Read Punu Banongu 28 Bible Online

Banongu 28 - Punu bible

Banongu 28

¹Mutu mubi esundili urina ne pa bagemubingisi; mutu usungama ana bukidi dedi mosi na mumfumfu uyimbungu.

²Ava bulongu buisumunini migaga batu bapuela begalini musuga. Tumba ava mutu erumini na dujabu na diela bulongu buvu sikiri.

³Yijaga yidibaala ayikambisi abamakambulu avu nderi mutsogu mfula aguirombisi batu usilama nsala.

⁴Jogu abebusi migaga miNsambi bekakisi mutu mubi tumba jogu abemikelisi bemubelisi.

⁵Batu abagaa na businganyi bagetsiyisi amavu masungama tumba jogu aberondi Fumu betsiyisi motsu.

⁶Uviolila ubueji uba yijaga aguvu na bifu biwelimina tsiri yisina aguvu na bifu bikulini.

⁷Muana dibaala aguvu na dujabu ekelisi migaga miNsambi tumba jandi oyisalisi nsoruru elasi taji andi yisonyi.

⁸Jandi oyifunisi biandi na mbika na yimbabu, ebigukiyili jandi oyilasi bijaga yingeba.

⁹Pa mutu edibiyi matuji mu mbari akegulu migaga Nsambi agegulu dusambu duandi.

¹⁰Jandi oyirombisi misinganyi upembuga nsila jaʼ beni obonduga o dubila adu jaʼ beni amatima. Tumba batu basungama bebialili maboti.

¹¹Yisina etasi yiri ana diela; tumba yijaga aguvu na dujabu ediweliyi.

¹²Ava basungama belungili bundumba buneni buvu; ava batu babi beretsimini mutu mutu erini.

¹³Jandi oyisueyi nsimbulu tsiandi agefuningi tumba Nsambi etandi jandi oyitubuli nsimbulu tsiandi notsibusa.

¹⁴Ka muna ubueji gu uvu na jandi oyidumingi uvaga mabi; jandi oyigalisi murima andi olabanga maguga.

¹⁵Nana yimbungu egumbili nesi ursa aguvu na tindi nsala anana mutu mubi avu aguirumi batu abavu bijaga.

¹⁶Muana kaga aguvu na dujabu evayi puela mambu amagaa maboti; tumba jandi oyivini busina abumadilu na ndiongulu otsinganga.

¹⁷Mutu agumaboka mutu nandi erini te no dufu; mutu agomusikiga.

¹⁸Musinganyi owaku kalala tumba mungo penda ogaangu na penda tsiandi.

¹⁹Jandi oyivari nungi andi edili biguji bipuela tumba jandi oyiduki mambu makulini otopulu purulu.

²⁰Mutu usigama avu na tindi miula tumba jandi aguvu nsunsaba na nsala busina okilusu.

²¹Disawelimina uba na dupasu dubatu, tumba mutu orungula ukerombisa diambu mu mua yibuku yidipa.

²²Mungo dunyungi anansala jineni jibusina na agejabi yiri nsala jiumukambrsa.

²³Jandi oyisiembi basusu odila maboti uviolila jandi aguvu na posulu tsindunsulu.

²⁴Jandi oyidayili taji andi na nguji mbana evosi rie: Adina tsiri disumu avu mbatsi yikongu.

²⁵Mungo dunangu erombisi mitsundu tumba jandi oyikevega ombu Fumu ofunanga.

²⁶Jandi oyikevayila yitu avu tindi yiduka tumba jandi aguiwendingi na diela owaku kalala.

²⁷Jandi oyigabili bijaga agofu na nsala tumba jandi oyigalisi murima avu na milogu.

²⁸Ava batu babi beretsimini mutu mutu ekesuega; ava bebunginini batu basungama befuningi.