Read Punu Nyimbu 50 Bible Online

Nyimbu 50 - Punu bible

Nyimbu 50

¹Duimbu duAssaf. Nsambi aguvu na mangolu, Fumu Nsambi amavosa, amangengila bisi butamba ubandila o yiari ayi wisi epalili te no yiairi ayi wisi ewendisini.

²Sion uvu musiengi aguvu na tindi kembu, Nsambi evedimisi bundumba buandi muna.

³Nsambietuaruyi, Ayaba sui! Va gusu andi vavu muji aguisielisini na mungudi uneni uimutsiengili yiari na yiari.

⁴Nsambi egamuyi o julu na va butamba, utubulila batu bandi bunsonsi.

⁵Evosi rie: Kukuyilanu batu bami basigama abamavangana pangini nami uvagula pagu tsiunyensa!

⁶Julu jitubuli: Fumu avu usigama, Nsambi avu nsonsi. Letasatianu

⁷Jenu batu bami guluanu, nyina diambp udutsingula. BaIsrael, nyudulubusa, menu la Nsambi aguvu Nsambi agu.

⁸Nyidusiembi tsiri mu diambu dipagu tsienu, mu mbari duitsiveyingi temu tsiotsu.

⁹Ngaa na nsala mulumi ngombi ombu genu nesi balumi babinsabi babivanga bienu,

¹⁰mu mbari bibulu biotsu bimusiru bivu abiami nesi biruitsi bimunongu na munongu.

¹¹Nyijabi batsoli botsu nesi biotsu abilingi o kumu bivu abiami.

¹²Mbe nyina nsala mbe ngoduvonda yima mu mbari bulongu buotsu abuami na biotsu abivu muna.

¹³Je nyina nsala uji nyama tsibangombi? Je nyina nsala unu malungu mabinsabi?

¹⁴Pagu tsienu tsibi kabusulu tsimaboti, kefisanu pangini atsi dumavangana nami, menu Nsambi Aguvu Uneni.

¹⁵Mbana ndengilianu mu yilumbu yimunyongu nyuduwaka kalala mbana dundodisa.

¹⁶Tumba Nsambi ewivuli mutu mubi rie: Dibandu yi guivosulili maruma mami? Dibandu yi guivosulili pangini atsi gumavangana nami?

¹⁷Tsiri ndeʼ aguibusi nsiembu tsiami ava guiliyili malongi mami nsima?

¹⁸Ava guilabili mudayitsi guinongi nandi; guifubini na bimbembu wandi.

¹⁹Guivosilingi basusu mabi, posulu tsiagu yika mfurulu na mfurulu.

²⁰Mbura la mbura guifuengilili muana taji agu, guisiengi muana nguji agu.

²¹Motsu mana gumavaga, nyibi sui? Ngensa guitasi nyiji nana ndeʼ? Nyugusiemba nogulasa mabi magu.

²²Kebananu, jenu aduindibini, tsiyisanu adi nyivosi. Pa tsiri nana, dubunga, mutu agorungula uduwaka kalala.

²³Jandi oyivaguli pagu tsikabusulu tsimaboti ekitsi. Oyindedili odila dugobutsu duNsambi.