Read Punu Job 9 Bible Online

Job 9 - Punu bible

Job 9

¹Job amawaka rie:

²Nyijabi yiri anana divu. Je mutu oba asungama va gusu Nsambi? Digorungula uba!

³Ne pa mutu otumuna paga na Nsambi, agowagula ne dimosi mu tosini mambu.

⁴Nsambi avu na diela diotsu na ana mangolu motsu. Anyi ogagana nandi nolunga?

⁵Esundili ubuaga mikongu o yiari yisusu, na kabu andi emigudiyi.

⁶Enyeyisi butamba tindi unyeyisa, te na bisiku bibuonyi birakuyi.

⁷Erumi wisi na wisi ugetebuga, edibiyi bambuelili na bagemuelula.

⁸Jandi pinsa erumi julu etsiarili mibiji mimubu.

⁹Jandi amasunsa bambuelili o julu; Grande Ourse na Orion na baPleiades nesi bambuelili batandu.

¹⁰Evayingi mambu maneni amagorungula utsigusu. Mutu agorungula utala bimaga biandi.

¹¹Guluati, uvioga evioyi va mugula ami ne nana ngemulabi ewendi na ngemulabilili.

¹²Pa egaangi mutu anyi orungula umupatula? Anyi owivula rie: Yi guivayi?

¹³Pa Nsambi enyoyi, agegabusi murima nsima; ne yiteli na Rahab na bambatsi bandi begudimi va gusu andi.

¹⁴Tambusa na menu, tsie nyumuwagulila? Paga yi nyutumuna nandi?

¹⁵Ne pa nyina ndunga ngowaka ne dimosi; vengu nyutatila nsonsi ami.

¹⁶Ne ava nyimunengilili diuleba ekwaguli, ngorungula usunsa murima nojaba amakulu.

¹⁷Jandi oyipepisilini mu mungudi, efunisi mapura mami ugambu dibandu.

¹⁸Agepeyi yivumu, efunisingi munyongu.

¹⁹Vengu tutoga? Jandi epiolili mangolu. Vengu tudibega o mufundu? Diwelimina yiri ombega o bunsonsi?

²⁰Diuleba nyina ndunga, ngekipingi, nyimatopulu na nsanunu ami.

²¹Nyiina, nyina ndunga! Ngekegengila, nyivini nsanunu ami.

²²Vana dedi! Nyurungula uvosa rie: Nsambi ebungi abavu na ndunga dedi mosi na abavu na mbela.

²³Ava yidungu yiusundila ulabana uboka abagaa na diambu Nsambi ulensa elensi maguga mogu!

²⁴Ava bulongu bumawakusu ombu mutu mubi; Nsambi edibiyi bansonsi misu. Pa tsiri jandi yika nyi?

²⁵Nsanunu ami jivioyi mbangu uviolila muvayitsi birela; jivioyi mbangu tsiri ulaba nesi maboti,

²⁶uvioga jivioyi nderi yilindi yilelenga nderi mbira ajileyi ayi oji.

²⁷Nyuvosa rie: Ngomuerangimina mitatu miami, nyulibana munyongu ami nosunsa murima.

²⁸Tumba unyonga nyinyongingi, nyijabi Nsambi agogusula mbeia ami.

²⁹Ne nana nyubanganga na mbela; dibandu yi nyuketsoyisili ugusula mbela?

³⁰Ne pa nyubuila na mamba mamfula jivema; noliomisa makaka mami na tsavu;

³¹okolasana va diobu biduaru biami biuba yika muinsi.

³²Nsambi agaa mutu nana menu, kabogu ngomuwagula, tugowenda va mosi o bunsonsi.

³³Mbe vavu mutu va gari etu aguigulu miunu miotsu mibeji.

³⁴Nsambi akusulili mukasa andi yiri goma andi jigomuekaanganga.

³⁵Mbana nyurungula uvosanga tsiri umulaba goma. Tumba adina digelabini, murima ami uvu o julu.