Read Punu Nyimbu 119 Bible Online

Nyimbu 119 - Punu bible

Nyimbu 119

¹Ka muna ubueji gu uvu na jogu abagaa na penda, abekipingi migaga miFumu!

²Ka muna ubueji gu uvu na jogu abekelisingi maruma mandi, abemudedilingi na mirima miogu miotsu!

³Abana bagevayingi mabi betsaningi nana Nsambi erondili.

⁴Aa Nsambi, ndeʼ gumavega maruma magu yiri bomakelisanga na buranga.

⁵Kokolu tsiagu kwamusi ujaba ukekelisa yiri nyukelisa migaga miagu!

⁶Mbana ngolaba yisonyi ava nyumuegengilila maruma magu motsu.

⁷Nyuguyitsa na murima ami uotsu, ava nyuwijilanga migaga miagu midusungugu.

⁸Nyirondi ukelisa migaga miagu: guyandiyila nsima!

⁹Tsie mufudu osungiyila bifu biandi? Yika pa egulungu diufi diagu.

¹⁰Nyirondi ugudedila: guyansingisa ukakana na maruma magu!

¹¹Nyikelisi mambu magu mu murima ami yiri ngoguvayila dibi.

¹²Aa Fumu, diboti ombu gagu. Ndonsi maruma magu.

¹³Na munu ami nyitubuli motsu ama gumavosa.

¹⁴Nyilabi nsangu uduka maruma magu nderi nyimadila bungunu buotsu.

¹⁵Nyitasingi maruma magu na nyigengilingi mansila magu.

¹⁶Nyilabi ubueji na malongu magu; ngelibini mambu magu.

¹⁷Vayila menu musalitsi agu maboti yiri nyutsana sui nodedila malongi magu!

¹⁸Tiemusi yiri nyulaba maboti mamigaga miagu!

¹⁹Nyivu muenyi va butamba: guyansuega maruma magu.

²⁰Nyina nsala jineni ujabanga migaga miagu.

²¹Guisiembi bango dunangu, jogu bamalogu na bamakakana na maruma magu.

²²Kusulili yisonyi na dilensa; nyikevega udedila maruma magu.

²³Barumitsi bamagukama na bamatungila fundu tumba menu musalitsi agu nyitasilingi yika migaga miagu.

²⁴Nyiina, migaga miagu mindasingi ubueji: mivu milonsi miami miboti.

²⁵Nyimabetsu, nyimasilama va tsi: tambusi nana gumavanginina!

²⁶Nyinotubula motsu ama nyimavaga gumakulu; ndonsi kanu tsiagu!

²⁷Njabisi migaga miagu, nyumitasanga va mosi na maboti magu!

²⁸Tindi munyongu nyilabi: tetsiyi nana gumavanginina!

²⁹Kakisini na bifu bibi bimfurlu na mu maboti magu ndonsi ujaba migaga miagu.

³⁰Nyimasola uba usigama uagu, nyudedilanga migaga miagu.

³¹Nyikipingi maruma magu; Aa Fumu, guyandasa yisonyi!

³²Nyidedili migaga miagu na nsangu mu mbari guiroyisi dujabu duami.

³³Aa Fumu, ndonsi migaga miagu yiri nyumikelisanga te na mutubu.

³⁴Peyi diela ukelisa migaga miagu yiri nyumikelisanga na murima ami uotsu.

³⁵Ba mulonsi-nsila ami yiri nyujaba maruma magu nomarondanga,

³⁶yingusa murima ami uduka migaga miagu tsiri uduka busina.

³⁷Dibiga misu mami yiri ngokipa abigaa na tsongu, ndonsi nsanunu atsiugulasa ubueji!

³⁸Dugusulu menu musalitsi agu pangini agu aji gumavangana na basigama bagu.

³⁹Kusuli yisonyi ayipeyi murima o julu mu mbari maruma magu mavu maboti.

