Read Punu Nyimbu 89 Bible Online

Nyimbu 89 - Punu bible

Nyimbu 89

¹Uuimbu adumatubu na Etan musi Ezra.

²Nyuwimbilanga maboti magu Fumu, te nakula tsiotsu nyujabisanga usigama uagu.

³Nyivosi rie: Maboti magu motsinganga, usigama uagu ujabunu te no julu.

⁴Gumavosa rie: Nyimavangana pangini na yisolu yiami; pesi aji nyimalevila musalitsi ami David ajiji rie:

⁵Nyuvinsa mutegula agu kaga va yivinga yiagu. Nyuwarisa yitsiga yiagu yibufumu; yiuba mutubu. Letasatianu.

⁶Aa Fumu, bisi julu basangili bimaga abi gumavaga; basangili usigama uagu o julu jiotsu.

⁷Anyi aguvu o julu oyibagunu na Fumu? Va gari bansambi, jimosi jibagunu nagu?

⁸Nsambi avu na duyitsu o yibenguna yibiansa biandi ana diduma ombu jogu abebambini nandi.

⁹Aa Fumu Nsambi mabadi, anyi avu na mangolu dedi nagu? Aa Fumu, ndeʼ guvu usigama temu tsiotsu.

¹⁰Ndeʼ guirumi mubu: ava mibiji mimatili, ndeʼ gumivotsi.

¹¹Ndeʼ gumagesumuna Rahab, na mangolu magu gumapansa bavinitsi bagu.

¹²Julu na butamba abiagu, ndeʼ gumasunda bulongu gumabuwarisa wandi.

¹³Ndeʼ gumasunda banda na tandu; mikongu miTabor na Hermon migusangili.

¹⁴Ndeʼ guvu na tindi mangolu. Ka muna mangolu ma mavu na dikaka diagu dimabaala.

¹⁵Yitsiga yiagu yibufumu yivu na dusungugu na musuga;

¹⁶maboti na ngensa bivu va gusu agu. Ka muna ubueji gu uvu na abegusangili!

¹⁷Ka muna ubueji gu uvu na abemonutsu na yijalala yiagu. Besangili diina diagu temu tsiotsu, bedodisingi dusungugu duagu.

¹⁸Ndeʼ guvu bundumba na mangolu metu, tuilungi mu diambu dimaboti magu.

¹⁹Fumu avu ngubu etu, kaga etu avu Nsambi Israel.

²⁰Mbana gumavosa mu yiriariamu na abagu badurondu rie: Nyimawamusa ngogaga, va gari batu bami nyimasola mufudu.

²¹Nyimarasuna musalitsi ami David, nyimamubiatsa na matsi mami.

²²Dikaka diami diuba nandi na gogu ami umuwamusa.

²³Muvinitsi agomusutusu, mumbini agomukambisa, via!

²⁴Nyugesumuna bavinitsi bandi va misi mandi, nyuboka abemuvini.

²⁵Usigama uami na maboci mami biuba nandi, nyuroyisa musuga andi.

²⁶Nyunyavisa mangolu mandi ubandila o mubu te no mijamba mineni.

²⁷Jandi ovosanga nami rie: Ndeʼ guvu taji ami na Nsambi ami na Dimanyi adivu dugobutsu duami!

²⁸Va julu vana nyumuvaga tsomi ami, oviolila bakaga botsu va butamba.

²⁹Nyumusueyilanga maboti mami; pangini aji nyivangini nandi jigokubuga;

³⁰Agogambu na yivinga va yitsiga yiandi; bufumu buandi butsinganga tindi utsinga.

³¹Pa baana bandi bobusa migaga miami; pa bageduki maruma mami,

³²pa besumuni bingitsi biami pa bagekelisi maruma mami

³³kabogu na mukasa ami nyubakilisa mu diambu dinsimbulu tsiogu nesi masumu mogu.

³⁴Ngomupatula maboti mami na ngobunsa pangini ami.

³⁵Ngobunsa pangini ami na ngovinsa kingu mu ama nyimavosa.

³⁶Nyimaleva pesi na bunsambi buami: Tsatsabi! Ngofurila David.

³⁷Bategula bandi bobanganga mutubu; nyubakelisanga; yiotsu ayi wisi uvu o julu bufumu buandi bubanganga wandi.

³⁸Yiotsu ayi tsungi jivu o juiu bufumu buandi bubanganga wandi. Letasatianu.

³⁹Tumba ndeʼ gumabusa yibiatsi yiagu, gumamuliyila nsima, gumamunyoyila kabu.

⁴⁰Gumabunsa pangini aji gumavangana na musalitsi agu; gumagolasana dugaba duandi nodubuaga va tsi.

⁴¹Gumaberusa bivaga biandi biotsu, gumapansa misiengi miandi mikandu.

⁴²Botsu abevioyi bemikindingi; abamabambana nandi bedesingi.

⁴³Gumavega abemuvini bukidi, gumalasanga bavinitsi bandi botsu tindi nsangu.

⁴⁴Gumatunisa majenga mandi; gusamamuwarisa o divita.

⁴⁵Gumasukisa bundumba buandi, gumabuaga yitsiga yiandi yibufumu va tsi.

⁴⁶Gumagufisa bufudu buandi, gumamusingisa ulasu yisonyi. Letasatianu.

⁴⁷Aa Fumu, te na temu yi gusuemanga? Kabu agu jiuvendumuganga nderi muji?

⁴⁸Tangimini, temu ami jivu jigufi! Nderi kulini gumasundila batu yika uvioga bevioyi!

⁴⁹Va mutu aguba monyu mutubu? Va mutu agurungula ukegobula agurungula urina mbura jiabafu? Letasatianu.

⁵⁰Aa Fumu, maboti magu matega, agunyi mavu? Usigama uagu agu gumalasa ava gumalevila David pesi uka?

⁵¹Aa Fumu, rangimina yisonyi ayi batu bendasi! Guyalibana, nyiwendisi batu bapuela bapuela.

⁵²Aa Fumu, bavinitsi bagu usienga besiengi yibiatsi yiagu, mbura tsiotsu atsi ewendingi.

⁵³Diboti ombu Fumu te na mutubu! Amen! Amen!