Read Punu Nyimbu 44 Bible Online

Nyimbu 44 - Punu bible

Nyimbu 44

¹Duimbu duyivunda yibawimbitsi na dubaana bababaala baCore.

²Aa Nsambi, tumagulu na matuji metu, bataji betu bamatutsingula motsu ama gumavaga va temu ogu kala kala.

³Ndeʼ gumabingisa bisi malongu utsanisa bataji betu.

⁴Bakaga betu bamadila bulongu tsiri mu mbari bamatoga na majenga tsiri na mangolu mogu bamakegobulila. Tumba yika na mangolu magu na yijalala yiagu mu mbari gumabarondanga.

⁵Aa Nsambi, ndeʼ guvu kaga ami oyilungisi batu bagu.

⁶Mbe tsi ndeʼ tugobetsa batu abetuvini; mbe tsi ndeʼ mbe tugobelisa batu abetuvini. Mbe tsi ndeʼ mbe tugobelisa bavinitsi betu.

⁷Ngevayili pita ami yitu, dijenga diami digokobula,

⁸nde guituwaki kalala ombu bavinitsi betu na guilasi abetuvini yisonyi.

⁹Tuikakisingi Fumu yilumbu na yilumbu na tugukakisanga te na mutubu. Letasatianu

¹⁰Tumba ndeʼ guitubusi, guitulasi yisonyi, gugemuewendisa bagora betu.

¹¹Gumaturombisa urina bavinitsi, jogu abetuvini bamatukinda.

¹²Gumatusingisa uboku nderi bindombu, gumatupasa o malongu masusu.

¹³Gumasumbisa batu bagu kulini, gugelabi yiri bavu na tsongu.

¹⁴Gumasingisa ababambini netu utusienga, gumasingisa abetutsiengili utudesanga.

¹⁵Gumatuvaga kwaku jimalongu motsu, batu botsu betumuangisilingi miuru.

¹⁶Bilumbu biotsu nyilabingi tindi yisonyi, nyiina, yisonyi nyilabingi,

¹⁷ava nyigululu muvinitsi nesi mufuengilitsi betutumuni nesi ugusienga.

¹⁸Diuleba tumalaba motsu mana tusamagulibana na tusamakubula pangini agu.

¹⁹Tusamagabuga mansinsima; tusamapembuga nsila aji gumatulonsa,

²⁰tumba gumatubuaga o yiari yimakoju; gumatubuaga o pisama jipinda fio!

²¹Mbe tumalibana anyi Nsambi avu mbe tumasambila bansambi bangana;

²²Nsambi mbe agodijaba, tsiri jandi aguijabi matasa mabatu?

²³Yilumbu na yilumbu mu diambu diagu tumabokulungu na tumarangulu rie: bindombu abibegu o uboku.

²⁴Aa Fumu, kokolu tsiagu, lerelamati, dibandu yi guitimbili yilu? Kokolu tsiagu, turangimini, guyamuetubuaga mutubu!

²⁵Dibandu yi guituliyili nsima? Dibandu yi guilibinini diguga dietu nesi ditsoga dietu?

²⁶Tumanyigu na tumabetsu, nyuru tsietu yika ugabuga tsigabuyi o butamba!

²⁷Kokolu tsiagu tuwamusi! Tuwaki kalala mu diambu dimaboti magu.