⁴⁰Nyina nsala jineni udukanga maruma magu; mu dusungugu duagu peyi monyu!

⁴¹Aa Fumu, ndasi yingeba yiagu kobuli nana gumavanginina!

⁴²Mbana nyurungula uwagula jogu abemfuengilili mu mbari nyimakevega mu mambu magu.

⁴³Kwamusi uvosa ngensa temu tsiotsu tsongu ami jiruyili bunsonsi buagu.

⁴⁴Nyukelisanga migaga miagu temu tsiotsu te na mutubu.

⁴⁵Nyutsana na tindi dujegusu mu mbari nyiduki maruma magu.

⁴⁶Nyutubula maruma magu va gusu bakaga dionyi digondasa yisonyi.

⁴⁷Nyilabi ubueji na maruma magu na nyimarondi.

⁴⁸Nyusamba makaka mami uyitsa migagai miagu ami nyirondi, nyutasanga maruma magu.

⁴⁹Rangimina pangini agu aji gumavangana na musalitsi agu ajimapega ditasa.

⁵⁰Ava nyilabili maguga guimbembiyi, pangini agu jipeyi monyu.

⁵¹Bango dunangu bendesingi, ne nana ngekakini na migaga miagu!

⁵²Aa Fumu, nyirangimini bunsonsi buagu abu gumatabula kala buonyi buimbembiyi.

⁵³Nyigaangungu na kabu jineni ava nyigengilili batu babi abeliyili migaga miagu nsima.

⁵⁴Maruma magu mavu dibandu dinyimbu tsiami nyumawimbila nesi o ndagu aji nyivu muenyi.

⁵⁵Aa Fumu, mukolu nyirangimini diina diagu! Va julu vana nyitasingi migaga miagu.

⁵⁶Nyilabi nsangu ukelisanga maruma magu.

⁵⁷Aa Fumu, nyimuevosingi rie: dikabu diami divu ukelisanga mambu magu.

⁵⁸Nyigulembiyili na murima ami uotsu rie: Ndasi yingeba nana gumavanginina.

⁵⁹Nyimatasa bifu biami nyirondi umueduka maruma magu.

⁶⁰Tsiri utsikadana nyisundili ededila maruma magu.

⁶¹Mirambu mibatu babi minsieengili yiari na yiari; ne nana ngelibini migaga miagu.

⁶²Nyiretsimi va gari mukolu uguyitsa, mu diambu dibunsonsi buagu busungama.

⁶³Nyivu mbatsi jibotsu abegudumi na jogu abekelisi maruma magu.

⁶⁴Aa Fumu, bulongu buotsu bubasa na maboti magu; ndonsi duganu duagu!

⁶⁵Aa Fumu, nde guivayili menu musalitsi agu maboti nana gumavanginina.

⁶⁶Ndonsi diela na dujabu! Nyivayili maruma magu yitu.

⁶⁷Mbe nyisakalasu yisonyi mbe nyimatsiemuga, tumba namunyi nyikelisi mambu magu.

⁶⁸Ndeʼ guvu muboti na guivayingi maboti; ndonsi duganu duagu.

⁶⁹Bango dunangu bensokili mamfurulu, tumba menu nyikelisi maruma magu na murima ami uotsu.

⁷⁰Jogu bana matasa mabuduka; tumba menu nyilabi ubueji namigaga miagu.

⁷¹Diwelimina yiri nyimalasu yisonyi, anana nyiwijili duganu duagu.

⁷²Ombu gami migaga miagu mivu miwelimina uviolila tosini tsibima bilora, nesi bilora jivema.

⁷³Ndeʼ beni gumansimda na dumambumba; peyi diela yiri nyuwiji maruma magu.

⁷⁴Ava basigama bagu bendabili belabi nsangu mu mbari nyivivi na nsangu adi guvosa.

⁷⁵Aa Fumu, nyijabi yiri bunsonsi buagu buvu busungama; na usigama uagu gumansingisa ulaba yisonyi.

