Read Punu Job 34 Bible Online

Job 34 - Punu bible

Job 34

¹Elihou amamuevosa rie:

²Batu badiela guluanu posulu tsiami; jenu aduvu na dujabu, ndiyilianu matuji.

³Dituji digulu mambu dedi mosi nana yilansi yigulusunu mugangu.

⁴Tusolianu amavu mawelimina, tulabianu amavu masungama.

⁵Job amavosa rie: Ngaa na mbela, Nsambi agekipi musuga ami.

⁶Agekipi ngensa ava etabulili bunsonsi; diuleba ngaa na mbela, amadimba kuba jidufu.

⁷Munongu mutu yi Job avu? Ewarili dipeji nderi mamba enu!

⁸Elingi va mosi na batu babi, avu kingu mosi na abagekipi yitu nesi migaga.

⁹Tumba amavosa rie: Diuleba mutu agelabi ubueji na Nsambi, tsongu jika?

¹⁰La dibandu jenu aduvu na diela, kululuanu! Nsambi agaa na mabi; Mungo Mangolu Motsu agaa asungama?

¹¹Efuti mutu mutu dedi na bisalu biandi, ekelisi mutu mutu na bifu biandi.

¹²Viaga, Nsambi agevayi mabi; Mungo Mangolu Motsu agetsiemusi dusungugu!

¹³Mutu amamuvega yisalu uruma bisi bulongu? Musuga andi uruma bulongu ugaa ujaʼ beni?

¹⁴Mbe Nsambi okipa yika amandi, nogusula Yinyunyi yiandi

¹⁵biotsu abivu monyu biutsiemuga na batu bogabuga o difufundu.

¹⁶Job pa guna diela, legulu diambu diedidi, liga matuji ugulu ama nyivosi!

¹⁷Je Nsambi orungula urumanga bulongu pa evini dusungugu? Je guna bukidi uvega agusungama mbela?

¹⁸Yika jandi etubuli ubiva ubakaga, nesi mabi mabaana bakaga?

¹⁹Anyi agekipi baneni? Va mutu agugaa na dupasu dubisina na bijaga? Tsiri jaʼ beni agumasunda botsu?

²⁰Mua pesu temu botsu befu va gari mukolu, batu bepupusu te na betsiemuyi, bango dikasi besundili utsiemuga.

²¹Nsambi elabi bifu bibatu botsu, egengili taka tsimutu mutu.

²²Vagaa ne pisama jiwelimina umugubitsa ulaba bavayitsi bamabi.

²³Nsambi agaa na nsala unengila mutu, umutabulila bunsonsi.

²⁴Agaa na nsala ukelula ubapansa, esundili uvinsa basusu va mbura tsiogu.

²⁵Ejabi bisalu biogu, ebagusuli nesi ubagesumuna mima mukolu mosi.

²⁶Ebadimbi va gusu batu nderi bikongu bavu.

²⁷Bamamuliyila nsima na basamamuekipa amandi.

²⁸Bamarombisa abadeda na bijaga utatila Nsambi ubawamusa, Nsambi avu limba ugulu migamu mieni.

²⁹Pa jandi eveyi mutu yivumu, anyi obangisa kimbu? Pa esueyi yinsi yiandi anyi orungula umulaba? Dilongu? Mutu?

³⁰Etsiemusi durumu dubatu babi, dujogu aberambili batu mirambu.

³¹Diurungula uba mutu mubi ovosa na Nsambi rie: Nyimakilusu, ngomuevaganga dibi.

³²Ndasi ama ngelabi; pa nyimavaga amagaa mawelimina ngomuemavaganga.

³³Je Nsambi omukilisa? Ndeʼ aguvu na diela diotsu, yi guitasi? Ndeʼ gukatabula diambu tsiri menu, gukavosa adi guitasi!

³⁴Bango diela boba o yiari yiami, batu badiela abekulu botasa dedi mosi nami:

³⁵Job agejabi adi evosi, posulu tsiandi tsigaa na mavindugulu.

³⁶Mambu mandi meruyili batu babi, kabogu tumakelula tindi umakelula.

³⁷Va julu nsimbulu tsiandi ebuesi bumbini; utsunda etsundi na Nsambi te na eturombisi utumuna paga.