motsu mana na misu mami, nyimagulu motsu mana na matuji mami.

²Ama jenu duijabi, nyimajaba wandi, ngaa yiduka yienu.

³Tumba nyirondi uvosa na Nsambi, Mungo Mangolu Motsu; nyirondi umana munu ami va gusu Nsambi.

⁴Mbe ka jenu duvu bafuritsi, duvu nderi banganga abagaa na tsongu.

⁵Uviolila ubueji pa duba sui. Ayina mbe yiuba yilimba yiri duna diela!

⁶Kokolu tsienu, leguluanu munu ami, banu iimba ugulu posulu tsiami.

⁷Duvosila Nsambi amagaa mangensa? Duilasi bilimba abigeruyili ombu gandi?

⁸Duirondi uvayila Nsambi dupasu dubatu? Duifurili Nsambi upalisa munu andi,

⁹Pa oweliga mirima mienu odulaba duwelimina? Dugorungula udunsa Nsambi nana duidunsili batu!

¹⁰Pa duivayi dupasu dubatu o musuega, dingensa odusiemba.

¹¹Buneni buandi bugodubakiga mirima? Goma andi jigodugaanga?

¹²Mitsundu mienu mivu nderi dibufu o misu; bunsonsi buenu buvu nderi diobu.

¹³Volanu sui, nyirondi uvosaʼ Adi nyuvosa diukengila!

¹⁴Nyiji nyikunsama, ne pa nyukerombila mbela dufu!

¹⁵Ka yia, Nsambi omboka! Nyisaa na tsongu! Nesi nana nyumana munu ami va gusu andi.

¹⁶Adina diuba dugobutsu duami mu mbari mutu mubi agorungula ulabana va gusu Nsambi.

¹⁷Guluatianu mambu mami, liganu matuji ugulu ama nyuvosa.

¹⁸Meʼ jandu gu, yika munu ami ngamana: nyijabi yiri nyina ndunga.

¹⁹Mutu otsunda nami? Pa nyina mbela, nyuba sui novivanga dufu.

²⁰Aa Nsambi ami, nsingisi mambu mabeji buandi, mbana nyurungula ulabana nagu:

²¹tetega, kwaki kalala, goma jiyamuekaanga.

²²Ndengili, nyuwagula, vo pa nyuvosa, ndeʼ gukakwagula.

²³Mbela tsiami na masumu mami kwe bivu? Njabisi nana nyimagulensila.

²⁴Dibandu yi guindiyili nsima? Dibandu yi guikengili nderi muvinitsi agu?

²⁵Anyi guibingi? Dugaji aduivembuyi? Anyi guidukingi? Mikondu amivembuyi?

²⁶Guisoni nsimbulu tsiami tsiotsu, nesi buduka bubufudu buami.

²⁷Guikotisi makulu mami mu bivangu, guikelisi mami motsu, guikunsi nesi mandilu mami!

²⁸Nsanunu ami jivu nana muiri aguvu puiti na nana yiduani ayimaligu na bamburutotu.