Read Punu Job 28 Bible Online

Job 28 - Punu bible

Job 28

¹Lora jivema jivu na mbura aji jitimunu, lora jivu na mbura aji jiwansulu.

²Mbe ka budilu buipalusu na difufundu, mamanyi mabuonyi mesulumusu udila kunga.

³Babaala berombili mamanyi o tsi butamba na balambi, utima betimi, udonsa bedonsi o tsi mamanyi mapinda.

⁴Bevayi bandengu o tsi butamba nderi bakumbi. Vala na batu va mbura atsigeviogulu, babaala aberombi mamanyi usunduga besunduyi mu mikudu.

⁵Butamba buibendisi digumba tumba o tsi buvu naeri bumanyensu na muji,

⁶buvu na mamanyi masafira amuna bedili lora wandi.

⁷Dusuyi agejabi bandengu beni, nesi nyunga jigerunguli ubilabilila.

⁸Ne yimbungu yigevioyi muna, nesi yivimda yibibulu yisakavioga muna.

⁹Mutu upasa epasi mamanyi, nesi utima etimi mikongu.

¹⁰Utoba etobi bandengu mu mamanyi, ulaba elabi mamanyi madufunu duneni amavu muna.

¹¹Ukanda ekandi mueyi usikiga mamba, upalisa epalisi abivu bisuegu muna.

¹²Dujabu aguʼ duvu? Diela divu na dibandu?

¹³Dugorungula usumbu na batu; dugaa mu butamba buebubu.

¹⁴Dusatsi, nesi o mbengi nesi o mubu.

¹⁵Dugosumbu nesi na lora dugosumbu na lora jivema.

¹⁶Dugaa dedi na lora jiOfir, nesi na mamanyi madufunu duneni: komayi na safira.

¹⁷Duiviolili nesi lora nesi mamanyi madufunu duneni, dugorungula usopunu na yisanga yilora.

¹⁸Tsiri uranguna mamanyi: korayi na dusiengi… Dujabu duvu na dufunu ne uviolila dimanyi diperala.

¹⁹Nesi matopasa maEthiopie, nesi tindi lora jigaa dedi na duonyi.

²⁰Kabogu dujabu agunyi duiruyisini? Diela divu na dibandu?

²¹Dugelabini na batu, dugelabini na batsoli ava bevioyili o julu.

²²Dubungu na dufu bivosi rie: Tumagulu misamu miduonyi.

²³Nsambi ejabi agu duiruyili; yika jandi ejabi dibandu didujabu,

²⁴mu mbari elabi te no masuku mabutamba, na egengili biotsu abivu va butamba.

²⁵Ava amavayila mangolu mapunga, ava amapitsila yietsu yimamba,

²⁶ava amakunsila bietsu bimfula, ava amakunsila nsila tsikaki na tsibidumi,

²⁷avana dujabu duvu, amadupalisa ava amalasila mangolu maduonyi.

²⁸Mbana amatsingula batu rie: Uyitsa Fumu la dujabu! Ukakana na mabi la diela!