Read Punu Nyimbu 10 Bible Online

Nyimbu 10 - Punu bible

Nyimbu 10

¹Aa Fumu, dibandu yi guvu vala? Dibandu yi guisuemini va temu munyongu?

²Mutu mubi agaa na yisonyi ukambusa bijaga; awakululu mu murambu ujaʼ beni.

³Mutu mubi ekekakisa. Ka muna dunyungi du na nsumbumbu ji! Elensi na esiengi Fumu.

⁴Mutu mubi evosi na dunangu rie: Nsambi agekilisi via, agorungula! Motsu mana mavu matasa mamutu mubi.

⁵Agekambulu mu mandi motsu; agekipi bunsonsi buNsambi. Esiengumuni batu abemuvini nderi mungudi.

⁶Etasi rie: Ngopupusu, tsatsabi ngolaba maguga.

⁷Posulu tsiandi tsifunisi yika ndogulu, nesi ndunsulu, nesi dikasi; nyiina, posulu tsiandi tsibasa de na divina na maguga.

⁸Erambi mirambu va tsomu dimbu, evuni agugaa na diambu. Ulega eleyi mutu yika la mutu oyivioyi.

⁹Dedi mosi nana yimbungu esuemingi avu akunsama umulega, emusutusu ava emuwakusulu mu murambu andi.

¹⁰Ulega eleyi na udokimina edokimini ta na eboki agu eleyi.

¹¹Etasi rie: Nsambi agekipi, amatsimisa misu, agelabi.

¹²Aa Fum Nsambi, kokolu tsiagu, samba dikaka diagu!

¹³Dibandu yi mutu mubi egulensili? Dibandu yi etasili rie: Gugekipi?

¹⁴Tumba guilabi maguga mabijaga, guibawamusingi. Yifufu ekeveyi ombu gagu ndeʼ aguiwamusi bisiana.

¹⁵Pansa mangolu mamutu mubi agudendulili mandi motsu atsiemuyi tindi utsiemuga.

¹⁶Fumu avu kaga jimutubu te na mutubu; batu abagejabi Nsambi botsiemusa o bulongu.

¹⁷Aa Fumu, ndeʼ guijabi nsala tsibatu abelabi maguga, ndeʼ guiwarisi mirima miogu. Guibaliyili dituji ubagulu,

¹⁸nowamusa bisiana nesi abamakambulu. Bango dikasi bagomueba.