⁷⁶Maboti magu mabi dubembugu duami dedi mosi nana gumavanginina na menu musalitsi agu.

⁷⁷Ndasi yiri guitondi mbana ngomuefu, nyina tindi nsala udedila migaga miagu.

⁷⁸Bango dunangu abendasingi maguga malalasa balasu yisonyi! Menu nyutasanga maruma magu.

⁷⁹Jogu abegudumi baruyi ombu gami, uyijaba migaga miagu!

⁸⁰Nyiyaba na mabeʼ mabeji mu maruma magu yiri ngolasu yisonyi!

⁸¹Nyina nsala jineni na dugobutsu duagu na nyitasingi pangini agu.

⁸²Misu mami yika tsasa uviva pangini agu; nyiwivuli rie: Temu yi gumbembiyila?

⁸³Nyivu nderi mua mukata agumabuagu va yitala; ne nana ngelibini duganu duagu.

⁸⁴Bilumbu kweʼ bikivu nami, menu musalitsi agu? Temu yi gutabulila jogu abekuani bunsonsi?

⁸⁵Bango dunangu abeduki migaga miagu, utima betimi dubila duami.

⁸⁶Maruma magu motsu mavu sikiri; bekuaningi makuakuana: kwamusi!

⁸⁷Jogu bamabumbeta nombunga; menu ngeliyili maruma magu nsima.

⁸⁸Tambusi nana divu diwelimina na maboti magu yiri nyumuekelisa migaga miagu!

⁸⁹Aa Fumu, mambu magu mobanganga mutubuojulu.

⁹⁰Usigama uagu uilabiningi te na kula tsiotsu. Ndeʼ gumasunda butamba na buvu sikiri;

⁹¹mu diambu dimigaga miagu biotsu bivu te na namunyi, mu mbari bima biotsu bivu o tsi durumu duagu.

⁹²Mbe migaga miagu migendasi ubueji mbe nyimafu kala mu maguga mami!

⁹³Viaga, ngolibana maruma magu, mu mbari monyi mepeyi monyu.

⁹⁴Menu nyivu mutu agu; kobuli! nyirorombi maruma magu.

⁹⁵Batu babi uviva bepivi umboka; nyivu nsumbumbu na nsala ukelisa migaga miagu.

⁹⁶Nyilabi mandilu magu magaa na mandilu.

⁹⁷Ka muna durondu du nyirondi migaga miagu! Bilumbu biotsu mivu dibandu dimatasa mami.

⁹⁸Maruma magu mepeyi tindi dujabu uviolila dubavinitsi bami, mu mbari mavu nami temu tsiotsu.

⁹⁹Nyina tindi diela uviolila milonsi miami mu mbari nyitasingi migaga miagu temu tsiotsu.

¹⁰⁰Nyina dujabu duneni uviolila binunu, mu mbari nyikelisi maruma magu.

¹⁰¹Nyibusi tindi ubusa mabi motsu, mu mbari nyikipi ama gumavosa.

¹⁰²Ngekakini na migaga miagu mu mbari ndeʼ guimindonsi.

¹⁰³Mambu magu mavu tindi maboti ne uviolila buji!

¹⁰⁴Maruma magu mepeyi dujabu, la dibandu nyivinini mfurulu tsiotsu wandi.

¹⁰⁵Mambu magu mavu nderi lambi ukwendisa na nderi yijalala umbonitsa nsila.

¹⁰⁶Nyukelisa pangini aji nyimavangana nagu ukelisa migaga miagu misungama.

¹⁰⁷Nyilabingi tindi yisonyi; Aa Fumu, kwamusi nana divu diwelimina na mambu magu!

¹⁰⁸Aa Fumu, kokohi tsiagu gulu tsambu tsiami, na ndonsi migaga miagu.

