Read Punu Banongu 4 Bible Online

Banongu 4 - Punu bible

Banongu 4

¹Baana bami bababaala, guluanu malongi mami. Banu liyiyi utsiyisa dujabu.

²Nyidulonsi malongi maboti kabogu duyabusa malongi mami.

³Meʼ wami nyimalonsu na taji ami; nyimarondungu na nguji ami.

⁴Taji ami amandonsanga rie: Kelisa mambu mami; kipa migaga miami na gutsananga sui.

⁵Romba diela na dujabu; guyabilibana. Kelisa amami motsu.

⁶Guyabusa diela, diuguwamusanga; dirondi na diugubambanga.

⁷Diela divu diambu dineni; dirombingi na mangolu magu motsu, romba dujabu wandi.

⁸Kakisa diela na dionyi diuguwarisa, diulasa bundumba buagu pa guidirombi.

⁹Divu nderi dugaba dumaboti na dubundumba va muru agu.

¹⁰Muana ami udibaala, gulu mambu mami. Pa guimakipi gutsinga na monyu.

¹¹Nyugulonsa nana gusalisila diela na nsanunu jiwelimina.

¹²Mbana gugolaba uvura ava guwendilanga nesi pa guiwendi mbangu gugosietuga.

¹³Kelisa malongi na guyamabusa; makelisi mu mbari mavu monyu agu.

¹⁴Guyawenda o mbura tsibatu babi na guyagukulila bifu biogu.

¹⁵Bigongi, guyabigukulila, via!

¹⁶Batu babi bagewendi bilu pa basakavaga dibi; bana dukanda te na bedugusu dibi diogu.

¹⁷Mabi na dikasi bivu nderi biguji na malamu ombu gogu.

¹⁸Nsanunu jibatu basungama jibagunu na yijalala ayilulingi va matebugulu te na muangulu.

¹⁹Nsanunu jibatu babi jivu pisama na pisama; bagelabilili ayiubaberusa.

²⁰Muana ami udibaala, ba limba ugulu mambu mami, liga matuji ugulu malongi mami.

²¹Kevega na murima uotsu umakelisanga.

²²Monyi mavu na tsongu na duvotsu ombu jogu abemasingi.

²³Kelisa murima agu ne uviolila bima biotsu: amuna muvu mabandu mamonyu.

²⁴Mamfurulu na ndunsulu biyapala mu munu agu.

²⁵Gengila yika o gusu, guyaba na magebu.

²⁶Gengila nsila aji guivioyili na mansila magu motsu mabi masungama.

²⁷Guyapembuga yiari na yiari; guyaduka mabi.