Read Punu Banongu 29 Bible Online

Banongu 29 - Punu bible

Banongu 29

¹Mutu aguvu uwelimina usiembu na egalisi murima andi osundila ubungana na agobugu.

²Ava batu basungama befuningi batu belabi nsangu; ava mutu mubi erumini batu betatingi.

³Mutu oyirondi diela elasi taji andi ubueji tumba jandi oyiduki bipumbi enyambisini abiandi.

⁴Na dusungugu kaga ewarisi bulongu tumba kaga oyidili milendu ebubivisi.

⁵Jandi oyidunsi mutu nandi ekerambila murambu.

⁶Masumu mavu murambu umutu mubi tumba mutu usungama elungi na elabi nsangu.

⁷Mutu usungama ekipi maguga mabijaga tumba mutu mubi agekipi mambu memama.

⁸Badesitsi bebangisi kimbu o musiengi tumba bango diela bevotsi kabu.

⁹Pa mungo diela etumini paga na yiduka, yiduka onyoga tindi unyoga vo oreka tumba duvotsu dugoba.

¹⁰Bango dikasi bevini batu basunda tumba batu basungama bebakelisi buranga.

¹¹Yiduka elasi kabu andi jiotsu; tumba mungo diela esueyi kabu andi na ejisanguli.

¹²Ava muana kaga eliyili matuji ugulu posulu tsimfurulu basalitsi bandi bavu yika batu babi.

¹³Yijaga na mungo bukisi bavu mubundini; Fumu amavega botsu babeji misu.

¹⁴Kaga ajitabulili bijaga bunsonsi na dusungugu agotsiemusa musuga andi te na mutubu.

¹⁵Mukasa na nsiembu biveyi diela tumba muana agukeruma elasi nguji andi yisonyi.

¹⁶Ava bavayitsi bamasumu befunini masumu mefuni wandi; tumba batu basungama boba bambeji badunsugugu duogu.

¹⁷Pa guilonsi muana agu udibaala na yisuebiri jandi oba dubembugu duagu na ogulasanga nsangu.

¹⁸Pa batu bagemuelaba dulasu duNsambi bevayi nana berondili; ka muna ubueji gu pa bekelisi migaga miNsambi!

¹⁹Tsiri na posulu bekelisi muviga; ne pa egulu agededili.

²⁰Guilabi dibaala adivosi mapopopu? Jaba yiri uviolila ubueji uvayila yiduka yitu tsiri jandi.

²¹Musalitsi aguikelusu tindi ukelusu ubanda va bungebi buandi oketasa yiri muana avu.

²²Mungo kabu erombisi mitsundu na mungo yifutsu efunisingi mabi.

²³Dunangu duidiamisi mutu tumba jandi aguvu divolambombu edili duyitsu.

²⁴Jandi oyifubini na mudayitsi ekevina; diuleba ejabi mulogu agetubuli diambu.

²⁵Uduma batu uvu nderi murambu tumba agumakevega ombu Fumuamakelusu.

²⁶Batu bapuela berombi udila maboti mamurumitsi tumba Fumu oyisungiyi mutu mutu.

²⁷Muvayitsi umasumu avu nsoruru va gusu batu basungama jandi aguvu na posulu tsisungama avu nsoruru ombu batu babi.