Read Punu Banongu 3 Bible Online

Banongu 3 - Punu bible

Banongu 3

¹Muana ami udibaala, guyalibana malongi mami, rangimina migaga miami.

²Amama mofunisa bilumbu nesi bilima biagu na gubanganga na duvotsu.

³Maboti na usigama uagu biyatsiemuga, bibi nderi kembu mu kingu agu, birangiminingi.

⁴Mbana Nsambi nesi batu bogurondanga na gutsananga sui va gusu ogu.

⁵Vayila Fumu yitu na murima agu uotsu, guyakerutsula na diela diagu,

⁶kevega ombu gandi mu mambu magu motsu; jandi ogulonsa nana gusalilanga.

⁷Guyakerutsula mu diambu didiela diagu; duma Fumu na liyila mabi nsima.

⁸Adina diugubelusa na gubanganga uwara.

⁹Gabusilanga Fumu diboti; muvagulili bima biagu biboti nesi biagu biotsu biumanga.

¹⁰Mbana bilundulu biagu biubasa na digumba na nsienga tsiagu tsiubasa levi-levi na mienga.

¹¹Muana ami udibaala guyalensa mukilu uFumu, guyapinda murima mu diambu dinsiembu tsiandi.

¹²Fumu ekilisi agu erondi dedi mosi nana taji ekilisili muana agu erondi.

¹³Ka muna ubueji gu uvu najandi oyidili diela nesi jandi oyidili dujabu!

¹⁴Dionyi divu busina abuiviolili nesi lora jivema na diviolili mbika ajidilunu na tindi lora.

¹⁵Dionyi divu busina abuiviolili baperala na mamanyi madufunu duneni nesi bima biotsu abivu na dufunu.

¹⁶Dionyi diveyingi mutu yitsingu yineni va butamba nesi busina na bundumba.

¹⁷Dionyi diwendisi mutu buranga na dimurombisi duvotsu.

¹⁸Dionyi divu nderi muiri aguiveyi monyu ombu jogu abedidili. Ka muna nsangu ji jivu nogu!

¹⁹Na diela Fumu amasunda butamba na dujabu amawarisa julu.

²⁰Na dutsigusu duandi amavaga bambengi nesi mamungi amenoyisi disala.

²¹Muana ami udibaala, guyatsiemusa malongi memama; kelisa diela na malubu.

²²Bionyi biuba tsongu agu na biuba nderi misanga mu kingu agu.

²³Mbana guwendanga na murima usunda na gugoduku dibaku.

²⁴Ava guisilimini gugoba na murima o julu, yilu yiagu yigoba na biburumusa.

²⁵Guyaba na murima o julu nesi goma jimasundila nesi pa batu babi bogutumuna.

²⁶Mu mbari Fumu ogukelisanga yiri gugowakululu mu murambu.

²⁷Guyabusa uvayila mutu diboti aguvu uwelimina uvagulu dionyi pa guna mangolu umuwamusa.

²⁸Guyatsingula mutu nagu rie: Wendanga gukaruga va gusu, mugesa nyuguvega yima; pa guna yima muveyi.

²⁹Guyaba na ditasa uvayila mutu nagu dibi; eguvayili yitu.

³⁰Guyatumuna paga matutumuna na mutu pa asakaguvaga mabi.

³¹Guyawava mungo dikasi na guyaduka bifu biandi.

³²Fumu elabi bango kanda nsoruru tumba avu mbatsi jibatu basungama.

³³Fumu eloyi ndagu tsibatu babi tumba egabili batu basungama miula.

³⁴Edesi badesitsi tumba evayili mavolambombu maboti.

³⁵Bango diela bodila bundumba tumba biduka bolasungu yisonyi.