Read Punu Job 33 Bible Online

Job 33 - Punu bible

Job 33

¹Job tsie gulu posulu tsiami, liga matuji ugulu mambu mami motsu!

²Gulu yika uvosa ngavosa.

³Nyuvosa na murima usunda, nyuvosa tindi ngensa.

⁴Yinyunyi yiNsambi amansunda punga Mungo Mangolu Motsu jipeyi monyu.

⁵Kwagula pa gurungula, ba ukunsama umana munu agu!

⁶Labati jetu nagu tuvu dedi va gusu Nsambi; meʼ wami nyimabumbu na diga.

⁷Kabogu guyaregama va gusu ami, guyatasa nyirondi ugukambisa.

⁸Gumavosa va gusu ami, nyimagulu gumavosulilanga rie:

⁹Menu ngaa na mbela, ngaa mumbini uNsambi, ngaa na nsiembu na ngaa na mabi.

¹⁰Ne nana Nsambi etombisi mbela, ekaagni muvinitsi andi.

¹¹Ekotisi makulu mami mu bivangu, egengili motsu ama nyivayi.

¹²Nyuguwaka rie: Guna mbela mu motsu mana, Nsambi avu muneni agetsundi na mutu.

¹³Dibandu yi guitsundili nandi rie: Je Nsambi ekipi mambu mami?

¹⁴Nsambi elubusi na elubusingi ne nana batu bagekipingi.

¹⁵Elubusingi mu mandosi nesi mu biriariamu, ava nyuru tsivu dunsansa tindi dunsansa ava batu bavu bilu tindi bilu va tangi tsiogu,

¹⁶avana epandulili matuji mabatu na ebalubusi tindi ulubusa

¹⁷yiri boliyila bifu biogu bibi nsima yiri botsiemusa dunangu duogu.

¹⁸Anana ebarinisili dufu, yiri bagoboku na dijenga.

¹⁹Nsambi ekilisi mutu na maguga amemusiliyi o tangi, dibagu dimureyimisi;

²⁰ubusa ebusi biguji biotsu, nesi abi erondingi.

²¹Ogasa tindi ugasa te na oba yika bivisi na bivisi.

²²Makulu mandi maka o yiduna, yika ufu efu.

²³Tumba diuba diwelimina yiri yiansa oba va mugula umutu eni, yimosi va gari bivevi biNsambi, umulonsa nsila jisungama.

²⁴Yiansa omulasa yingeba na ovosa na Nsambi rie: Muwaki kalala ayakota o yiduna, nyimadila nyobu andi!

²⁵Dunyuru duandi dumuebanganga na mangolu; dedi mosi nana dumabila va bufudu buandi.

²⁶Mbana osambila Nsambi agusinga dusambu duandi, okelasa va gusu andi na nsangu mu mbari Nsambi amamugabusa nana amalebila.

²⁷Ewimbili va gusu batu botsti rie: Nyimavaga masumu, nyisamakipa migaga, tumba Nsambi amakusulila mukilu ami.

²⁸Nsambi amakwaka kalala yiri ngomuefu nyikivu monyu, nyilabi yijalala.

²⁹Nyiina, Nsambi evavayilingi mutu uotsu nana, ne temu beji ne yirieru.

³⁰Ebafuli o yiduna ebamonitsi yijalala.

³¹Job, ba limba nokululu! Vola sui mbana nyuvosa.

³²Pa guna diambu uvosa, kwaguli! Vosa! Mbe nyulaba ubueji uguvaga ndunga.

³³Pa gugaa na diambu uvosa, kululuati! Vola sui, mbana nyugulonsa diela.