Read Punu Banongu 20 Bible Online

Banongu 20 - Punu bible

Banongu 20

¹Malamu merombisi mutu uba mungo dunangu, malamu mamangolu merombisi mutu uba mungo dikasi, mutu uotsu oyimaviosulili agaa na diela.

²Dunsiensi dukaga duvu nderi ugumba uyimbungu, jandi oyimunyoyisi okerombisa dufu.

³Jandi oyibusi mitsundu ana duyitsu; biduka yika utsunda betsundi.

⁴Mutsoritsi agugesali mu diambu diyiotsi; ava dutsonsugu agaa na yima utsonsiga.

⁵Kanu tsimutu tsivu tsisuegu nderi bitsiba bidonga tumba mungo diela ejabi uyitsipalisa.

⁶Batu bapuela belasi yisagumunu yiogu tumba divu diranga ulaba mutu usigama.

⁷Mutu usungama elasingi usunda uandi; ka muna ubueji gu uvu na baana bandi!

⁸Ava kaga etsanini va yitsiga yibufumu utabula bunsonsi esundili ulaba mabi motsu.

⁹Anyi ovosa rie: Nyimaliomisa murima ami, masumu mami mamatsiemuga?

¹⁰Mutu aguvu na minongu mibeji mibipitsulu na minongu mibeji mibietsu avu nsoruru ombu Fumu.

¹¹Ne muana elasi yeri bifu biandi nesi yisalu yiandi bivu biwelimina na bisungama.

¹²Dituji ugululu na disu ulabila: biotsu bibeji Fumu amavaga.

¹³Pa guiviosi temu agu uwendanga yilu, gubanganga yijaga. Salanga na gudilanga biguji.

¹⁴Musumbitsi evosi rie: Ka muna dufunu du, ngorungula! Mbana ewendi noyenayemanga yisumbu yiandi.

¹⁵Posulu tsidujabu tsivu dufunu duneni uviolila lora na baperala.

¹⁶Disawelimina usombisa muenyi pa agoguvega tuga; muvondi tuga mu mbari muenyi avu.

¹⁷Mutu elabi ubueji ava ediongili mutu nandi tumba biguji abi esumbi biukaluga nderi mugamfi mu munu andi.

¹⁸Matasa mawarusungu na dilongi; kabogu guyatoga divita pa gusakakunsa motsu.

¹⁹Jandi oyiyenavosanga kulini etubuli amamasuegu; kumba bango dundiogu.

²⁰Pa mutu esiengi taji andi na nguji andi lambi andi jiutsima, olaba yika pisama!

²¹Busina abumasundila udilu bugoba na miula o gusu.

²²Guyavosarie: Nyugabusapila! Vayila Fumu yitu jandi oguwaka kalala.

²³Fumu elabi minongu mibeji mibipitsulu nsoruru; dedi mosi na mudodu agugaa uwelimina.

²⁴Fumu oyiwendisi taka tsimutu kabogu tsie mutu ojabila aguewendi?

²⁵Divu murambu usundila uvangana pangini aji gugorungula ukelisa.

²⁶Kaga ajivu na diela egengili mabi na ematsiemusi na mikilu miandi.

²⁷Diufi dimurima la lambi aji Fumu amavega mutu umonitsi motsu.

²⁸Yisagumunu na usigama bikelisi kaga na biwarisi yitsiga yiandi yibufumu.

²⁹Mangolu mavu bundumba bubafudu na bamfi bavu nderi duyitsu dubinunu.

³⁰Mikilu amigulusu buali mitsiemusi mabi, miubemba nesi matasa.