Read Punu Job 37 Bible Online

Job 37 - Punu bible

Job 37

¹Motsu mana meteyimisi, murima ami yika uregama.

²Guluatianu, guluatianu yidumi ayipalili munu Nsambi! Ka muna bidumi bi binsieyirini!

³Bigulunu o julu jiotsu dusiemu duandi duivedimi te no masuka mabulongu.

⁴Va julu vana diufi diNsambi digulunu, diufi ditindi Nsambi. Vana temu eni emuevedimisa tsiemu tsiandi.

⁵Nsambi egulusu yidumi yiandi; edugusu yimaga ayi tugorungula utsiyisa.

⁶Erumi mfula jivema rie: Noga! Evosi na mfula nesi jigeyi nesi jineni rie: Waranu!

⁷Etutsi bisalu bibatu botsu, yiri botsu bojaba bavu bisundu biandi.

⁸Bibulu bimusiru besuemi o dilima betsanini nesi o puiti.

⁹Yimbongila yiruyisini o tandu na yiotsi yiruyisini o banda.

¹⁰Tsiri Nsambi aguiwarisi yiotsi te no mujamba nesi bivela bikiti?

¹¹Nsambi ebasi mamungi mamba, ematindi yiari na yiari.

¹²Melingi yiari na yiari nana erumini, movaganga duganu duandi, mosalanga bisalu biandi va tsi.

¹³Nsambi edugusu duganu duandi va tsi, temu tsimosi ukilisa batu temu tsisusu ubalasa maboti mandi.

¹⁴Job ba limba ugulu mambu memama? Muegengila maboti maNsambi.

¹⁵Guijabi nana Nsambi emarumini? Tsiri mu monyi tsiemu tsipalili?

¹⁶Guijabi nana mamungi melingingi? Uvaga motsu mana, vengu tindi dujabu.

¹⁷Guijabi dibandu yi guigulu yiusila ava punga jitandu jivepilingi?

¹⁸Ndeʼ gurungula uwamusa Nsambi unowala julu jigala ajivu nderi dumuenu dukunga nana Nsambi amavayila?

¹⁹Kabogu ndonsi abi tuwivula Nsambi. Jetu tuvu tindi biduka, tugojaba mawelimina uvosa nandi.

²⁰Vengu bomulubusa ne ngavosa? Vengu bomutsingula yiri odijaba?

²¹Labatianu, yijalala yimasundila utsiemuga, wisi umasuema o nsima mamungi.

²²Ava wisi ewendili mamungi o yiari yibanda meluli. Ka muna bundumba bu buitsiengili Nsambi!

²³Jandi avu Mungo Mangolu Motsu, anyi orungula umubemba? Avu tindi muneni na mangolu na dusungugu ne nana agekilisi abavu na dusungugu.

²⁴La dibandu batu bamudumi; agokambulu na basoyitsi badiela.