Read Punu Job 31 Bible Online

Job 31 - Punu bible

Job 31

¹Nyimagana kaka, ngonyungila tsiemi.

²Pa digaa nana dibandu yi nyuvivila udila dikabu diNsambi aguvu na mangolu motsu aguitsani ojulu?

³Tsia dubungu dugengila yikongu? Tsiri jogu abavayingi mabi abelabingi mabi?

⁴Nsambi agejabi bifu biami? Asamatala taka tsiami tsiotsu?

⁵Dingensa gumandabanga ufura nyifuri? Gumandabanga udunsa nyidunsingi batu?

⁶Nsambi apitsi mu midodu miwelimina, mbana ojaba usunda uami!

⁷Pa nyimapembuga nsila aji amandonsa, pa nyimanyungila abi nyilabingi, pa makaka mami mamasala nsoruru,

⁸kabogu abi nyimavara mutu susu otsonsiga manungi marakulu!

⁹Pa nyimanyungila mugetu vo pa nyimaviva mugatsi umutu nami,

¹⁰kabogu mugatsi ami osalila dibaala disusu, basusu mbe bofubana yitsiga nandi!

¹¹Mu mbari adina mbe diuba dineni, adi mbe diuba diweiimina ukilusu na bansonsi.

¹²Dibi diami mbe diuba nderi muji agu mbe unsielasana te na mbe nyubungu, agu mbe ubunga busina buami buotsu.

¹³Ava musalitsi ami udibaala nesi umugetu bamabila na musosi nami, je nyimabusa ubatabulila bunsonsi?

¹⁴Yi nyuvaga ava Nsambi ofundisila? Diambu yi nyumuwagula?

¹⁵Jandi agumansunda o moji nguji ami asamasunda musalitsi ami wandi?

¹⁶Je nyimawimina bijaga abi bamaponda? Je nyimarombisa bakuili ukambulu?

¹⁷Je nyimajanganga biguji biami meʼ beni tsiri ugabila yisiana?

¹⁸Ubanda va bungebi buami nyimaba nderi taji andi, nyimaba mulonsi-nsilaubakuili.

¹⁹Je nyimalaba mutu agusamaba na biduaru, nesi yijaga ayisamaba na dimfunga?

²⁰Tsia bamakabusila diboti dimamfunga amamavagu na mionyi mibindombu biami?

²¹Pa nyimabega yisiana o bunsonsi na ditasa umulasa maguga mu mbari nyimajaba bansonsi botabulila bunsonsi buyimbambila,

²²mbe disambaka diami diusukuga mbe gogu ami utabuga va konongu!

²³Mikilu miNsambi mindasi goma ngorungula ugengila bundumba buandi.

²⁴Je nyimavayila lora yitu? Je nyimavosa rie: Lora jivu tsongu ami?

²⁵Nyisamasangila mu mbari nyina bima bipuela, nyisamasangila busina buami.

²⁶Ava nyimagengilila wisi ava umalulila nesi tsungi ava jimavioyilanga,

²⁷je murima ami umadutu na bionyi? Je nyimabiyitsa nderi bansambi?

²⁸Mbe nyimadivaga mbe diuba dineni diwelimina ukilusu na bansonsi, nyuba na penda va gusu Nsambi aguvu o julu.

²⁹Je nyimasangila ava muvinitsi ami amalabila maguga nesi ava amabetsulu?

³⁰Ka muna dibi di mbe nyimavosa rie: Nsambi muboki!

³¹Anyi asamagukuru o ndagu ami? Abetsani o ndagu ami bodisingisila bumbeji.

³²Je muenyi amasilimina va gusu kana mu mbari nyisamamudibulila yiabutsu yiami?

³³Je nyimakubiga nsimbulu tsiami nana Adam? Je nyimabusa mbela tsiami?

³⁴Ngelabi goma uba va gusu batu, nesi ulensungu na batu bapuela, je nyimatsana o ndagu ami urina dionyi?

³⁵Aa mbe mutu okulu! Aguna la munu ami! Mungo Mangolu Motsu akwaguli! Anyi okwakisa mufundu agu muvinitsi ami amasona?

³⁶Mbe nyugubega va masambaka mami, mbe nyuguduara va mbami ami nderi dugaba.

³⁷Mbe nyubambana na Nsambi umudendulila amami motsu mbe nyukelasa va gusu andi nderi nyivu muanakaga.

³⁸Mbe butamba buami bukamuyila mbe migondu miulilanga

³⁹mbe nyimaji abimavaru muna tsiri ufuta mbe nyimalitsa abamabudila.

⁴⁰Amana mbe moba yika matsiendi na matsiendi amobendanga muna, yika diabu diubenda tsiri orsa na ble. Mambu maJob mamasuka!