Read Punu Banongu 24 Bible Online

Banongu 24 - Punu bible

Banongu 24

¹Guyawava batu babi na guyalinganga nogu.

²Betasingi yika dubungu na bevosingi yika mabi na mabi.

³Ndagu jirungu na diela na jiwarusu na dujabu;

⁴na diela bibuku bindagu bibasungu na maboti madufunu duneni.

⁵Dibaala adivu na diela avu na tindi mangolu, dujabu duandi duifunisingi musuga.

⁶Malubu moguvega mangolu utoga divita, malongi mapuelamogulungisa.

⁷Diela digosoyini na yiduka; la dibandu ayadibula munu oyibenguna.

⁸Jandi oyitasingi uvaga mabi enengulu dibaala adivu na malengu.

⁹Matasa mabuduka mavu disumu na mudesitsi ekevaga nsoruru.

¹⁰Pa gutsiemusa mangolu ava guilabili munyongu kabogu gumadeda.

¹¹Waka jogu abebegu o dufu kalala, gobula jogu abewendi nopepalana o uboku.

¹²Aguvosa rie: Ka yia! Jetu tugejabi! Nsambi oyipitsi mirima agedilabi? Jandi oyigukelisi agedijabi? Agosaka mutu mutu nana amasalila?

¹³Muana ami udibaala, ji buji mu mbari buvu buboti; yisila yibuji yiuba dueyi va dilalaga diagu.

¹⁴Jaba yiri diela divu dedi mosi ombu gagu; pa gudidila guna tsongu: mambu meni moba mawelimina.

¹⁵Ndeʼ mutu mubi guyarambila mutu usungama mirambu na guyapansa mbura aji etsanini;

¹⁶mu mbari mutu usungama eberuyi yisambuali yikumbu ne nana esimbuyingi tumba batu babi bamatsudama mu purulu.

¹⁷Guyasangila mu mbari muvinitsi agu amatsimbu na guyalaba nsangu ava epupusulu.

¹⁸Fumu amakedilaba na agolaba ubueji na dionyi, odunda ukilisa muvinitsi agu.

¹⁹Guyanyungila jogu abevayi mabi, guyavina batu babi.

²⁰Bavayitsi bamabi bagaa na tsongu; o gusu lambi jibatu babi utsima jitsimi.

²¹Muana ami udibaala, duma Fumu na kaga; guyafubana na mimbini.

²²Dubungu dusundila ulabana, gugejabi mukilu agu Nsambi na kaga bobakilisa.

²³Gulu adi batu badiela bevosi: Disawelimina uba na dupasu ava dutabulila bunsonsi.

²⁴Pa nsonsi ovosa na mutu mubi rie: Gugaa na diambu, batu bemusiengi va mosi na bisi malongu.

²⁵Jogu abekilisi bavayitsi bamasumu bogabulu miula.

²⁶Jandi oyiwaguli ngensa ewarisi dinonga.

²⁷Ne gukarunga ndagu lesungiga yisalu yiagu yiari na yiari na sala manungi magu yiri gudila digumba.

²⁸Guyafuegilila mutu nagu; ndeʼ guirondi uba na penda?

²⁹Guyavosa rie: Nyumuvayila dedi mosi nana amapayila, menu nyugabusila pila ombu mutu uotsu.

³⁰Nyimavioga o gari nungi jimutsoritsi na nyimagengila mfuga tsiyiduka.

³¹Nyimalaba yika matsiendi na matsiendi yiari na yiari, bambatsi bamabasa muna na bibaga bimamanyi bimarakuga.

³²Nyimabigengila na buranga na nyimawiji dilongi mu abi nyimalaba.

³³Mua pesu yilu, mua pesu utsukama na mua pesu utsingiga miogu nowenda yilu!

³⁴Mbana bujaga na nsala biugukambisa dedi mosi nana yikongu na mukinditsi bekambisili batu.