Read Punu Banongu 18 Bible Online

Banongu 18 - Punu bible

Banongu 18

¹Mungo nyinga erombi nsala tsijaʼ beni, evini diela diotsu disusu.

²Yiduka agelabi ubueji na dujabu tumba elabi ubueji upalisa matasa majaʼ beni.

³Ava mutu mubi avu, dilensa divu vana wandi, ava nsiembu tsivu, yisonyi yivu vana wandi.

⁴Posulu tsidibaala tsivu nderi yitsiba ayidonga na diela divu nderi mamba mamuwigu.

⁵Digaa diwelimina utabulila mutu mubi bunsonsi buboti novega mbela ombu mutu usungama.

⁶Posulu tsiyiduka tsirombisi mitsundu nesi makuba.

⁷Posulu tsiyiduka tsiumurombisa ubungana, posulu tsiandi tsivu nderi murambu agumuwakusulu.

⁸Posulu tsimungo matamba tsivu nderi pinda tsigangu, ka muna nsangu ji mutu elabi.

⁹Mutsoritsi avu muana nguji mubungitsi.

¹⁰Diina diFumu divu nderi yivaga, mutu usungama esuemi o gari yionyi na avu sui.

¹¹Busina buyisina buvu nderi musiengi andi ukandu, mu matasa mandi buvu nderi yibaga yisakama.

¹²Mungo dunangu avu bebeli nobungana; ukesundusa uireyili bundumba.

¹³Jandi oyiwaguli nesi asakatsiyisa diambu elasi buduka buandi na ekelasa yisonyi.

¹⁴Pa mutu ana murima uwara orungula uwarila ubela tumba pa murima umabuliga anyi omuwarisa?

¹⁵Aguvu na dujabu ana diela na edigulungu te na editsiyisi.

¹⁶Milendu mimutu mimubalili nsila na mimuveyi dikotulu va gari bivunda.

¹⁷Mutu utega evosi nderi motsu mavu mawelimina te na mutu umubeji amavosa mbana ngensa jiujabunu.

¹⁸Mbanda jivotsi paga jiotsu nesi utabula diambu va gari baneni.

¹⁹Divu divura ukota o musiengi ukandu tumba divolila uvura umuebambana na muana taji agu gumanyoyisa. Mitsundu mivu miwara dedi na yiabutsu yibudilu.

²⁰Pegulu ugabila diela tsivu tsiboti dedi mosi na biguji bigukurusu.

²¹Posulu tsiurombisa dufu nesi monyu, mutu mutu osaku na tsionyi.

²²Jandi omadila mugatsi amadila diboti; amadila yiesa ombuFumu.

²³Yijaga evondingi yingeba tumba ewaguli na bukanyi.

²⁴Bambatsi bapuela borungula ugurombisa maguga tumba mbatsi-murima jiviolili ne muana nguji.