¹⁰⁹Nyibufuangingi temu tsiotsu, ne nana ngelibini migagamiagu.

¹¹⁰Batu babi betambili mirambu ne nana nyisakalibana maruma magu.

¹¹¹Migaga miagu mivu tindi diboti diami mutubu mu mbari mipeyingi nsangu.

¹¹²Nyimavega murima ami udukanga duganu duagu mutubu te na dufu.

¹¹³Nyivini bango mabeʼ mabeji, tumba nyirondi migaga miagu

¹¹⁴Ndeʼ guvu yisuemunu yiami na ngubu ami; nyina ditasa dipangini agu.

¹¹⁵Jenu batu babi kakananu nami, nyikelisingi maruma maNsambi ami!

¹¹⁶Tangimini nana gumavanginina yiri nyudila monyu, guyasinga yiri ditasa diami diutsiemuga.

¹¹⁷Ba muwarisitsi ami yiri ngoberuga; nyukipanga yika duganu duagu.

¹¹⁸Ndeʼ guibusi botsu abekakini na duganu duagu mu mbari ndunsulu tsiogu tsigaa na tsongu.

¹¹⁹Ndeʼ gugusula babi botsu va butamba nderi difuitsa, la dibandu nyirondili migaga miagu.

¹²⁰Nyireyimi na goma va gusu agu; nyidumi bunsonsi buagu.

¹²¹Nyikelisi migaga na nyikipi dusungugu, guyansila ava bakuanitsi bami bendasili maguga!

¹²²Peyi pangini yiri gukelisa menu aguvu musalitsi agu, guyasingisa yiri bango dunangu bondasa maguga!

¹²³Misu mami yika tsasa, uviva nyivivi duwamusu duagu, nesi dugobutsu adu gumavangana.

¹²⁴Vayila menu musalitsi agu adivu diwelimina na maboti magu, na ndonsi duganu duagu.

¹²⁵Menu nyivu musalitsi agu, peyi dujabu yiri nyujaba migaga miagu.

¹²⁶Aa Fumu, temu agu usala jimatola; jogu besumuni migaga miagu.

¹²⁷Nyirondingi maruma magu uviolila lora tsimunongu na munongu.

¹²⁸Nyilabi yiri maruma magu motsu mavu mawelimina, nyivini mfurulu tsiotsu.

¹²⁹Migaga miagu mivu yika miboti na miboti, la dibandu nyikevega umikelisa.

¹³⁰Dutsigusu dumambu magu duiveyi yijalala, meveyi dujabu ombu mavolambpmbu.

¹³¹Nyivu nsumbumbu mu mbari nyina nsala jineni ukelisa maruma magu.

¹³²Kengili nondasa yingeba dedi mosi nana guivayi jogu aberondi diina diagu.

¹³³Kwarisi mu mambu magu, guyasingisa ne dibi dimosi upiolila.

¹³⁴Kwaki kalala ava batu bendasili maguga yiri nyuyitsanga maruma magu.

¹³⁵Aa Fumu, ndasi yijalala yiagu, ndonsi duganu duagu.

¹³⁶Ulila nyililingi mu mbari batu bagekelisi migaga miagu.

¹³⁷Aa Fumu, ndeʼ guvu usungama, bunsonsi buagu buvu busungama wandi.

¹³⁸Migaga miagu milasi usungama na usigama uagu.

¹³⁹Murima ami uifutsingi mu mbari nyilabi bavinitsi bami belibini mambu magu.

¹⁴⁰Mambu magu magevinsi kingu, menu musalitsi agu nyimarondi.

¹⁴¹Nyivu ngebi na nyilensungu; ne nana ngelibini maruma magu.

¹⁴²Dusungugu duagu duvu mutubu, migaga miagu mivu mingensa.

¹⁴³Maguga na munyongu bikaangingi, ne nana maruma magu mendasingi ubueji.

¹⁴⁴Migaga miagu mivu misungama te na mutubu; ndonsi umitsiyisa mbana nyudila monyu.

