Read Punu Banongu 31 Bible Online

Banongu 31 - Punu bible

Banongu 31

¹Malongi manguji Lemouel kaga jiMassa:

²Muana ami, agu nyimadila mu diambu ditsambu tsiami, diambu yi nyugutsingula?

³Guyamanina mangolu magu ombu bagetu na guyafubana na jogu aberombisi bakaga ubungana.

⁴Tsiyisa diambu diedidi: bakaga bayamanganga malamu mamangolu.

⁵Ava benuangingi bolibana migaga na bagomuewamusa abamakambulu.

⁶Veganu malamu mamangolu ombu oyibungini nesi ojivu na munyongu.

⁷Anuangingi yiri olibana bujaga buandi na agomuerangimina maguga mandi.

⁸Tumba ndeʼ vosila dibaba nesi jogu abamasiala yika miogu na miogu.

⁹Tabula bunsonsi na dusungugu na wamusa abamakambulu nesi bijaga.

¹⁰Anyi odila dikoongu dimugetu? Avu na dufunu duneni ne violila diperala.

¹¹Mulumi andi emuvayili yitu na agokambulu.

¹²Emuvayilingi maboti tsiri mabi mu yitsingu yiandi yiotsu.

¹³Ekedilila mionyi na lina na esalingi na nsangu.

¹⁴Avu nderi dikumbi dibatiyitsi bamuteti, ebeyingi biguji biandi vala.

¹⁵Eretsimi ava bimbombori bikivu mu tsi; eveyi biguji ombu bisi ndagu andi na eveyi basalitsi bandi bisalu biogu.

¹⁶Elabi mbura mbana ejisumbi; evari mfuga vana.

¹⁷Ekevega umanina mangolu mandi.

¹⁸Elabi yiri bisalu biandi bivu biboti, esalingi nesi mukolu.

¹⁹Na makaka mandi erungi duabi na edubiluli.

²⁰Ewamusi abamakambulu nesi bijaga.

²¹Agedumi mutsogu mu mbari amakeduisila abandi.

²²Ekebuangila mamfunga, biduaru biandi bivu na lina biyinyuru ayivu va gari dumbulu na ubenga.

²³Mulumi andi ajabunu ava etsanini na bivunda bibulongu.

²⁴Erariyi bikutu na esumbisi babeleeti ombu batiyitsi bamuteti.

²⁵Ana tindi mangolu na bundumba, emueti ava etasili amoba ogusu.

²⁶Evosi na diela na malongi maboti mavu nandi.

²⁷Ekipi motsu mandagu andi na ebusi uba mutsoritsi.

²⁸Baana bandi bemukakisi. Mulumi andi emukakisi wandi rie:

²⁹Bagetu bapuela bavu makoongu tumba ndeʼ guibaviolili botsu.

³⁰Maboti morungula udunsa na kembu jiunmgula uba kulini; mugetu aguidumi Fumu avu awelimina ukakusu.

³¹Musaki mu diambu diditsoga diandi; bisalu biandi bilabini o milebi.