Read Punu Nyimbu 90 Bible Online

Nyimbu 90 - Punu bible

Nyimbu 90

¹Dusambu duMoise mutu uNsambi. Aa Fumu, ndeʼ guvu yisuemunu yietu te na kula tsiotsu.

²Ne mikongu mikasundu nesi gukasunda butamba na bulongu ndeʼ guvu Nsambi mutubu, gubanganga Nsambi te na mutubu.

³Gumagabusa mutu o difufundu, gumavosa rie: Gabuganu agu dumarugasana.

⁴Mu mbari tosini bilima jivu nderi yilumbu yimasiga ombu gagu, yimavioga kala, dedi mosi na yimogu yimukolu.

⁵Ndeʼ guibasukisi nderi ndosi bedori. Bebendi nderi biriri,

⁶kedi bineyi mbana biwansi, bebitabuli ava tsisiga mbana tsigumuyi.

⁷Tumasielusunu na kabu agu, jionyi jitulasi goma.

⁸Gumasunsa mabi metu va yijalala, yijalala yiagu yilasi ametu amamasuegu.

⁹Bilumbu bietu biotsu bimatabulu na kabu agu; bilima bietu bimatsiemuga; mivumu mimatabuga.

¹⁰Dutalu dubilima bietu duvu magumidusambuali, bango mangolu duvu magumidunana mabilima; bionyi bituveyi yika maguga na purulu; bivioyi mbangu, yika uweʼ tuiwendi.

¹¹Anyi ejabi mangolu makabu agu? Anyi orungula uba diteli ava guinyoyili?

¹²Tulonsi utala bilima bietu buranga; tuveyi mirima uwiji diela.

¹³Aa Fumu, guyamuetuliyila nsima! Tugengili, tulasi yingeba.

¹⁴Muna kedi tugabilingi maboti magu mbana tusangilanga yitsingu yietu yiotsu.

¹⁵Bilima bipuela tumakambusungu, gumatulasilanga munyongu, tsie tulasi bilima bipuela binsangu wandi.

¹⁶Yisalu yiagu yilabini ombu basalitsi bagu, bundumba buagu builabini ombu bategula bogu.

¹⁷Fumu Nsambi etu, tulasi maboti magu. Warisa bisalu bietu, nyiina, biwarisingi.