¹⁴⁵Nyigunengili na murima ami uotsu, Aa Fumu, kwaguli nyirondi ukelisanga maruma magu.

¹⁴⁶Nyigunengili rie: Kobuli nyirondi ukelisanga migaga miagu.

¹⁴⁷Ne wisi akatebuga nyigugengili, nyivivi adi guvosa.

¹⁴⁸Mukolu uotsu ngewendi yilu yika utasanga mambu magu.

¹⁴⁹Aa Fumu, ndasi yingeba na maboti magu! Kelisi nana divu diwelimhia na malongi magu.

¹⁵⁰Bakuanitpi abavu na dikasi ubambana bebambini, jogu bagejabi migaga miagu.

¹⁵¹Fumu, ndeʼ guvu bebeli nami, maruma magu motsu mavu mangensa.

¹⁵²Kala kala migaga miagu mimanjabisa yiri gumamikunsa mutubu.

¹⁵³Gengila maguga mami nokwaka kalalaʼ Mu mbari ngelibini migaga miagu.

¹⁵⁴Kwaki kalala nonjeyisa, kobuli nana gumavanginina!

¹⁵⁵Batu abagekipi yitu nesi migaga bavu vala na dugobutsu duagu bagekipi duganu duagu.

¹⁵⁶Aa Fumu, durondu duagu duvu duneni kelisi nana divu diwelimina na bunsonsi buagu.

¹⁵⁷Bakuanitsi bami na bavinitsi bami bavu bapuela ne nana ngoliyila migaga miagu nsima.

¹⁵⁸Nyilabi mimbini nsoruru, jogu abagekipi malongi magu.

¹⁵⁹Fumu nyirondi maruma magu, kelisi nana divu diwelimina nagu.

¹⁶⁰Mambu magu motsu mavu yika ngensa na ngensa, migaga miagu miotsu midusungugu mivu na tsongu te na mutubu.

¹⁶¹Bivunda bamakuananga, diuleba nyisamavaga diambu; ne nana nyireyimini yika mambu magu.

¹⁶²Nyilabi nsangu na mambu magu dedi mosi na jandi agumadila bungunu buneni.

¹⁶³Nyivini tindi uvina mfurulu, tumba nyirondi migaga miagu.

¹⁶⁴Nyiguyitsi yisambuali yikumbu yilumbu mu yilumbu mu diambu dimigaga miagu amivu misungama.

¹⁶⁵Jogu aberondi migaga miagu bana tindi duvotsu na bagoba na diambu adiubabetsa.

¹⁶⁶Aa Fumu, uviva nyivivi dujegusu duagu! nyikipingi maruma magu.

¹⁶⁷Nyikelisi migaga miagu na nyimirondi tindi uronda.

¹⁶⁸Nyiina nyikelisi maruma magu nesi migaga miagu mu mbari ndeʼ guilabingi motsu ama nyivayi.

¹⁶⁹Aa Fumu, migamu miami migulunu nagu! Peyi dujabu nana gumavanginina!

¹⁷⁰Dulembu duami dugulunu nagu! Kwaki kalala nana gumavanginina!

¹⁷¹Gunomana undonsanga duganu duagu nyiguyitsingi temu tsiotsu.

¹⁷²Nyiwimbilingi nyimbu tsiagu! Maruma magu motsu mavu mawelimina.

¹⁷³Kwamusingi! nyimasola maruma magu.

¹⁷⁴Aa Fumu, nyivu nsumbumbu na nsala jidugobutsu duagu! Migaga miagu mindasi ubueji.

¹⁷⁵Aa Fumu, kelisa monyu ami yiri nyuguyitsanga! Bunonsi buagu bukwarisingi!

¹⁷⁶Nyivu yiari na yiari nderi yindombu ayimatsiemuga; ruga yitomba menu musalitsi agu, ngelibini maruma magu.