Read Punu Nyimbu 68 Bible Online

Nyimbu 68 - Punu bible

Nyimbu 68

¹Duimbu duyivunda yibawimbitsi na duDavid.

²Nsambi arelimi, batu abemuvini bapansiyi, bavinitsi bandi barini va misu mandi.

³Dedi mosi nana nsumbili jitsiemuyi; nana paga dilendi jisulumuyi o muji batu babi betsiemuyi va gusu Nsambi.

⁴Tumba batu basigama besangili na ndungulu va gusu Nsambi! Belabingi yika nsangu na nsangu!

⁵Wimbilanu Nsambi na yitsanu diina diandi, mukunsilianu nsila, jandi oyiruyi va dikalu diandi diina diandi divu Fumu. Sangilanu va misu mandi.

⁶Nsambi oyitsani va mbura andi avu taji bisiana na muwamusitsi ubakuili.

⁷Nsambi eveyi mukuta ombu abekelaba bavu pinsa, ewaki baviga kalala na ebalasi ubueji; tumba mimbini botsananga o kumu ajigaa na mamba.

⁸Aa Nsambi, ava guruminanga batu bagu, ava gumawendila nogu o kumu, Letasatianu

⁹avana butamba bumaregimina julu jimanoyisa mfula va misu magu. Nsambi Sinai, Nsambi Israel.

¹⁰Aa Nsambi, ndeʼ gumanyoyisa mfula jineni, gumawarisa bulongu buagu abu mbe bumatsiemuga.

¹¹Batu bagu bamatsananga o bulongu abu ndeʼ Nsambi na maboti magu gumakunsila abagu abamakambulu.

¹²Fumu evosi diambu; bagetu abavu dibuli dineni bamatubula misamu miboti.

¹³Bakaga bamabadi urina beyenarina, bagetu abamasiala o mandagu ugabana begabini abimakindu.

¹⁴Mabembi amavu na mapapi malora jivema na tsala tsitindi lora. Ne nana dusilimina o masaku?

¹⁵Ava Mungo Mangolu Motsu amapansila bakaga o bulongu, mfula jivema jimanyoyila mukongu uSalomon.

¹⁶Mukongu uNsambi aguvu o Bachan mukongu aguvu na puela mabindugulu, mukongu uBachan.

¹⁷Dibandu yi mukongu eni uvu na mabindugulu mapuela? Guna musuga uwava mukongu agu Nsambi amasola utsaninanga agu Fumu etsaniningi?

¹⁸Dutalu dumakalu maNsambi duvu magumabeji matosini na bivevi bivevi. Fumu eruyili nogu o Sinai o mbura andi.

¹⁹Ndeʼ gumamata, gumabega baviga, gumadila pagu tsibatu nesi tsimimbini wandi, Fumu Nsambi, mbura agu jivu o Sion.

²⁰Bagabusilingi Fumu diboti yilumbu na yilumbu Nsambi avu Mugobutsi etu, etumuningi kata yilumbu na yilumbu. Letasatianu

²¹Nsambi avu Nsambi etu oyituwakingi kalala. Fumu avu Fumu etu oyiturinisingi dufu.

²²Nyiina, Nsambi ogesumuna miuru mibavinitsi bandi na abavu na kanda, nesi abekevega mbela.

²³Fumu evosi rie: Nyuyibabonga o Bachan, nyuyibonga abavu o mubu,

²⁴yiri gutsiarila malungu mogu na bamondi bagu bodila dikabu diogu dibamfumbi babavinitsi bagu.

²⁵Aa Nsambi, bamalaba dibuli diagu bibalungitsi, nyiina, dibuli diagu o Ndagu Nsambi.

²⁶Tetega bawimbitsi, mbana abesiyi bisigu va gari banumba abesiyi mandungu.

²⁷Gabusilanganu Nsambi diboti o bibenguna, jenu baIsrael gabusilanu Fumu diboti!

²⁸Mbana baBenjamin abavu yifumba ayiviolila ugeyi mbana basefu baJuda abamaduara biduaru bimaruku mbana basefu baZabulon mbana basefu baNeftali.

²⁹Nsambi ami ruma na mangolu magu, mangolu magu maNsambi amamatuwarisa tindi uwarisa.

³⁰O Ndagu agu ajivu o Jerusalem bakaga bogubeyila milendu!

³¹Lasa bisi Egypte bukanyi, bibulu bieni abitsani o bilelenga, balumi babangombi beni na baana bogu, fumu eni jibatu abekutimi noguvagulila lora jivema; pansa batu aberondi divita.

³²Buneni boruyila o Egypte; bisi Ethiopie bosundila usamba miogu ombu Nsambi.

³³Jenu bisi butamba wimbililanu Nsambi, yitsanu Fumu. Letasatianu

³⁴Wimbililanu oyivioyi o julu, o tindi julu! Guluatianu egulusu diufi diandi adivu na tindi mangolu.

³⁵Yitsanu Nsambi! Bundumba buandi buvu o Israel mangolu mandi mavu o julu.

³⁶Aa Nsambi, ka muna buneni bu buvu o Ndagu agu. Nsambi Israel eveyi batu bandi mangolu na musuga. Diboti ombu Nsambi!