Read Punu Job 5 Bible Online

Job 5 - Punu bible

Job 5

¹Nengilati! Mutu oguwagula? Muisi julu nyi agu ndeʼ gutatila?

²Yiduka uwava ewavi, dionyi diumuboka, yifufu unyoga enyoyi, yionyi yiumurombisa dufu.

³Dingensa nyimalaba yiduka na maboti mandi, nyimasundila uloga ndagu andi mu mulogu egugu:

⁴Baana bandi bayaba na duwamusu duotsu, ne o mulebi, mutu ayabawamusa!

⁵Dutsonsugu duogu dudagu na minsansala! Batsonsi ajiusiala o yiari yimatsiendi, busina buogu budagu na bango ngusu.

⁶Mabi magepali mu difufundu maguga magebendi mu butamba.

⁷Mutu amaburu utsoganga dedi mosi kagala tsivembuyingi.

⁸Mbe ka menu, Nsambi la duwamusa duami ombu gandi nyuwakisa diambu diami.

⁹Evayi mambu maneni amagorungula uwelugu, mambu mandi mavu maneni, magaa na durangu.

¹⁰Enoyisi mfula utsatsa butamba, enoyisi mfula utsatsa manungi.

¹¹Ematisi abamasundusu; bango munyongu bomuesangila.

¹²Epansi bisalu bibasoyitsi badiela, ama berondi uvaga mesundili ubiva.

¹³Ebaguli basoyitsi badiela na diela diogu etsiemusi matasa mabasoyitsi badiela.

¹⁴Belabi tindi pisama muangulu, beyenabembatana nderi va gari mukolu.

¹⁵Nsambi egobuli agumabetsu nogu, ewakisi agumakambulu kalala.

¹⁶Emuebangusa ditasa diabamadeda, edibiyi batu babi miunu.

¹⁷Ka muna ubueji gu uvu na jandi agu Nsambi ekilisi! Na ndeʼ Job, guyalensa nsiembu tsiMungo Mangolu.

¹⁸Nsambi enemisi na ebuyi; eveyi migalala na emibelusi.

¹⁹Kumbu tsipuela oguwaka kalala, va disukusulu didiotsu, dibi digogubemba.

²⁰Va temu dungosu dunsala gugofu, va temu divita ogugobula.

²¹Pa batu bogufuengilila gukelusu, ava dubungu gugolaba goma.

²²Gureka dubungu nesi dungosu dunsala, gugolaba bibulu bibukanyi goma.

²³Manungi magu mobendisanga bivaru, ne va julu yilala yimamanyi ne pa bibulu bimusiru biukotanga.

²⁴Ndagu agu jiuba na duvotsu; ne yimosi yigogambu muna.

²⁵Gulaba bategula bagu bapuela bapuela. Bandelabongu bagu boba unyansa diteji mu dunyuru dumutu.

²⁶Nana bagogumbiyila digumba te na dimawela; ndeʼ wagu gugofu te na gununa tindi ununa.

²⁷Amana ama jetu tumalaba: amana mavu. Magulu nomagululu wandi!