Read Punu Job 32 Bible Online

Job 32 - Punu bible

Job 32

¹Elifaz na Bildad na Sofar bamadunda uwaka Job mu mbari amakelaba awelimina.

²Mbana Elihou muana dibaala uBarakel muisi yifumba yiBoaz nesi yiRam amanyoga kabu jineni. Amanyoyila Job kabu mu mbari amavosanga yiri avu awelimina va gusu Nsambi.

³Amanyoyila bambatsi bandi barieru kabu mu mbari basamadila diambu uwaka Job va julu vana bamamuvega mbela.

⁴Elihou amalekela uvosa na Job mu mbari basusu bamaba bivunda biandi.

⁵Tumba anolaba yiri babaala beni barieru bagemuewaka ne diambu, amanyoga kabu jineni.

⁶Elihou amavosa rie: Nyivu mufudu na duvu bivunda; la dibandu nyimasutu, nyimatsikadana udupalisila diela diami.

⁷Nyimatasa rie: Bivunda bolevosa, bilima biogu bipuela biubavega dujabu.

⁸Tumba Yinyunyi yiveyi mutu uotsu diela, punga jiMungo Mangolu Motsu jiveyi dujabu.

⁹Bilima bigeveyi diela, buvunda bugeveyi musuga.

¹⁰La dibandu nyivosili rie: Guluatianu! Meʼ wami nyupalisa diela diami.

¹¹Nyimagulu disukusulu diposulu tsienu, nyimaviva ugulu dibandu dikabusulu tsienu, ava dumakelulila posulu tsiJob.

¹²Nyimaba liyiyi udugulu; ne mutu mosi va gari enu asamajaba ukelula amandi, ne mutu mosi asamawagula amandi.

¹³Tumba duyavosa rie: Adudu la dujabu; la Nsambi agurungula umukambisa tsiri jetu!

¹⁴Mambu maJob magembembi murima, mbe ka amenu, ngomakipa umuwagula.

¹⁵Dumagaangu na goma, dugomuwagula, dugejabi adi duwaka!

¹⁶Uviva nyivivi, tumba dugemuevosa, utsana duitsani nderi mababa,

¹⁷meʼ wami nyirondi uduwaka! Nyirondi upalisa ditasa diami.

¹⁸Murima ami uipeyi puela mambu uvosa, diela diami ditumi umavosa.

¹⁹Nyiina, murima ami guifutsi nderi malamu amamadibugu amorubisa yivagulu ayi mavu.

²⁰Kabogu nsingisianu uvosa mbana nyuvuma; nyumana munu ami nyuwagula mutu mutu.

²¹Dingensa ngogengila yinsi yimutu na ngokakisa ne umosi va gari enu.

²²Ngekakisi; pa nyudivaga Musunditsi ami agotamba nokusula.