Read Punu Job 14 Bible Online

Job 14 - Punu bible

Job 14

¹Dibaala, muana avu agumaburu na mugetu. Nsanunu andi jivu jigufi na jibasa na maguga.

²Avu nderi felera ajinyanguyi mbana jigoluyi, avu nderi yidumbitsi, uvioga yivioyi.

³Nsambi ami, ndeʼ guikengili yisuisu! Va julu vana guikwendisi o bunsonsi.

⁴Mutu aguvu nsoruru onmgula ubura aguvu ulioma? Tsatsabi?

⁵Yitsingu yimutu yivu yigufi, gumatabula dutalu dubatsungi bandi nagumamulonsa kala mandilu mandi.

⁶Guyamuemulega asangili dedi mosi na musalitsi oyimanina yisalu yiandi.

⁷Labatianu muiri: ne pa uwangu ukivu na tsongu, uimuebenda bakola nofunisa magaji magona.

⁸Pa ngansi tsiandi tsimatsinga o tsi butamba ne pa yibibili yiandi yimafu,

⁹mua pesu mamba guimuefula magaji, nyiina, uibendisi bitayi nderi yivaru yigona.

¹⁰Tsi nana na mutu pa amafu avotsu, pa muvumu unotabuga, agunyi akivu?

¹¹Mamba madianga mesieyimi, mijamba mikamuyi, tindi ukamuga.

¹²Dedi mosi na mutu anobuagu agemuesimbuga, agomuerambuga yilu yiusita te na julu jiuvioga, agorambuga via!

¹³Aa Nsambi ami mbe guirondi unsuega o mbura jiabafu, ndibini te na kabu agu jiusaguga, te na yilumbu ayi gumuetangimina!

¹⁴Je mutu anofu orungula umuedila monyu? Adina diupega pugu yitsingu yiami yiotsu, te na yilumbu ayi guyinsimbulila.

¹⁵Gundengila nyuguwagula; ava gubila na nsala ami, menu yisundu yiagu!

¹⁶Va temu ejiji utala guitali taka tsiami, gugegengili mabi mami yisuisu;

¹⁷mabi mami mamatungu diumbi adi gumanamiga yilimba yiagu.

¹⁸Mikongu mimabungalana na mimasiengumuga mamanyi mamabungalana.

¹⁹Mamba mepukuli mamanyi butamba buisiengumunu na mipupila. Anana ndeʼ wagu guibungili ditasa dimutu.

²⁰Guimulasi maguga te na orina; dufu duimuvivisi, guimubingi.

²¹Ne pa baana bandi beyitsu, agemuedijaba; ne pa bamalensu agodilaba.

²²Wandi pinsa egulu buali wandi pinsa egulungu munyongu.