Read Punu Nyimbu 73 Bible Online

Nyimbu 73 - Punu bible

Nyimbu 73

¹Duimbu duAssaf. Nyiina, Nsambi avu muboti ombu baIsrael, nesi ombu jogu abavu na mirima milioma.

²Nyimabuduku dibaku; nyimaba bebeli nosietuga.

³Nyimawava bango dunangu ava nyimalabila maboti amavu na batu babi.

⁴Basamalabanga diguga, nyuru tsiogu tsimaputa,

⁵basamalabanga maguga nana batu basusu, basamadimbungu dedi mosi nana basusu.

⁶Dunangu duvu nderi misanga miogu dikasi divu nderi biduaru biogu.

⁷Mabi mepalingi mu mirima miogu, matasa mogu mavu yika la viri.

⁸Bereki basusu na bevosili abamakambulu mabi, bekematisa na posulu tsiogu.

⁹Bedesi Nsambi aguvu o julu na bebasi bulongu na mfuengululu tsiogu.

¹⁰La dibandu batu botsu bamayebadukanga noyenagulungu amogu.

¹¹Mbana bewivuli rie: Tsie Nsambi ojabila? Tsie Mungo Mangolu Motsu ojabila?

¹²Labatianu batu abagekipi yitu nesi migaga, belabingi nsangu temu tsiotsu na busina buogu buifuningi.

¹³Yika kulini nyimakeliomisila, yika kulini nyimasusa makaka mami ulasa ngaa na mbela.

¹⁴Yilumbu na yilumbu nyimadimbu, kedi tsiotsu nyimakilusungu.

¹⁵Mbe nyimavosa rie: Nyirondi uvosa nana jogu mbe nyimavayila baana bagu dedi.

¹⁶Nyinotasa motsu mana nyimalaba yiri divu diambu dineni

¹⁷te na nyimakota o Mbura Nsambi mbana nyimatsiyisa tindi utsiyisa adi bolaba o gusu.

¹⁸Nyiina, guibasingisi nsila puelili, guibawakusulu mu murambu.

¹⁹Ka yia! Labatianu mu mua pesu temu bamabungu! Bamasundila ugusulu mutubu.

²⁰Fumu, ava guibandili usala bavu nderi ndosi ava mutu erambuyili elibini nana jibetsili.

²¹Ava munyongu umabasila murima ami nyimaketsoyisanga, nyisamaba na ndunga nesi diela,

²²nyimaba va gusu agu nderi yibulu ayivu na buduka.

²³Ne nana nyuba nagu mutubu. Ndeʼ gumakaanga mu gogu umabaala,

²⁴ndeʼ guikwendisingi nadujabu duagu te na guikotisi o bundumba.

²⁵Je nyina mutu ususu o julu aguiviolili ndeʼ? Va butamba wandi ngaa na mutu ususu agu nyirondi, yika ndeʼ.

²⁶Diuleba nyuru tsiami na murima ami biurungula udeda, Nsambi avu dimanyi diami na mami motsu.

²⁷Labati, jogu abekakini nagu ubungana bebungini; ndeʼ guibungi botsu abagegudedili.

²⁸Ombu gami, ubambana na Nsambi la diboti diami; nyimavaga ndeʼ Fumu Nsambi yisuemunu yiami, nyukakisa bisalu biagu.