Read Punu Banongu 27 Bible Online

Banongu 27 - Punu bible

Banongu 27

¹Guyakematisa mu diambu dimugesa mu mbari gugejabi adiulabana namunyi.

²Basusu bagukakisi, nesi muenyi; guyakekakisa, via!

³Dimanyi divu ditsira na yisieyi wandi tumba buduka buyiduka buiviolili biotsu bibeji utsira.

⁴Yifutsu yivu tindi diambu na kabu jivu nderi nyidu tumba anyi orungula utsiemusa diwavi?

⁵Uviolila ubueji usiembu va misu mabatu tsiri uba na yimbatsi ayigelabini.

⁶Nsiembu tsimbatsi tsivu ngensa tumba mabumba mamuvinitsi mavu ndunsulu.

⁷Jandi agumagukuru etsiarili yisila yibuji tumba aguvu na nsala elabi yiri biotsu abivu nduli bivu dueyi.

⁸Mutu aguilingi vala na bulongu buandi avu nderi tsoli ajilingi vala na diuva diandi.

⁹Matsi na miyombu biveyi nsangu, malongi maboti mambatsi mavu mawelimina.

¹⁰Guyarina mbatsi agu nesi mbatsi jijaji agu, na guyakota o ndagu muana taji ava guilabili munyongu. Mutu nagu aguvu bebeli avu na tsongu uviolila muana taji agu aguvu vala.

¹¹Muana ami udibaala ba na diela na ndasi ubueji mbana nyurungula uwagula jandi oyinsiengi.

¹²Dibaala dilubuga elabi mabi na esuemi; biduka bevioyi kuasa na bekilusu.

¹³Disawelimina usombisa muenyi pa agoguvega tuga; muvondi tuga mu mbari muenyi avu.

¹⁴Jandi oyitsagumusi mutu nandi na diufi o julu muna kedi avu nderi mutu oyisiengi.

¹⁵Mugetu aguitsundingi avu nderi dusiendi aduigelini.

¹⁶Umusikiga uvu nderi usikiga punga nesi ugaanga matsi va dikaka.

¹⁷Nana budilu buisibi budilu dedi mosi dibaala efutsisi kabu jidibaala nandi.

¹⁸Jandi oyibali mumanga oji mimanga, jandi oyikelisi fumu andi osaku.

¹⁹Nana mutu ekelaba mu mamba dedi mosi murima mutu uikelasi.

²⁰Mbura jiabafu na mbengi bigedugusu nsala, via; dedi mosi mutu agedugusu nsala tsiandi.

²¹Muji uipitsi lora jivema nesi lora; dedi mosi diduma dimutu dimupitsi.

²²Diuleba guroka yiduka mu yidu dedi mosi nana berokili milunda ne nana buduka buandi bugotsiemuga.

²³Jaba kadi yindombu yiagu buranga, bungula migamba miagu.

²⁴Mu mbari busina bugetsingi mutubu nesi bukaga bugetsingi mutubu.

²⁵Bilonga bimagusuga, biriri bimabenda, biotsu bimagukugu.

²⁶Baana babindombu bavu bawelimina uguduisa na binsabi bivu biwelimina ugusumbila nungi;

²⁷dile dibinsabi divu diwelimina unuisanga bisi ndagu agu nesi basalitsi bagu babagetu.