Read Punu Banongu 12 Bible Online

Banongu 12 - Punu bible

Banongu 12

¹Jandi oyirondi uwiji erondi diela; jandi oyivini nsiembu avu yiduka.

²Mutu muboti edili maboti maFumu tumba eveyi mbela ombu jandi aguvu na ndunsulu.

³Mutu agewarusu na mbivulu tsiandi tumba batu basungama bagopupusu, via!

⁴Dikongu dimugetu avu bundumba bumulumi andi tumba jandi oyimulasi yisonyi avu nderi nyama ajimatupa.

⁵Matasa mabatu basungama mavu yika dusungugu; tumba kanu tsibatu babi tsivu yika ndunsulu.

⁶Mambu mabatu babi mavu yika mirambu ubokila batu tumba posulu tsibatu basungama tsigayi basusu dufu.

⁷Batu babi banoberuga, mukuta ogu umatsiemuga tumba mukuta ubatu basungama uvu sikiri.

⁸Mutu usungama oyitsungu mu diambu didiela diandi; yiduka elensungu.

⁹Uviolila ubueji uba divolambombu noba na musalitsi tsiri uba na dunangu nogambu na biguji.

¹⁰Mutu usungama ebambingi biruitsi biandi tumba batu babi bagekipi.

¹¹Jandi oyisali nungi andi edilingi biguji bipuela tumba oyidukingi mambu makulini agaa na tsongu.

¹²Mutu mubi enyungilingi ama bambatsi bandi bevayingi tumba yisuebiri yibatu basungama yibafunisi.

¹³Mutu mubi egaangu na posulu tsiandi tsimfurulu tumba mutu usungama ekegusula mu maguga.

¹⁴Mutu odilanga maboti mu diambu diposulu tsiandi tsiboti na mutu mutu edilingi nana amasalila.

¹⁵Bifu biyiduka biwelimina na jaʼ beni tumba jandi oyigulu malongi ana diela.

¹⁶Yiduka elasi kabu andi tumba mungo diela agekipi bisiengu.

¹⁷Jandi aguivosi ngensa etubuli dusungugu, mbeji jimfurulu etubuli ndunsulu.

¹⁸Jandi aguvu na mavovosa enemisi nderi dijenga tumba posulu tsibango diela tsibembiyi.

¹⁹Ngensa jivu ngensa mutubu tumba mamfurulu mojabunu.

²⁰Ndunsulu tsivu mu mirima mijogu abetasingi yika mabi tumba nsangu jivu na jogu abelonsi mambu maduvotsu.

²¹Mungo businganyi agokambulu na diambu tumba batu babi bekambusu na puela mambu.

²²Posulu tsimfurulu tsivu nsoruru ombu Fumu tumba abekipingi ngensa bemulasingi ubueji.

²³Mungo diela esueyi diela diandi tumba biduka besamuni buduka buogu.

²⁴Abesali na mangolu boruma tumba batsoritsi bosalusu.

²⁵Munyongu aguvu na mutu umutsirisa murima tumba posulu jiboti jiumubembiga.

²⁶Mutu usungama elonsi mbatsi andi nsila jiboti tumba nsila jibatu babi jibatsiemusi.

²⁷Mutsoritsi agerunguli ne ukelambila; adivu diwelimina mutu asalingi.

²⁸Dusungugu duirombisi monyu, mabi merombisi dufu.