Read Punu Nyimbu 104 Bible Online

Nyimbu 104 - Punu bible

Nyimbu 104

¹Nyirondi ugabusila Fumu diboti! Fumu Nsambi ami ndeʼ guvu tindi muneni! Guvu na tindi bundumba,

²guikedibiga na yijalala nana tnutu eduari tsanda, gumarangiga julu nana mutu eduari tsanda,

³gumarunga mbura agu o julu agu mutu agorungula udala. Mamungi mavu nderi dikabu diagu guiwendingi va julu mapapi mapunga.

⁴Guivayi punga bilumbi, nesi muji uigusalili.

⁵Gumasunsa butamba va bibuga, bugopupusu via!

⁶Mubu umakubiga mbengi nderi yijungi, umadiamisa nesi mikongu.

⁷Gunogusiemba mamavindama unogulu yidumi yiagu umapubuga,

⁸umamata mikongu, umavindama te no bibususu te no mandilu ama gumavaga.

⁹Nyiina, gumagukusila mandilu amagolobugu, via, te na ugomuediamisa butamba.

¹⁰Ndeʼ Nsambi guibasi bileka o bibususu, mamba mabionyi mevindimi va gari tsimikongu.

¹¹Binuisingi bibulu biotsu nesi baburu bamusiru beyevotsanga puila.

¹²Mu miri amivu mu migula mibionyi batsoli berungi muva mu bitayi na bevosingi.

¹³Va mbura agu o julu guitsatsi mikongu; butamba bumagabulu miula miagu.

¹⁴Guibendisi biriri ulisila biruitsi, guibendisi bivaru udugusu nsala tsibalu. Anana butamba buibaveyili biguji:

¹⁵diva ubalasa nsangu na matsi ugolila na biguji ubavega mangolu.

¹⁶Fumu nesi misedera miLiban ami ndeʼ beni gumavara mimagulu mfula.

¹⁷Amuna batsoli berungi muva mogu; basigonya berungi muva muna wandi.

¹⁸Binsabi bimusiru betsaningi o mikongu misakama bangumba betsaningi o gari tsimamanyi.

¹⁹Ndeʼ Fumu gumasunda tsungi ugaba batemu; nesi wisi ejabi temu aji otsima.

²⁰Ndeʼ guisundusi pisama, mukolu ukavu, va temu eni bibulu biotsu bimusiru bilingingi.

²¹Baana babimbungu begumbi berombi biguji abi ndeʼ guibaveyingi.

²²Wisi unotebuga begusuyi; beyesilama o gari tsimalima.

²³Mutu epali uwenda o yisalu yiandi, esalingi te na tsisiga.

²⁴Aa Fumu, bisalu biagu bivu bipuela bipuela! gumavaga biotsu bina na bungela. Butamba buotsu bubasa na maboti magu.

²⁵Tuilabi mubu uneni uvu vumbila: amuna bibulu bipuela bipuela bilingingi, nesi bigeyi nesi bineni.

²⁶Mukuimbi melingingi muna na mukuimbi nyoga agu ndeʼ gumasunda uyenasananga na mibiji.

²⁷Bibulu bieni biotsu bigugengili yiri gubivega biguji va temu ogu.

²⁸Pa guibiveyi bionyi; bebiboli na begukuru.

²⁹Pa guibiwimini bibulu biukamabulu; pa guibipatuli muvumu, biufu; biugabuga o difufundu.

³⁰Guivotsi punga agu na bimasundu; biotsu bibutamba bimamuelabana

³¹Bundumba buagu Fumu bulabiningi te na mutubu! Labanga nsangu na abi gumavaga!

³²Guigengili butamba na buonyi buireyimi; guibembi mikongu, miotsu yika nsumbili na nsumbili.

³³Nyugabusilanga Fumu diboti yitsingu yiami yiotsu nyuyitsanga Nsambi ami te na dufu.

³⁴Aa Fumu, posulu tsiami tsigulasingi ubueji! Menu nyirondi usangila ndeʼ Fumu.

³⁵Bavayitsi bamasumu batsiemuyi va butamba. Batu abagekipi yitu nesi migaga, bayamueba! Nyiina Fumu, nyirondi gugugabusila diboti! Yitsanu Fumu.