Read Punu Mambu Mamungo Diela 1 Bible Online

Mambu Mamungo Diela 1 - Punu bible

Mambu Mamungo Diela 1

¹Mambu maMungo Diela, muana dibaala uDavid kaga jiJerusalem.

²Divindugulu disatsi, motsu mevioyi yika uvioga.

³Yi mutu edili ava eketsoyisila vava tsi?

⁴Dukula duivioyi, dususu duivingi tumba butamba buvu sikiri.

⁵Wisi uitebuyi na uitsimi; wisi umuetebuga na umuetsima.

⁶Punga jivepi o yiari yitandu mbana jivindimi o banda; jitsiengilingi, jigevumi.

⁷Mijamba miotsu mivindimi o mubu ne nana mubu ugobasa via; uvindama mivindimi o mbura aji mlwendi.

⁸Bima biotsu unengana binengini, anyi orungula ujaba dibandu? Disu digetoyi ulaba na dituji digetoyi ugulu.

⁹Adimaba adina diumueba, adimavagu diumuevagu; vagaa diambu digona vava tsi.

¹⁰Vavu diambu adi batu bevosi rie: Gulu diambu digona! Diuleba diambu dieni dimalelabana kala mbe tusakaba.

¹¹Bagerangimini amagulu kala na amogulunu o gusu magosila yirangumunu ombu jogu aboba.

¹²Menu, Mungo Diela, nyimaba kaga jiIsrael o Jerusalem.

¹³Na diela diami nyimakevega na murima ami uotsu uromba nopitsa motsu amevagu vava tsi: yivu yisalu yiranga ayi Nsambi amavega batu bandi.

¹⁴Nyimalaba motsu amevagu vava tsi: laba motsu magaa na divindugulu. Mavu nderi mutu oyibingi punga.

¹⁵Adivu direkama digorungula usungugu na adigambu digorungula utalu.

¹⁶Nyimavosa o tsi murima ami rie: Laba nyimabanguga na nyina diela diviolila, uviolila jogu botsu abamateyila uruma o Jerusalem na nyimajaba tindi ujaba diela dineni na dujabu wandi.

¹⁷Nyimakevega na murima ami ujaba diela na buduka bumunongu na munongu; nyimajaba yiri adina wandi divu nderi ubinga punga.

¹⁸Na diela dineni belabi munyongu uneni na jandi oyiroyisi dujabu duandi eroyisi maguga mandi wandi.