Read Punu Job 39 Bible Online

Job 39 - Punu bible

Job 39

¹Guijabi temu aji batsiesi beburili baana bogu? Guijabi yilumbu ayi bamaburulu?

²Gumatala tsungi tsimimi mogu? Guijabi temu aji beburulu?

³Beburi baana bogu na misongu yika usuka misuku.

⁴Mbana bewari; bebanguyili o musiru, yilumbu yimosi bekakini na banguji, bagemuegabuga via!

⁵Anyi esili buru jimusiru uyenawendanga kulini? Anyi amajinyangula mukudu?

⁶Nyimajivega kumu yiri ojitsaninanga nesi butamba bukali.

⁷Ureka jireki misiengi, jigewaguli diufi dimubeyitsi via!

⁸Jiyenavioga o mikongu udila biguji jivu na nsala jibiotsu abibendingi.

⁹Pasa jirondi ugusalila? Jiugaru ukotusu o yivanga?

¹⁰Gurungula ujitunga ubega yilala yiagu? Jiugusalila o manungi?

¹¹Gujivayila yitu mu mbari jivu na mangolu maneni? Gujiwakisa yisalu yiagu yiotsu?

¹²Gujivayila yitu yiri jiugukotisila digumba diagu?

¹³Otarisa jivuyi mapapi na nsangu; tumba magaa dedi na mapapi na tsala tsisigonya.

¹⁴Jisili makeji mandi kulini, jimakubiyi yisieyi;

¹⁵jilibini yiri morungula utsiarulu nesi yibulu yimusiru orungula umagesumuna.

¹⁶Jigekipi baana bandi, bavu nderi tsiri abandi; nderi kulini jitsitsoga ubura makeji.

¹⁷Nyisamajivega diela nesi murima ukipa abandi.

¹⁸Ava jirondili uwenda jina muendu ne uviolila kabala na mubeyitsi andi.

¹⁹Je ndeʼ aguiveyi kabala mangolu? Ndeʼ aguiretsiyi dungongu duandi?

²⁰Ndeʼ aguijidumusi dedi mosi na dikokoku? Utata uandi guilasi muvinitsi goma.

²¹Jitimi butamba ulasa ubueji uandi nesi mangolu mandi, jiwendi o ubengusana mabadi mabavinitsi.

²²Jigelabi keri na goma dijenga digejigabusi mansinsima.

²³Diuleba mubeyitsi andi eduari dupalu nesi dikongu nesi dijenga, biotsu bina bigejilasi goma.

²⁴Jidumuyi, jifutsi nesi butamba, jigorungula uba sui ava jigululu diufi dimumbanda.

²⁵Jiwaguli ava mumbanda uisigulu. Jilabilili divita o vala jigulu maruma mabivunda bibagora nesi migamu midivita.

²⁶Je diela diagu dilonsi muietsi upurumuga? Dionyi dimulonsi usamba mapapi mandi o yiari yitandu yiri tsala tsiandi tsigona tsiubenda?

²⁷Na musuga agu nyunga jipurumuyili nesi urunga diuva o mandeka?

²⁸O gari mamanyi jitsanini agu mutu agorungula utola.

²⁹Ulega jileyi ayi jiugaanga jiyilabilili nesi yivu tindi vala.

³⁰Baana bandi beduri malungu. Va mbura jiotsu ajivu mfumbi avana banyunga bobengunina.